想進修做言語治療師 呢幾樣嘢你要知

想進修做言語治療師 呢幾樣嘢你要知
Jobsdb content teamupdated on 10 January, 2018
Share

出社會工作咗幾年,唔少80後、90後朋友仔都考慮緊應唔應該讀返個Master,增值自己。除咗學歷上Upgrade,當然更希望人工都有得Upgrade啦!今次小編就專訪一位靚女言語治療師(Speech Therapist)Mabel,分享吓言語治療係做啲乜,同埋呢一行前景會係點啦!

靚女言語治療師Mabel背景:Degree讀英文系,做咗兩年英文報紙記者,之後喺教育大學修讀言語治療Master。 510x120-v1



純粹想轉行?報Master前要諗真 

其實邊啲人適合讀言語治療呢一科呢?Mabel話報讀呢個Master嘅時候,原本以為會有大部分人同自己一樣,都係Degree主修英文,後尾發現原來唔係。

「當時三分二嘅同學係讀心理學Degree出身,佢哋對自閉症、過度活躍症比較熟悉。因為佢哋讀完心理學之後,並唔係即刻可以做心理學家,而係要再進修;當中有啲人對言語治療好有抱負,所以就去進修喇。亦有部分同學曾經做過幼兒教育,訓練啲自閉症學生或者小朋友要點樣跟社會規則去同人相處,當中會涉及一啲言語治療,自己又有興趣,於是就嚟讀。」

除此之外,仲有少數原本讀工程,或者其他完全無關係嘅Degree,純粹想轉行嘅同學。「老實講,讀到中途發現自己跟唔到而退學嘅同學仔都唔少,呢一科都幾難畢業!」

立即搜索熱門新工

導師

職業治療師

物理治療師



言語治療好多種 唔只口吃咁簡單

取得Master資格嘅Mabel,而家喺中小學校工作。佢嘅工作內容唔止好似《The King's Speech(皇上無話兒)》咁,只係幫人治療口吃,而係提供好幾種唔同嘅言語治療服務。

「我主要接觸四類有語言問題嘅學生,第一種係理解有問題、表達有問題,或兩者都有問題;第二種係咬字發音有問題,當中最常見嘅係學生咬住脷發出『蛇仔音』;第三種係沙聲,好多小學生唔識用聲,好大聲咁大叫,就會沙聲;第四種係口吃。」

Mabel話,每次見到學生有改善,就會覺得好滿足。「最開心嘅係,曾經有一個學生發唔到『家』嘅『g』音,變咗『d』音,即喺『家庭』講咗『da庭』;或者『一張卡』講咗做『一張噠』。經過一年嘅訓練,佢終於學識點分條脷嘅前同後,搵到正確發音嘅位置。能夠幫到佢哋,佢哋開心之餘,我都好大鼓舞。因為改善咬字發音之後,學生喺學校嘅校園生活都會變得開心好多嘛!」

▪聽障人士工作盡責 不輕易離職

▪學好英文要靠NET?香港的英語老師不只聘請外國人,雙語人材更有優勢



實習大壓力 早入行有著數

就咁聽,好似返工都幾開心喎!Mabel話都算過咗最辛苦嘅時候啦,因為做緊學生嘅時候,出實習真係超級辛苦。「嗰時真係好大壓力,尤其是出醫院嘅實習係最辛苦嘅!當時大家只係上咗一年多少少嘅堂,學咗嘅嘢都唔多,又未消化晒啲知識,應付實習個案真係好吃力!另外,言語治療師嘅工作亦包括幫吞嚥有困難嘅病人解決問題,呢個問題生死攸關,啃親真係好大件事,因為食物會跌入肺部,更隨時有可能會死!真係好大壓力!」

至於呢行嘅前景又係點呢?「呢個問題我自己就唔畀意見啦,不過我知同行有兩種睇法。部分人覺得係正面嘅,因為無論係老人院定幼兒,香港都好需要言語治療師。而另一方面就有人提出,現階段根本無乜機構有資源去開位,即係社會有需要,但係無就業機會,可能造成畢業生搵唔到工嘅情況;要等政府推出政策,撥款支持先會有穩定就業機會。」

「另外一個隱憂係,除咗香港大學本科有一科係讀言語治療之外,仲有教育大學、理工大學,同埋2019年中文大學都會開言語治療呢一科。假設中大讀兩年,2019年收生,兩年後2021年,就會有四間大學嘅畢業生,假設每間大學有30至40個言語治療師畢業,2021年時,每年都會有至少120個新言語治療師。就咁睇,呢一行競爭力會愈來愈大,或者會出現好似而家老師供過於求嘅情況。」哦,如果睇返呢個數字,早啲入行應該係有著數啲嘅!

 言語治療師工作簡介: 

  • 提供專業的言語治療和諮詢服務
  • 為有特殊學習需要兒童提供評估、治療及訓練
  • 為患有認知障礙症之長者提供言語治療服務

延伸閱讀:

[行業秘聞]精神科護士大剖白:先要過三關

[行業秘聞]了解Content Marketing第一課

香港撈IT之你睇我好,我睇唔到!

 

此文章由原作者及Jobsdb HK撰寫/編輯。如欲刊登於其他網站或刊物,請電郵至[email protected]與我們聯絡。如有發現侵犯版權,原作者及Jobsdb保留採取法律行動的權利。

More from this category: Industry stories

Browse top search terms

Did you know many candidates preparing a resume also research their industry by exploring top search terms?

Subscribe to Career Advice

Get expert career advice delivered to your inbox.
You can cancel emails at any time. By clicking ‘subscribe’ you agree to Jobsdb’s Privacy Statement.