地盤佬日誌:有汗出,要有糧出

地盤佬日誌:有汗出,要有糧出
Jobsdb content teamupdated on 15 December, 2017
Share

大家喺新聞上面,不時都會見到地盤佬被欠薪,搞到要堵塞馬路或做其他激進行為。我諗同其他行業相比,地盤佬(藝術家都係)被欠薪嘅比率應該係全港之冠。


欠薪對工人影響有幾大?

一般情況下,多數師傅都會在欠薪半個月至一個月時開始追薪,不過一開始追嘅力度通常唔大,之後到欠薪幾個月先會加強力度去追。雖然的確有啲地盤佬係打緊風流工,但係其實多數師傅都係搵朝唔得晚,要佢哋冇糧出幾個月真係好影響佢哋同埋佢哋嘅家人。聽過有啲師傅因為俾人拖糧,搞到全家要周圍搵人借錢開飯,或者仔女無錢買新學期嘅書等等。


點解會咁多有汗出,無糧出?

首先要講下香港嘅建築行業係點。首先業主(發展商)判畀大判,大判判畀二判(有時有三四五六判),之後再判畀炒家或搵蛇頭(炒家係啲三幾個人組成的小分判,蛇頭就係搵工人去做的中介人)去搵工人。經過咁多層嘅分判,是但一層走數(走佬),之後佢下面啲工人就好易有欠薪問題。


點解次次都要搞到上新聞?

地盤佬欠薪有分兩種,一種係畀炒家或蛇頭食夾棍(走數),因為多數搵唔到個債主,所以通常都追唔到或冇得追。

第二種係分判拖下家數(小判頭),拖到下家都頂唔到數、出唔到糧畀工人。遇上呢啲情況,就會成間公司所有工人一齊出嚟示威追糧,因為咁樣做多數會吸引到記者嚟採訪(無人採訪嘅示威係冇用呀),亦會吸引到大判或發展商嘅注意。多數大公司都比較注意形象(雖然有啲都係唔要面㗎啦),就會對分判施壓,或先墊支畀工人,所以好多人都覺得唔上新聞就追唔到糧。


點解決?

其實而家有部份發展商或大判,只要工人有返工就必定有糧出,依我觀察所得佢哋嘅建築品質都比其他公司好,所以其實出足糧都係一個雙贏局面。但呢個世界點都有啲急功近利,或為世所迫唔出糧嘅老闆,以而家嘅法例嚟講又好似冇佢哋辦法(有限公司執笠就搞掂);但係我覺得其實政府係有方法對付佢哋,例如有欠薪問題未解決嘅地盤,就唔俾佢出入伙紙,或者停佢政府工程投標。


良心工程

其實做完嘢,收到應得嘅報酬係天經地義。希望各位高層同老闆將心比心,本着良心做人,出足糧畀工人。

 

港夫‧李奧

 

香港土生土長,近年來移居澳門,一個熱愛畫畫的地盤工程師。開立了facebook page「港澳小不同」,通過圖文來與人分享我心中所想。

檢視此作者的所有文章

 

延伸閱讀:

地盤佬日誌:新。地盤佬

地盤佬日誌:風雨飄搖中的地盤佬

地盤佬日誌-工程師轉工潮 

此文章由原作者及Jobsdb HK撰寫/編輯。如欲刊登於其他網站或刊物,請電郵至[email protected]與我們聯絡。如有發現侵犯版權,原作者及Jobsdb保留採取法律行動的權利。

More from this category: Career development

Browse top search terms

Did you know many candidates preparing a resume also research their industry by exploring top search terms?

Subscribe to Career Advice

Get expert career advice delivered to your inbox.
You can cancel emails at any time. By clicking ‘subscribe’ you agree to Jobsdb’s Privacy Statement.