暑期工中伏實錄(4)：做服務業，就要先犧牲自我？
主角：小強，普通公屋仔，屋村中學摱車邊升到U，為人性格老實
經理：Tony，好食懶飛大隻講，點人做嘢最叻，自己就成日偷懶蛇王
地點：尖沙咀某中餐廳
JUPAS放榜，小強原本以為Degree無望，點知竟然符符碌碌入到U，開心到彈起。考慮到唔想再洗屋企人太多錢，就打算趁開學前一個月搵份工，賺少少快錢。聽朋友講做酒樓、酒店炒散，雖然辛苦啲，但就容易賺到錢，又可以隨時唔做。
行行吓街，見到有間食中餐嘅餐廳門口貼住請炒散，每小時$55，於是就膽粗粗入去問。經理Tony同小強傾計，都係問啲基本問題：「有無做過炒散？知唔知要做咩？怕唔怕辛苦？」
小強個人同昆蟲界嘅小強無得比，一啲都唔識搵窿搵罅搵位攝，直腸直肚毫無修飾咁答晒：「我未做過炒散㗎，都完全唔知餐廳點樣運作，但我唔怕辛苦，體力好又捱得……」最後，Tony好直接咁講：「你無做過炒散，人工就畀唔到每個鐘$55，得$50，咁就返朝十晚十，一個鐘食飯包餐唔計糧，齋做樓面嘢，OK？」小強腦海默默計數，如果一個月做22日，都有$12,100，夠洗幾個月，就直接答應。
細細間餐廳仔，梗係無簽約喇！第二日即刻返工。
------
小強一大早九點半返到餐廳，Tony吩咐佢先做傳菜，手指指簡單兩句就介紹完成場檯號，九秒九立即開工，然後到十點先去打卡。係人都明嘅，即係要硬食白做半粒鐘。小強就心諗：算啦唔緊要，都係幫吓手啫！
傳菜比想像中辛苦，一個方形大托盤擺滿三四碟餸，蒸魚碟仲要雙層碟，捧到小強隻手極度酸軟。趁未有菜上時，諗住係角落位揈吓手唞唞，Tony就會準時出現，發表偉論：「阿仔，我哋做呢行，無得偷懶㗎，一定要捱得打得，食客係上帝，要盡心盡力服務好佢哋。我睇好你，當咗你一Team人㗎啦，就好似踢波咁，是但一個做少咗嘢，其他人就會好辛苦㗎，做人要考慮其他人！」
通常，壞人都係一副冠冕皇堂嘅嘴臉。
中午兩點幾，小強走去食飯，點知食咗唔夠15分鐘，Tony召喚小強，話樓面突然有幾檯客，炒晒檔，叫佢出去幫手傳菜先。做做做，不停做，時間光速流走，未有時間食返嘢就已經收工。
------
第二日，小強九點九返到餐廳，被Tony寸咗句：「今日遲咗返喎！」朝早繼續做傳菜，但每當小強空檔0.1秒，Tony就會即時出現，提醒佢唔好偷懶；但小強留意到，原來Tony成日去廁所，平均每次都要大概半個鐘。落場時間，小強被吩咐幫手搬貨，原因係人手唔夠。
晚市繼續傳菜，手腕酸痛繼續死頂；偶爾望到靚女同事手上托盤，食物只有一碟，輕巧小型。Oh My God！真係人比人，激死人，靚女總係有著數，慢慢行無人催，行錯位無人鬧；男仔就有原罪，行慢兩步、行錯位即刻畀人鬧到飛起。
第三日，九點半返到餐廳，立即開工數貨，唔好問點解要數貨，總之件事自然而然就變左小強嘅責任。數貨唔簡單，種類多而亂，仲要搬埋。Tony不時出現，同佢講：「我哋做呢行係咁㗎，要服務好人哋，有時係要犧牲吓自己㗎喇，你咁後生，手臂酸痛呢啲好小事，我周身都痛啦。係你自己講要趁開學前賺錢，我先編咁多更畀你返咋！你整完貨去幫阿姐洗少少碗，我都幫手洗咗好多，客太多洗唔切。」
於是乎，小強一個人做N樣嘢，日日九點半返工，做到十一點先走，閂舖、搬貨、洗碗、清潔、傳菜……無停手。小強心裡默念：算啦，忍多個幾星期，收埋啲錢就完。
------
但人算不如天算，意外總係意料之外。
第13個工作日，小強喺貨倉搬貨時，扭親條腰，當下唔覺大件事，同Tony講聲之後，就繼續做嘢直到收工。夜晚返到屋企，竟然愈來愈痛，痛到瞓唔到，第二日企起身都有困難，於是即刻請假去睇醫生，結果係肌肉嚴重拉傷，要休息一段時間。
小強打電話返去請假三日，Tony大發雷霆，大聲吆喝夾雜粗口：「X，你以後唔X使返啦，返得嗰一陣就傷到企唔到，你當我傻仔啊？唔使旨意呃工傷呀，XXXX……」從此以後，小強就聯絡唔到Tony，唔好講賠償，人工都要追成大半年先追到。
打工仔被要求做工作內容額外嘅事情，有時實在無可厚非。但要記住安全係最重要，如果公司未有為你提供勞工保險，更加唔好隨便應承。
炒散行情最新最快﹗
兼職、短期工、臨時工、Freelance，自選工作模式，最新空缺情報盡在此﹗
NG事項
1. 炒散工傷好難追
餐廳炒散好多人做，無他，因為空缺多、無咩入場門檻、搵錢快……但係呢，好多炒散都無保障！好少少嘅大機構，或者會銀行出糧，同你做埋MPF；但更加多嘅情況係：出糧出現金，無MPF、無保險，工傷難以追討等。
飲食場所意外陷阱多多，例如地面濕滑、煮食爐火炙熱、刀叉尖銳亂飛、化學清潔劑四濺，一唔小心，就有可能中招，結果得不償失。唯一解救之道，就係做嘢盡量小心，做足安全措施，避免接觸危險事物和地方。如果明知道工作涉及危險動作，應該堅決拒絕。
身體係你自己，搵幾多錢都唔及自己重要，總之無勞保就咪博啦！
2. 受傷唔好死頂
萬一真係唔好彩受傷，一定要即時喺工作現場通知僱主／主管／人力資源部，唔好死頂。謹記，唔好因為怕影響咗份工，或者怕受到上司留難而唔出聲。同時，仲要知會在場同事，以作日後證明。喺安全嘅情況下，應該等有同事或證人到場協助後先離開意外現場，以避免日後就工傷意外事件嘅詳情（例如：是否曾發生意外、受傷部位等）引起爭議。
3. 搵工要貨比三家
做暑期工千祈唔好抱住「搵快錢」嘅心態，世上沒有免費午餐，更加無咁大隻蛤乸隨街跳。正如Tony一直強調編咁多更畀小強、叫佢做咁多嘢係恩賜，「睇得起你、幫吓你咋」呢啲說話掛喺嘴邊，到底係真心睇得起你定想搵你笨？炒散很多，最好睇多兩份，貨比三家，應徵前多查詢，向前輩請教，了解公司內部文化同市場一般做法有無出入，唔好輕信他人，隨便答應返工。
延伸閱讀：
暑期工中伏實錄(1)：「Internship」定係廉價勞工？
此文章由原作者及Jobsdb HK撰寫／編輯。如欲刊登於其他網站或刊物，請電郵至[email protected]與我們聯絡。如有發現侵犯版權，原作者及Jobsdb保留採取法律行動的權利。