林日曦專訪（二）：《毛記》與《100毛》的招聘要求

Q：《100毛》在紙媒式微的年代仍能屹立不倒的原因是什麼？

日A：「我還未執笠，因為我啲員工叻，而且佢哋有機會show到俾你睇佢哋叻。我哋雜誌有兩個Senior Editor，其中一個二十二、三歲。呢份係佢畢業後嘅第一份工，做咗一年幾已經升到而家呢個位，我好信佢哋，因為我真係做年輕人嘅嘢，佢哋點會唔貼市過我呢？所以基本上啲書我唔睇啦，佢哋決定就得啦。」

Q：要入《100毛》有什麼條件？

日A：「呢間公司嘅招聘requirement就係要有網癮。有網癮唔一定係「毒」或者「宅」嘅表現，反而係代表你貼市。如果你成日黐住個網，就表示你對整個世界發生嘅事都知，就好啱做《100毛》。有網癮唔係話搭車睇下個網就算，而係要無時無刻都睇住，無論邊個群體在網上share咩都知。另外就要人品好。同埋要比較自律。外界成日以為我地好開放。但其實越開放就越要自律。我地返12至7，但其實好flexible，請病假又唔使醫生紙，你做到晒啲嘢咪得咯。但前提係交到貨。咁交唔到嘢又點呢?咁就要縮窄返啦。自律係獲得自由嘅條件。」

Q：與八、九十後的相處之道是什麼？

日A：「我係推崇「無為而治」。所謂「無為而治」唔係叫你唔做嘢，而係唔好做一啲違反人性嘅嘢。你制定公司嘅政策時就要諗一啲嘢係順住大家嘅想法同公司氛圍，來輔助你所希望嘅成果發生，而唔係通過做一啲嘢違反人性嘅嘢來達到你所要嘅成果，咁樣好可能會失敗。老闆與員工之間，有啲基本嘢要理，但除此以外，盡量唔好有太多規條。不過我講就叻，有時都嫌自己管得多得濟。」

《毛記》員工番外篇

東方昇，《毛記電視》新聞主播：大公司無前途，係《毛記》可以發揮自己的創意

「我覺得係《毛記》做得好開心，就好似玩緊一樣，老闆用放羊嘅方式管理很好，我知道自己嘅責任係乜嘢，可以自己安排時間。係呢度做嘢嘅好處在於可以有足夠嘅創作空間，唔使下下估老細要乜嘢來迎合佢。我之前都做過大公司，不過覺得無前途，整個職業生涯完全可以估得到。反而在細公司，有發揮嘅空間。」

銀紙彤，《毛記電視》財經節目主持：各個同事都好自律

「呢份係我第一份工，我主要負責寫網稿，最開心係可以透過網上嘅留言分享網民嘅喜怒哀樂。尤其是有啲網民好似當左毛毛喺朋友咁，食完飯又會留個言同我地講聲，令我覺得好親切同埋好有滿足感。呢度嘅人都好自律，大家都會自覺完成手頭上嘅工作。好似我自己，有時唔舒服，都會自發在家工作。」

腦細番番外篇：

林日曦聽完記者覆述以上兩位員工對公司的看法，冷冷地留下了一句：「佢哋份人都幾假…」

 (待續)

同場加映 Project Lucida -香港中文大學講座: 林日曦的創作路

此文章由原作者及Jobsdb HK撰寫／編輯。如欲刊登於其他網站或刊物，請電郵至[email protected]與我們聯絡。如有發現侵犯版權，原作者及Jobsdb保留採取法律行動的權利。