話說餐飲行業越來越難請人,但做過餐飲同Office工嘅小二我,卻深深愛上做餐飲,除咗日日有乞客帶畀我無窮歡樂,其實仲有好多因素令我對餐飲業不離不棄嘅。
做餐飲行業嘅人普遍都直腸直肚,你做錯有問題都會立即出聲,大家齊齊落力炒檔(即係超忙)。On floor嗰幾個鐘,邊個懶、唔做嘢,實畀人鬧到無倫。就算真係嘈咗交,冧檔過後大家又圍威喂一齊飲杯酒、食個宵夜,第二日乜事都無。如果真係有唔鐘意嘅同事,你自己做好自己就無問題,好少話會畀人害到你啲乜(最多害你落錯單?哈哈)。
但係喺Office做事,真係好少可無辦公室政治。公司越多老屎忽就越麻煩,個個都各懷鬼胎,呢個阿姐又同嗰個阿姐唔啱,呢條Team又同嗰條Team鬥緊。有次我同其他Team同Lift,竟然畀我阿姐話做乜同人同Lift,好鬼攻心計同傷腦筋。
雖則餐飲行業都係每日做重重覆覆嘅工作,但係你可以每日接觸到唔同類型嘅客人,佢哋令我發現自己識嘅嘢實在太少。
有一個外國伯伯係我哋餐廳嘅熟客仔,我一直都唔知佢做乜,直到有一日佢話我知佢要離開一排,返美國參加展覽,我先知原來佢係有份參與製造世界第一個有公民身份嘅機械人Sophia㗎!剛剛喺世界上瘋傳嘅事,原來喺我身邊呢位伯伯就有份搞出嚟,你話個世界細唔細。
另外一個令我最深刻嘅故事係,最近有位喺香港住咗幾十年、喺戒毒所工作嘅外籍熟客帶咗兩位朋友嚟。呢兩位朋友同我講,外籍熟客係佢哋嘅救命恩人。佢哋以前係九龍寨城嘅毒犯,嗰度無王管又危險,如果無佢嘅出現,佢哋兩個都唔知死咗幾多次。當然而家兩位都已經洗心革面戒晒毒啦,單睇外表真係唔知佢哋兩個曾經經歷過咁多生生死死。
相比之下,做Office嗰排我每日只係期望放飯同收工,成幾個月都係對住同一班人,做埋一啲重重覆覆嘅文書工作,真係悶都悶死。
Office工嘅例假放親都係全世界一齊放,條街真係逼到仆親呀。至於做餐飲就大多數都係平日放假,食飯唔使等位,買嘢唔使排隊,想靜靜地行個街真係Easy job。返工唔使日日神咁早起身,鍾意又可以返夜更做吓夜鬼。最最最緊要嘅係:放假就放假,無咩Project、Email要跟要覆。係!做餐飲陪家人嘅時間少咗,但有大大個藉口可以推晒啲親戚飯局同無聊朋友聚會,真係爽YY㗎。
有人可能又會覺得做餐飲行業工時好長,分分鐘一星期得一日假放,唔似得Office咁朝9晚6,週末又有兩日假喎!但係返Office其實都好慘情,無乜機會準時收工,唔OT又畀人話你無嘢做,OT又畀人話你做唔掂,最後又要跟大隊,死都要『扮吓工』,遲一、二個鐘先走。相反,喺餐廳如果你肯幫手捱埋個炒檔自願OT,經理捉住你嚟錫都似,兼職計鐘實有錢收,長工又會補鐘請嘢食。
不過都係嗰句啦,揀一份自己鐘意嘅工作係好重要㗎!如果日日做嘢都唔開心又無辦法解決,不如一試裸辭,等自己散散心再重新出發啦!
店小二Mary
90後大學設計系畢業,任職餐飲接近10年,初初做飲食純粹玩吓做吓炒散,到試過做office工,反而鍾意做返侍應。10年嚟serve過唔少經典麻煩客人,故開設FB專頁「乞客 The Beggar in the Restaurant」分享餐廳搞笑事及職場嘅各種心酸屎。 |
此文章由原作者及Jobsdb HK撰寫/編輯。如欲刊登於其他網站或刊物,請電郵至[email protected]與我們聯絡。如有發現侵犯版權,原作者及Jobsdb保留採取法律行動的權利。