我做Marketing：做Marketing就一定要OT？

「你好，我做媽劇停。」

如果一位剛相識嘅朋友向你自我介紹，話佢做Marketing，你會即時聯想到啲咩？我相信好多人都會諗到「做Marketing一定要成日OT」。

普遍Marketer嘅工時的確較長，雖然係咁，大家都唔可以Take it for granted，要令自己OT得值得先至為重要。其實，Marketer要OT嘅原因，可以從兩個角度睇──Marketer自己同佢哋嘅上司。

------

下屬OT愈多 = 工作表現愈好？

好多人新入職一間公司，希望搏表現、搏升職，就諗住以OT換取上司同事嘅認同；又有啲人身處一間擁有「濃厚OT文化」嘅公司，早過夜晚八點放工就仿佛係一種罪孽。群眾壓力大到令人唔好意思放工。

OT可以係其中一個指標，話畀人知你有幾勤力，但OT過後，上司仍然要以你嘅工作質素，去判斷你係咪勝任更多重責；或者，你係咪用過多時間去處理一項工作。有啲老細甚至會覺得下屬經常OT，會顯得自己管理不善。請記得，OT只係你做好工作、挽回工作效率嘅手段，而唔係你工作表現嘅指標。請勿本末倒置。

為自己喺OT時段設下工作目標，專心一致做好急務（唔好「見一樣做一樣」），可以令自己嘅OT時間捱得更值得。如果OT只係為咗吹水、講是非，你原本嘅私人時間就實在用得太奢侈。

初入行Marketing嘅朋友，亦請做好心理準備，經常要花時間處理其他部門嘅「瑣碎事務」，因為Marketer係好多同事心目中嘅「Problem solver」。小至PowerPoint設計、尋找印刷廠聯絡方法，大至同Sales一齊出去見客做Present，好多同事都會搵Marketer幫忙。「通識」可算係Marketer喺辦公室內其中一項優勢。

人在職場，「幫得人多，自得『人』庇佑」雖然未必時時適用，但至少，喺你能力同合理工時範圍內幫到同事，亦可以為你贏得一點人情。到你需要協助時，呢啲人情有可能可以為你打開一道方便之門。

------

上司「唔好蝕底」嘅心態

好多上司分配工作時，經常會喺Email上加一個「Urgent」，務求令下屬更為上心，希望加快佢哋交貨嘅速度。但如果上司濫用「Urgent」，大部分工作都話要即刻處理，咁下屬又可以做邊樣先呢？隨住上司愈用得多、愈用得密，「Urgent」呢個字嘅威力亦會貶值。同時，上司嘅威信亦會遞減。

好多上司經常抱住「唔好蝕底」嘅心態，要求下屬樣樣去到盡、OT到盡，但亦因為咁，佢哋同下屬嘅緣份亦會提早耗盡。經常要求下屬長時間工作只會加快消耗佢哋嘅意志，到他朝一日佢對呢份工作嘅熱誠跌至零，決定另謀高就時，上司要再請人、再花時間培訓新人，只會更加費時失事。

上司應該同下屬老實說明各項工作嘅真實Deadline，並說明要求及每一項工作背後嘅目的，令下屬同樣擁有「Big picture」，減少遞交不合心意工作嘅機會。

上司更應以身作則，向下屬顯示適當工作心態，例如無特別工作需要處理時就準時離開公司，放假、非Office hour就盡量避免WhatsApp同事傾公事（閒聊亦可免則免），以免為下屬帶來不必要壓力。

------

其實，你仲記唔記得咩叫OT？

每晚做到9點後先返屋企已經係好多人嘅生活習慣。慢慢，我哋開始忘記咩叫OT，就算OT咗都唔再覺得係Overtime，因為OT已經不知不覺咁融入大家嘅生活。

如果想留返多啲時間畀家人、朋友同自己，大家不妨檢討一下自己OT時嘅工作效率，再問自己一句「我今日究竟為咩而OT？」。

此文章由原作者及Jobsdb HK撰寫／編輯。如欲刊登於其他網站或刊物，請電郵至[email protected]與我們聯絡。如有發現侵犯版權，原作者及Jobsdb保留採取法律行動的權利。