【職場關係】新人被孤立、辭職遭杯葛？食lunch慘變職場欺凌現場 拆解5大困局KO欺凌者
打工仔努力搏殺，為口奔馳，一到食晏時間總想食餐好，兼利用一個鐘充電養神。可是lunch飯局在職場上是一個充滿人性試煉的場合，有時更會演變成職場欺凌的場口，三五成群物以類聚講是講非已是必然，非我族類者定或被同事孤立或杯葛，慘成「獨家村」。以下五個真實個案，你又有冇類似經歷？置身當局嘅當事人又會如何拆解這場lunch危機？
個案一：排斥異己 鞏固勢力
A經理同B經理隸屬同一個部門，有一群共用下屬，B比A後期加入，卻深得老闆歡心，A對B一直好妒忌。為免失勢，A每週有幾日約埋所有部門下屬外出食lunch，唯獨唔約B，A的目的顯而易見，存心搞小動作同下屬拉關係，亦有心令B有感被同事孤立而難堪。如果閣下係B，你會點做呢？
返工孤獨指數：***
應對策略：不介意蝕底 主動加入破離間計
話晒係經理級人物，B一早挑通眼眉，看穿了A的動機，每週間中一日，趁A與同事外出食lunch，B主動表示想加入其中，A當然無法拒絕間中一日的要求，唯有扮大方表示歡迎，B會主動發掘多些共同話題，有時唔介意早點「攞位」、諗多幾個食lunch好地方，令A氣在心頭。B之所以咁做唔係存心同A鬥，而係唔想落入佢嘅離間計。A眼見B表現大方得體，自己嘅「苦心」無法如願，加上老闆繼續對B寵愛有加，職場欺凌失敗告終，最終感到冇癮要大方接納B。
▪ 職場麻煩友總在身邊！3類難搞同事好難頂 必學拆解招數免衝突
▪ 向職場欺凌說不！5招應對同事中傷、上司打壓 報復非最佳方法
個案二：新人慘被同事孤立
呢個係經常發生嘅案例。C小姐加入一家小型廣告公司做AE，全公司都是清一色女同事，晚晚開OT開通宵，長期怨氣沖天，老闆又惡頂，大家務求少做少錯，自己顧自己。C返新工的第一天，除老闆秘書外，一個同事都冇主動同佢打招呼，氣氛崩緊。C於是主動邀約她們食lunch，班女同事面露不悅之情勉強應承，可是到飯局之後，C於茶水間聽見班女同事以不客氣的口吻說：「C想扮friend扮好人？搏咩呀？一睇就知佢得呢兩下板斧唔會掂啦！」即使 C笑面迎人，女同事也賣力地孤立唔理C。徬徨無助的新人C，究竟會點做呢？
返工孤獨指數：*****
應對策略：忍辱負重 不被惡勢力折服
職場新人是辦公室小圈子最易拉攏或排擠的對象，好多新人都遇過職場欺凌，一個忍唔住氣，新人隨時因不友善工作環境而走人。不過在上述個案中，C一直對住班女同事展現友善態度，就算內心如何委屈，都不忘保持謙虛有禮，被同事孤立後仍主動向她們伸出援手。忍辱負重三個月後，舊人開始對C逐漸改觀，合作過程開始變得融洽順暢。所以職場上都有守得雲開，最重要是心態要正向，不要輕易被惡勢力折服，否則去到下一個職場，遇到類似事件都只能選擇逃避。
個案三：遭懷疑擦鞋上位 工作環境有毒
在大公司擔任中層的D明明同同事關係都算融洽，但因為一次在大會上發言支持上司的方案被懷疑有心擦鞋上位，從此隊友開始有意無意地疏遠他，甚至連一向歡快的lunch時段都靜靜地避開他，D發現同team同事會先假裝前後腳上洗手間，某次撞破他們相約在公司樓下大堂等候，大家尷尬互望，心照不宣。
返工孤獨指數： ****
應對策略：向toxic職場講拜拜
D的後續發展跟前兩者不同，D本身已在該公司任職五年，作為中層，上下做人難，自己並非討好上司，而是以事論事，但尷於工作環境好toxic，同事齊心敵視上司，想客觀持平已不可能。D亦曾向上司反映問題，唯上司太自我中心，不重視同事間良好互動的重要性，最終D只能心灰意冷請辭另謀更好的發展。
