大學畢業幾年,邁向三十歲的關口,呢個人生階段最普遍嘅一種感覺,就係患得患失之感。
十八歲的自己沒有帶錶,不過有時間,而且還有滿腔熱血與理想。幾年過去,大學畢業,從前的同窗都在社會各奔前程,對前途焦慮卻又充滿希望。運氣稍差的可能起薪才不過12k,而準備充足又有一點「搵工緣」的,則可能上試20k。考紀律部隊督察或成為投行及專業人士的,更有機會上望40k。
對於二十一歲的小伙子,其實無論12k定20k都無咩分別,而對於40k的「天之驕子」的差距,亦有信心有一日可以追回來。
------
然而,幾年過去,猛然發現人與人的差距正不停在擴大,而且彷彿已經貧者越貧,富者越富。
例如,那些一畢業已經考督察的,30歲前幾乎已經肯定成為高級督察無誤,已經係帶領一條Team的警官,月入超過6萬。做專業人士的,亦已經在中環的玻璃門職場,一步一步晉升成為一個小經理,所謂「升M」,據說花紅連底薪已經直逼百萬年薪。
舊同學聚會,從前特別「爛玩」、成績同操行都十分麻麻的某某,開了一輛寶馬赴會。原來雖然讀唔成大學,但佢幾年前創辦的「新經濟」公司,本來大家都以為只係幫人管理吓Facebook Page或者搞下街頭推廣活動之類的「手板眼見功夫」,卻早已經上晒軌道,幾年來接了唔少大客,甚至不乏上市公司與跨國企業。請了十幾個全職員工,甚至已有報紙專訪報導,公司年營業額已經突破千萬大關。眼前的舊同學,從前經常被學校訓導老師「關照」罰留堂,如今雖然亦只係穿著潮T與牛仔褲,但一舉手一投足,卻倘如商界的明日之星。
這些「人生勝利組」雖然多年無見,甚至以前同班時其實亦不太熟悉,如今卻惺惺相識,席間彷彿有著無盡話題,談論著商機與經濟趨勢,同時亦不忘互相祝賀對方在各自領域的成就。
當他們忙於交換卡片之際,其實仲有「沉默的大多數」,幾年過去依然在社會載浮載沉,收入維持在12k每年加5%複合式。或者,更可怕的是,呢個差距甚至同讀書成績無明顯關係,碩士畢業都可能係呢個12k例子,而讀書差的分分鐘先係最「有本事」嗰位。
畢業不過幾年,差距已經如此巨大。再過幾年,又係怎樣一個光景?簡直不堪設想。
------
話人生係一場大賽跑,其實不為過。畢竟,尤其喺2018年的香港(甚至全世界的大城市),收入兩極化,資產價格卻穩定地不停破頂,意味著泡沫嗎?遺憾地,可能此並非泡沫,而係全球一體化以及科網革命下,有能力乘著呢個浪潮的人從中獲取巨大利潤與利益。但假如你食唔正條水,則只能眼巴巴地看著自己的工作被更低成本的人或電腦取代,以及仰望不停上揚破頂的樓價。
簡單來講,社會上確實係有人搵到好多錢,而且大有人在。
呢個年代,社會早已容不下平凡人。好似最近大熱的《食雞》手遊,玩家要拼命留在「圈」內以免遭淘汰,而個圈又不停收縮,最終只有強者中的強者,可以留到最後。要留喺社會的「收縮圈」內,其中一個方法可以係投資有道,買中高增長、優秀企業團隊的公司股票,讓錢繼續幫你搵錢,即使自己資質與經歷,令自身未能直接參與這些高增長的行業與公司。
------
無論你接受與否,時間一直溜走,再也不回頭。無論你能否成為下個李嘉誠,其實呢個唔重要,畢竟唔係每個人都要以發達為目標。更重要係你是否已經看清「呢個年代」呢四個字。因為,呢個年代爭分奪秒的變化,同過去大概50年相對穩定的經濟模式,確實係有差天共地的分別。以前行得通的路,呢個年代可能已經此路不通。所以話,唔係話一定要發達,但起碼,要行條行得通的路。則同齡人之間的差距,亦可以控制在一個健康範圍內。
正如國學大師王國維的《人間詞話》所講,要做大事,首先要經歷「昨夜西風凋碧樹,獨上高樓,望盡天涯路」的階段,睇清楚究竟呢個世界係一個點樣嘅世界,從而作出相應的計劃,方為上策。
人生要活得好,談何容易!希望大家都可以多思考、多努力,搵到屬於自己的一條好出路,過上心目中的生活。
StealJobs.com主編──SJ
全面透露各行各業入行攻略,上位貼士,以及行業秘聞。
|
延伸閱讀:
此文章由原作者及Jobsdb HK撰寫/編輯。如欲刊登於其他網站或刊物,請電郵至[email protected]與我們聯絡。如有發現侵犯版權,原作者及Jobsdb保留採取法律行動的權利。