地盤佬日誌－鬧人文化

地盤係一個鬧人文化好西利嘅地方，上家鬧下家、上司鬧下屬、師傅鬧新仔都係好常見。

我知道好多上上一代係日鬧夜鬧教人，所以好多上一代都學咗呢一套。不過時代進步啦唔好再一成不停。

鬧人真係有用？

我覺得好睇情況，有時好有用，有時係無咩用，有時係反效果。

反效果

有啲人鬧人係單純情緒發洩同吹毛求疵，對事情毫無幫助，純粹彰顯個人嘅地位同優越感。咁樣多數會有反效果，見過有人因為一份幾千字嘅文件打錯幾個不重要嘅字比人鬧足幾個鐘，見過有人係比人鬧到無晒自信啲嘢越做越多錯，我都真係有同事比人鬧到要睇心理醫生。有人比人鬧到要轉行。如果建築行業比到人嘅刻板印象係多人無理取鬧嘅咁又點會有叻仔入行，咁樣慢慢成個行業嘅質素都會越嚟越差。

正面效果

有時有啲嘢真係做錯咗，要去搵對方跪玻璃之前，如果夾定口供自己搵個人來被鬧，一入對家房就自己大大力鬧咗先。如果對方係善良嘅有時可以減少鬧我哋嘅機會。

有啲大錯誤例如做咗真係會加大死人冧樓，我同意有啲好原則性嘅，如果錯咗就真係應該鬧要令佢刻骨銘心。有啲錯真係不可一不可再。

鬧人有冇用有時都好睇鬧人頻率，日鬧夜鬧大家好快就聽唔入耳，個個當你唱歌。但係如果個個高層十年都唔鬧人一次，一鬧就大家都會好記得內容，好易一世都記得。所以有覺得鬧人係重質不重量嘅。

記得鬧人唔好係情緒發洩，要對事不對人。

▪ 張晨：「向那些狠狠鬧爆過自己的人，說句Thank You。」

▪ 地盤佬日誌-唔好惹地盤佬

此文章由原作者及Jobsdb HK撰寫／編輯。如欲刊登於其他網站或刊物，請電郵至[email protected]與我們聯絡。如有發現侵犯版權，原作者及Jobsdb保留採取法律行動的權利。