▪ 職場新人勿觸碰6大話題—內部八卦、個人感情，和身材有關都不要提？
▪ 唔識拒絕工作要求？職場學懂4招Say No 圓滑地逐步擊退「熱情」同事
個案四：辭職後遭集體杯葛
正所謂天下無不散之筵席，職場上人來人往本是常事，偏偏有人就要「搞事」﹗擔任人事部小薯的E本來以為自己在公司人緣不俗，殊不知良檎擇木搵到下一份好工向現職公司遞信後，便迎來了職場生涯中最黑暗的一段時間。其上司在數番挽留E不果後，又情緒勒索她，指她明知條team嚴重人手不足，仍選擇在這時候離開，極不負責任，之後在漫長的一個月通知期內，昔日的好同事食lunch避開E，連日常招呼都不打了。
返工孤獨指數：****
應對策略：不搞對抗 微笑到最後
最後一個月雖然過得極艱難，但E總算領略到甚麼叫「分手後才見真章」，套用在職場原來都是一樣。E的應對策略很簡單，反正是最後一個月，她也沒有甚麼好怕，雖然一度擔心現職公司或會在reference check時使橫手，但她認為自己行事光明磊落，handover也做足，沒甚麼把柄落在上司手上。Last day前有同事提出要為她搞farewell lunch，其後卻不了了之，反而E為所有teammate都準備了精美的散水餅，她為自己可以離開虛偽又沒有人情味的團隊感到十分好彩，認為調節心態去面對才是唯一的解決方法，且要確保自己笑到最後，以優雅姿態離開。作為HR一員，E認為搞對抗、玩遲到、請病假只會帶來一時之快，對自己的前途亦未必有利。
個案五：從來唔join lunch 團隊中欠存在感
一個人獨家村食lunch，有好有唔好。在一間公營機構做admin的F就是例子，F是文靜型，而且份人比較慢熱，很少主動同同事攀談，更遑論交際，起初F都覺得獨來獨往幾好，但慢慢發現同事靠lunch建立感情及小圈子默契，自己久而久之好像成為了團隊局外人，工作間大家對自己客氣生疏，甚至開會時F也覺得自己難以插嘴或發表自己想法，彷彿自己是一個透明人一樣沒存在感。
返工孤獨指數：*****
應對策略：靠節日飯局打破僵局
面對同事非刻意排擠，卻又築起無形的壁壘，F不知如何打破僵局。適逢團隊搞團年飯聚會，F於飯局中主動為左右位的同事們斟茶，當日也未有如昔日一般抗拒分享個人事，努力融入大家的話題，漸漸與同事關係有所緩和。F認為自己較幸運，同事們並不是八卦好事之徒，之所以沒有邀請她食lunch，是因為F拒絕過幾次，同事認定F不想與大家午膳，於是便沒有再邀約。F經驗之談是不要老是以為自己被排擠，有時可能是自己不夠主動或性格內向慢熱累事，寄語如有類似經歷，一定要把握大圍飯局機會，努力融入，即使只做聆聽者，大家都會感受到你的善意和尊重。
以上個案只是冰山一角，無論你遇到甚麼難堪的職場欺凌又或「被同事孤立、排擠」情況，都要表現得大方得體，不卑不亢。只要待人接物誠懇兼有量度，對人對事問心無愧，便不必在意這些無聊的低級遊戲，更不必因此而貶低自己，正所謂「道不同不相為謀」，退一步想，如果與同事真的「性格不合」，其實自己食飯仲自在啦！
此文章由原作者及Jobsdb HK撰寫／編輯。如欲刊登於其他網站或刊物，請電郵至[email protected]與我們聯絡。如有發現侵犯版權，原作者及Jobsdb保留採取法律行動的權利。
