疫境當前,打工仔紛紛投身home office,市民亦少去人多聚集的場所,毋須面對面口沬橫飛的網上世界更加熱鬧。但見港人湧上網搶購口罩,因每人限購兩盒,以致潮語#兩盒thx應運而生。大家日日又𥄫住確診人數,發覺病毒傳人不分便服制服,立即興起另類熱搜關鍵字#3萬thx、#3萬香檳等等﹔而一名大媽對電話那邊廂講的:「我想行開吓,我想忘記咗呢個世界」短片,令該對白成為萬用抽水quote,向來最愛玩real-time marketing的網絡營銷大員,今次在瘟疫蔓延時,如何從中製造市場營銷契機,甚或主導群眾互動engagement的心理關口呢?
際此社交媒體當道的年代,市場人都擁抱實時行銷(real-time marketing),根據城市熱話來發揮的「抽水」廣告或post,就是實時行銷其中一種常見做法,好展示自己貼地貼潮不落伍。的確,抽得靚,令品牌和產品更得人鍾意多人買。刻下大熱潮語非#兩盒thx莫屬,正是抽水跑數首選。且慢,香港仍未脫離險境,怎能令群眾衝破全城尚在奮力抗炎的心理關口,而不對疫情抽水反感?放心,所謂非常時期用非常手段,在COVID-19依然肆虐期間,更要盡量維持生活日常,開會、上堂、運動……照樣進行,只不過換成視像交流或在非常地點:客廳睡房做而已。水,照樣可抽,在非常時期製造互動engagement,讓網民苦中作樂,善哉善哉。
▪ 【IT界渴才】創科行業逆市更顯優勢 新增職位邊類最熱門?
▪ 2019年是動畫年?Social Media Marketing求才若渴 動畫師儲定個人作品好過考證書
面對疫情,抽水與平時一樣須觸覺快,反應快,皆因網上潮語快來快去,同時須睇準形勢,快而不急,以免抽錯水招來負評。話明實時行銷,率先抽#兩盒thx、#3萬thx的水,主導話題為王﹔另外#行開吓、#忘記呢個世界啱晒work from home時勢,作為被困家中苦中作樂共鳴位。常言道「執輸行頭慘過敗家」,慢人幾步去到水尾時,大眾在鋪天蓋地的post海,已分不清邊個打邊個,削弱宣傳營銷效果。舉個近期例子,某女藝人搭飛機問空姐借筆不遂猛投訴,另一間航空公司飛快出post,提醒去旅行記得帶筆,講速度,贏晒。
快都未夠,玩實時行銷,都係想引發網民共鳴,在最短時間提升engagement rate,為品牌/產品營造良好形象。故此抽水熱事最好與品牌和其出品有關,切合品牌個性,凸顯公司宗旨,否則,予人「夾硬嚟」的感覺,對提升企業形象無甚幫助。好像去年的娛樂圈「安心出軌事件」,各路人馬抽到太平洋都乾,連屋宇署都將「壞咗嘅人」twist成「壞咗嘅樓」,卻惹來非議,認為政府機構不宜將快樂建築在別人痛苦上云云。可見,抽水須幽默有創意得來又有taste,頗考內容行銷寫手的功力。譬如,想抽#兩盒thx的水,當然不是口罩生產商的專利,凡產品有盒裝的皆可玩,再配合推廣活動,買兩盒XX送XX,諸如此類,把握營銷機會之餘,更要本着真心好意,萬勿令人聯想到「吃人血饅頭」。
▪ Digital Marketing入行攻略﹗全方位盤點數碼營銷五大職能:分析與創意缺一不可
至於另類熱搜關鍵字#3萬thx(3萬是指警察人數)、#香檳等由來和背景資料,有些網民為何有那些反應,你懂的。一旦牽涉到政治,以及宗教、種族等容易「各持己見,各有理據」的議題,抽水變得敏感得多。那麼,關乎政治的都不能抽?非也。有些品牌就是愛踩界,或開宗明義支持某團體、某理念、某經濟圈,自然大無畏。以#香檳來說,網民玩得興起,一般商業機構又豈會去挑戰,遑論從中製造市場營銷機會!
此文章由原作者及Jobsdb HK撰寫/編輯。如欲刊登於其他網站或刊物,請電郵至[email protected]與我們聯絡。如有發現侵犯版權,原作者及Jobsdb保留採取法律行動的權利。