乞客：餐飲人的六個絕技

雖則話而家餐飲界請兼職（俗稱「炒散」）只要識呼吸就請得，但係唔少資深餐飲人其實都身懷絕技。有啲高手直頭係一部實體記錄儀，咩客幾時嚟、食過乜、唔食乜、憎坐邊個位都記得一清二楚；而有啲高手就係從不冧檔，對手尤如摩打一樣高速不見影，不論邊個崗位都能夠勝任。

所以，作為一個高質餐飲人，並唔只係識落單、斟水、出餐咁簡單。我哋今日就一齊嚟探討吓餐飲界高手中嘅高手，有啲咩驚天地泣鬼神嘅技能呢？

1. 高強記憶力

基本上，餐廳平日都會臨時有啲Daily Special嘅食物或價格調整要去記。而更資深嘅侍應，仲需要記得每樣菜式的嘅做法同食材，因為客人可能會有食物敏感唔食得某種食材，例如：花生、蛋、奶；信某種宗教又唔食得牛、豬；某啲食齋嘅客人更會指明唔食得地下種嘅嘢，例如蔥同蒜。如果你下下都走去問廚房同事每樣Item有啲乜，一定畀人日日鬧到化。

2. 一眼關七

喺呢個餐飲業長期唔夠人手嘅年代，餐廳侍應除咗基本見到要即做嘅嘢，例如入客、落單、執枱、聽電話之外，更重要係留意客人嘅一舉一動去進行起餐（Pickup）工作。西餐通常都主要分頭盤、主菜、甜品，除非客人趕時間要求，否則一般都唔會一次過起晒，而侍應就需要時刻留意客人嘅用餐情況而進行Pickup，太快可能會令食物好快凍，太慢又會畀人投訴無嘢食。

3. 認人

做得餐飲，記得VIP、熟客呢啲都係必須嘅。而如果你係小本經營嘅餐廳，記得老闆朋友就更重要！事關有啲所謂嘅朋友會搲你畀折、送甜品，但有時連老闆自己都唔記得自己有個咁嘅「朋友」！呢個時候就要靠你幫吓老闆手分辨吓位「朋友」究竟係龍定係蟲。

4. 懂得社交，識睇眉頭眼額

講明係服務性行業，你要服務人點都要同人講嘢。而且做西餐，識講清晰流利嘅兩文三語都係必須嘅，Mary而家有咁流利嘅英文都係拜餐飲所賜㗎！見到一啲客人性格開朗啲，其實可以大家吹個水交流吓，客人都會覺得呢間餐廳嘅氣氛好友善同好客；但有啲客人可能其實有社交障礙，或者根本唔想同你講嘢，只係想靜靜地食餐飯，你死Chur住人講嘢就太過火啦。

5. 絕不輕易龜縮

喺呢個隨便投訴同搲折嘅乞客世代，不龜縮係好重要。你龜縮，影響嘅不單只係你自己，仲要係成間餐廳嘅同事。一次嘅縱容，可能係百次嘅禍害。

例如你明明訂枱同入枱時都有提醒客人還枱時間，而客人Agree咗，但夠鐘叫佢還枱嗰陣，佢竟然兇你：「你而家趕我走呀？」呢樣嗰樣咁擺明反口，死都唔還枱；呢個時候你一定要揸正嚟做，絕不手軟咁叫佢起身。

當然唔係話你下下都要做到咁足，明明無客等枱都要趕人走。但如果你只係驚人投訴或者搲折而做壞規矩，縱容啲乞客，下次佢可以話：「我上次都係畀㗎！」咁就害咗你自己同班同事！

6. 情緒智商高，皮笑肉不笑

面對住客人嘅無理取鬧、搲折投訴，如果侍應黑面應對，定必畀乞客有機可乘再投訴你態度有問題！所以無論發生乜嘢事，侍應都必須保持笑容去處理任何問題。即使最後都有投訴，老闆喺CCTV睇都只會見到一個笑客滿面嘅你，對住一位黑口黑面發狂發癲嘅乞客，正常都會知有問題嗰個一定唔係你。

所以話，做一個高質嘅餐飲人其實一啲都唔容易㗎！加上好多環境、人事因素，真係好難能夠同時兼顧晒所有方面。做齊六樣，真係可謂餐飲界之高手神人。不過……Mary有齊晒以上六樣技能唔通又同你講咩！ #謙虛啲好

此文章由原作者及Jobsdb HK撰寫／編輯。如欲刊登於其他網站或刊物，請電郵至[email protected]與我們聯絡。如有發現侵犯版權，原作者及Jobsdb保留採取法律行動的權利。