想有正職以外收入？打工仔4種Part-time副業 秘撈要注意呢啲
聽聞有啲打工仔平時返工，有三分一時間係做緊公司嘢，三分一時間同同事傾無聊嘢，仲有三分一時間係做緊私人嘢，訂飛睇戲Book枱食飯同淘寶統統都重要，小編點會唔明。喺呢個Slash時代，部分打工仔更加充分利用時間秘撈做Part-time，增加額外收入。如果打工仔有時間，又想賺多少少錢去多轉日本，可以做乜好？咁就要睇睇你屬於以下邊類打工仔啦！
炒散行情最新最快﹗
兼職、短期工、臨時工、Freelance，自選工作模式，最新空缺情報盡在此﹗
醒目食腦型：開網店
呢一類型打工仔轉數快，緊貼社會最新動態同潮流，最啱做網店店主，只要份工可以用電話，打理網店就唔成問題啦。近年Facebook、IG、拍賣網、淘寶等網絡平台愈來愈多，人人都可以開Account做店主，同時物流配套包括快遞公司同智能櫃普及化，完善嘅配套造就一個網店黃金年代！
講一個成功例子畀大家知，前排有個醒目OL學完點整月球燈，就試吓將個燈放喺蛋糕上面，點知一炮而紅，每個蛋糕賣幾百蚊，銷情好時都賺唔少呀！無心機整蛋糕嘅打工仔唔使灰，只要你有腦，總會諗到好橋嘅；有好題材又可以試吓拍片做KOL，隨時殺出一條血路。
專業知識型：做導師
有一技之長嘅打工仔，就最啱做導師啦！有返咁上下學歷嘅話，可以去做私人補習老師，好處係毋須簽合約，只要同家長協商好時間就得，時間上比較彈性，收入亦唔錯。不過如果上門補習，而學生屋企偏僻，來回時間長就唔抵啦。
另外，如果打工仔身懷特技，更加可以去做各種樂器、球類運動等嘅導師，唔使浪費畢生所學。如果唔想教小朋友，都可以針對近年運動風，專門教人健身、瑜珈、開跑步班。或者你嘅特技係插花、做手工皂、攝影、畫畫、西洋書法，甚至係天文觀星，都可以用坊間嘅中介App或網頁搵學生。不過前提係享受教學，否則呢份秘撈都唔啱你啦！
才華洋溢型：做Freelance
有創意嘅打工仔，絕對唔驚無秘撈，坐定定做Freelance就最爽啦！從事媒體工作嘅人包括記者、編輯、攝影師、平面設計師、翻譯等等，都係才華洋溢型打工仔；而文字工作嘅好處係，只要有電腦、有Idea就可以開工，時間地點完全不限，打開個Word就做得，做緊正職定秘撈，Who knows？
要接Job，先要有人脈。小編有個做開飲食版嘅記者朋友，佢又識人做食評平台，於是就搵佢幫啲新餐廳寫食評，寫兩、三篇稿，每個月平均賺到三千蚊！至於平面設計師、攝影師都係一樣，如果同舊公司關係好，做生不如做熟，隨時轉咗工都繼續有Job做。所以幾時都話，識人好過識字呀！
多勞多得型：時間換金錢
仲有一種勤力打工仔，返工時間畀老闆「目及」到實一實，或者忙到電話都無時間睇，就係多勞多得，以工餘時間換金錢型。呢一類型打工仔最啱做一次性嘅炒散工作，例如展覽Helper、派傳單、侍應、活動推廣員、售貨員等等，工作一完結就有糧出！不過炒散工作始終無任何福利，而且遇上不良中介仲可能被拖糧，打工仔要打醒十二分精神啊。
講完咁多生財渠道，小編都要提提大家：有啲公司嘅僱傭合約要求兼職要先申報，或禁止違反公司利益嘅兼職，被發現有機會被炒、賠錢、甚至要被人告；有啲秘撈（例如炒黃牛或傳銷）更加可能觸犯法例。打工仔秘撈前要諗真，睇清楚合約內容並小心衡量風險，千祈唔好被捉到痛腳啊。
圖片來源：
逃げるは恥だが役に立つ/TBS | SLAM DUNK/テレビ朝日 | 我和殭屍有個約會/ATV | バンビ〜ノ!/日本テレビ
此文章由原作者及Jobsdb HK撰寫／編輯。如欲刊登於其他網站或刊物，請電郵至[email protected]與我們聯絡。如有發現侵犯版權，原作者及Jobsdb保留採取法律行動的權利。
