搵工係生命中最令人沮喪的過程
返工真係好辛苦。但係其實計我話，搵工仲辛苦。
1. 份份工都話要有工作經驗。但係我冇工作經驗。邊個可以畀經驗我？
2. 點解我搵唔到工？因為我冇經驗。點解我冇經驗？因為我搵唔到工。
3. 點解三大神科嗰啲未畢業，份CV已經寫到好似有10年經驗咁？
4. 點解網上畀畢業生用嘅CV sample，份份都寫到好似有10年經驗咁？
5. 點解HR連揀intern，都要揀返之前有internship經驗嘅學生？
6. 點解隔離個唔讀書嘅同學，只因為阿爸阿媽識人，所以就可以直入大公司做MT？
7. 點解entry level都要兩年經驗？咁冇經驗嘅工叫咩？其實佢哋係咪唔識entry呢個字點解？
8. 點解獵頭公司refer畀畢業生嘅工，10份有11份都係sales job？（但個title會叫做marketing或者business development呃你去見）
9. 然後要睇住朋友一個一個咁攞到offer。
10. 點解一份工要10年經驗、碩士學位，人工只係得一萬蚊，仲低過洗碗阿姐？
11. 點解嗰啲人力資源顧問，成日要喺報紙度講大學畢業生人工得一萬蚊係好正常？
12. 終於搵到工捱咗幾年，想轉份好啲嘅工，但點解啲老細見你29歲已經嫌你老，唔夠精力同佢每晚OT到12點，所以唔肯請？
（網絡圖片）
13. 啲老細成日懶醒話一定要請在職人士，但係返緊工嘅人，同冇工返、冇飯開嘅人，邊個需要一份工多啲？
14. 既然你係都要搵在職人士，點解面試一定要喺返工時間？
15. 點解咁多老細一見份CV寫住「male」就見都唔駛見？
16. 知道係女人結咗婚有仔女又唔見？
17. 點解交咗份CV之後，又要再填多一份申請表，將CV入面嘅內容謄一次入去？
18. 啲HR最鍾意問：「你覺得自己5年／10年後會點？」大佬，你連而家請唔請我都唔話我知，我點話你知我幾年後會點？
19. 點解連出名嚴苛嘅日本公司，都會send返個感謝email畀不獲錄取嘅求職者；而香港公司就永遠要啲求職者痴痴咁呆等，要人哋24小時精神緊張到連廣告電話都唔敢唔聽，然後話：「總之8個星期冇通知就自己摺埋，唔好打嚟煩我，你問我都唔會答」？
失業同搵工，實在係一個高度磨蝕意志嘅過程（小編當然亦曾身受其害）。其實人天生本來就有唔同嘅起跑線，每個人條跑道嘅難度同際遇亦唔同，唔能夠相比。只要盡力跑好自己嘅路，無論結果如何，都能問心無愧！
圖片來源：WhatsCap、網絡圖片
延伸閱讀：
此文章由原作者及Jobsdb HK撰寫／編輯。如欲刊登於其他網站或刊物，請電郵至[email protected]與我們聯絡。如有發現侵犯版權，原作者及Jobsdb保留採取法律行動的權利。
