你有冇試過辭職後被挽留?結果又有冇留低?
朋友喺雜誌社工作,因為分配工作唔公平嘅問題,一早萌生去意。眼見肯做嘅同事忙到死,卸膊嗰班就繼續呃飯食,內心自然不是味兒。終於佢立定決心遞信,然後──獲公司挽留並答應會處理問題,結果佢開開心心留低並過返正常嘅生活……一個星期咁多。之後歷史不斷重演,公司情況還是老調子。
本身有兩間公司叫佢去Interview,不過因為答應留低所以冇出席,加上已經辭職一次,令佢開口講第二次Resign嘅難度增加,亦唔好意思辭完又辭,最終都係死死地氣繼續忙,而呃飯食嘅同事亦都回復原狀,喺天堂過咗一個星期之後,都係要落返地獄,如夢幻泡影。
一個人會厭倦自己嘅公司,相信都唔係單憑一兩件個別事件造成,而係一直不滿公司嘅架構、制度、環境同埋文化,日積月累,直至心死。上述嘅因素往往係冰封三尺,非一日之寒,你選擇留低,就要有心理準備唔會改變,最終改變嘅只係你心態,即係接受現實。
做咗Recruiter咁耐,好了解公司挽留一個人嘅原因,其實對方想你留低,並唔一定因為你無法取替,只係因為請一個人太煩,教一個人太攰,要一個新人無縫接軌Pick up工作兼且會長做,實在太高難度、太冇保證,牽一髮動全身,搞到主管又搞到其他同事,不如畀少少著數你收返封辭職信。咁到底係為公司好?定係為你好?答案已經好明顯。
我自己曾經有兩次被挽留嘅經驗,留低之後嘅結果都係後悔,其實我一個人留低,點可能令全公司改變?唔理你係Junior定Senior,呢個都係定律,因為一間公司嘅風氣牽涉到太多人,太多傳統,所以我唔會畀呢種事再發生喺自己身上,豁出去係冒險,不過留低係坐以待斃。
公司留人,未必代表你好重要,所以去與留,唔好睇公司,而係要問自己:其實想要啲乜嘢?追求啲乜嘢?公司唔會因為冇咗任何一個人而停止運作,但你嘅人生會因為一個決定而錯失更好機遇。
聶瞳
曾任記者,現職獵頭,2018年推出第一本書,同FB專頁一樣叫做【辦公室日報X聶瞳】。每日見盡職場上嘅離離合合,就正如經典名句「城外的人想衝進去,城裡的人想逃出來」,既寓婚姻,亦可投放喺每間公司,因為搵工同搵另一半都係勉強冇幸福。
|
此文章由原作者及Jobsdb HK撰寫/編輯。如欲刊登於其他網站或刊物,請電郵至[email protected]與我們聯絡。如有發現侵犯版權,原作者及Jobsdb保留採取法律行動的權利。