地盤佬日誌—入地盤做慢慢學到的奇妙特殊技能

Jobsdb content team – updated on 18 December, 2021

入咗地盤，除咗自己範疇個啲一定要學嘅專業嘢之外，做耐咗之後，就會自然學埋啲奇奇怪怪嘅特殊技能。

地盤語言

地盤語言從來都不缺少嘅一部分就係粗口，有啲地盤佬講嘢可以係撇除粗口之後，係咩內容都無。入地盤做得耐多數講粗口講到呼吸一樣咁自然，不過多數地盤佬都盡量唔提人母親（因為提人母親多數都會打交），慢慢同人傾偈時可自動過濾粗口（內容都過濾埋）。

都見過有啲地盤佬平時同佢講嘢句句都係粗口，但係一同家人講電話可以立即改線路，一個粗口都無，真係犀利！

▪ 地盤佬日誌—地盤最重視嘅節日

▪ 地盤佬日誌—為咗工程你可以去到幾盡？

地盤衛生

地盤嘅衛生可以話係所有行業裏面最差嘅一批。一般正常人都會怕老鼠，但係因為個個地盤都一定有老鼠，所以好多地盤佬見到老鼠行過都可以無視老鼠，不過做地盤寫字樓嘅，最憎係老鼠食我哋啲零食。其實佢哋食唔緊要，最憎就係佢哋每一袋零食咬開一個窿，試過有錢買幾百蚊零食放喺個櫃度，第二日返嚟每一包零食都比老鼠咬咗個細窿全部都唔要得。

地盤衛生嘅另外一個大問題就一定係廁所，通常地盤寫字樓嗰個廁所係全地盤最乾淨嘅（同外面啲廁所比唔一定乾淨）。不過正常淨係比白帽用，其他工人只可以用嗰啲藍色化學廁，用過外面化學廁嘅人都知道化學廁通常都比較臭。不過地盤嘅化學廁絕對俾你一般見過最臭嘅廁所臭一百倍，見過最誇張嘅堅果裏面嘅屎山高度差唔多去到膝頭哥。另外有一個地盤傳說（可信性99.999%），就係地盤裏面每一個牆角都會有人屙過屎或者屙過尿。

▪ 地盤佬日誌—停工

▪ 地盤佬日誌—風水輪流轉

刻板印象

一般人對地盤佬嘅印象就係污糟、好賭、雞蟲。

污糟：做得地盤工作環境一定係污糟，不過依家多數地盤佬放工都會換返件乾淨衫，如果個地盤有得沖涼，佢哋都會多數沖埋涼先走。同以前比已經算係乾淨咗好多。
好賭：傳說中每個地盤都會有秘密架步，裏面會有十三張同牌九檔口（我係唔知牌九係點玩），傳説有啲師傅五分鐘輸一兩個月人工。不過可能因為我係白帽（大判或顧問的人），所以其實我係無真係見過人在地盤賭錢。
雞蟲：多數人覺得粗人多雞蟲，傳說當年東莞好多地盤佬，不過我無去過所以不能証實。聽聞依家啲雞樓（好多一樓一的大廈）樓下排去買羽毛球拍嘅多數都係白雪雪同西裝友，一睇就知唔係地盤佬。