喺香港做打工仔,都無乜邊行係唔辛苦,不過話專門搞Event嘅PR(公關)係Multifunctional嘅全能超人就真係絕不為過。如果大家身邊有朋友搞Event,你就知道要約佢哋食飯有幾難。喺公關公司返工嘅女PR琳琳就話:「返工要寫新聞稿、聯絡記者、做N個Page嘅小編、準備Event前期工作,On-site時仲要擔擔抬抬,而且啲Event搞完一個又到下一個。」所以佢哋除咗平日OT無極限之餘,星期六、日都可能要返工,聖誕旺季更加完全潛水消失於人間。咁多嘢做,仲唔係超人?
搞Event辛苦係人都知,留得喺呢一行嘅女仔都唔會係嬌滴滴小公主,事關返工就如打仗,個個都要上戰場,女仔一樣要做粗重工作。上年有一個國際足球明星嚟香港,琳琳就話嗰日辛苦到傻:「當日大台前面全部企滿啲大隻男攝記,我就同另一個細細粒女同事全程蹲同跪係地下,頂住佢哋唔畀佢哋衝出去。」雖然佢哋已經全程蹲同跪,盡量避開鏡頭唔阻攝記機位,但攝記影唔到靚相就鬧PR,都咪話唔慘。
「同場有另一個Event喺Football club搞,由入口行入去會場有一條好長嘅路。我哋為咗接傳媒,幾個同事輪流狂奔,不停跑出跑入。」琳琳講返呢件事時邊講邊忍唔住笑,但係相信當時曬住咁跑,肯定好攰,唔怪得佢咁瘦啦。
世界上99%嘅客都覺得自己畀得錢就係上帝,當正PR係魔術師,就算係幾Last minute落嘅Order,都一定搞得掂!琳琳話好多Event都需要買Props(道具),而淘寶就係最平最方便可以買到所有嘢嘅地方。「客戶好多時都會畀相做Reference,其實要買啱個客心水嘅Props一啲都唔難,最難嘅係啲客完全無時間觀念!明明兩日後就係個Event,佢哋可以突然畀條Link我,指定要買嗰個款嘅假花,但係個發貨點係上海!得兩日點可能變到個假花畀佢呢?」
阻人收工罪大惡極嘅人生道理,客戶永遠唔會明。「例如份新聞稿,改到去v12都仲唔滿意,繼續執啲細微細眼嘅標點,改到六點就突然消失唔覆,等到八點先出現,原來佢收咗工,我就喺公司又凍又餓等佢覆,好慘!」有時唔只PR被當魔術師,同一條船嘅Designer一樣無得收工。「我哋跟足個客要求執張圖,搞咗成兩個鐘先執好,啱啱好六點半收工前交貨。點知個客話佢老闆突然唔鍾意個Idea,要由頭做過,第二朝要有。我真係嬲到爆炸,點可能話變就變到張新圖畀佢呢?好在Designer好冷靜,安慰返我轉頭。」
PR作為一個Event嘅靈魂人物,需要同客戶、傳媒、同事、出席嘉賓、場地、物流等各方配合,不斷協調同溝通,工作會令人變得愈來愈圓滑,不過琳琳話有時都會好委屈。「好似上次五一勞動節,我去咗行山,無拎個電話出嚟睇,原來我管理嘅其中一個Facebook page有人問嘢,我到第二日返工先覆,佢就投訴覆得太慢。個客見到有人投訴,就打電話鬧我不負責任、唔專業;我唯有客客氣氣認錯,話會跟得好啲,個客都好快收火。不過我收咗線之後忍唔住喊咗出嚟,唔開心咗好耐。」
一個Event除咗PR搞得有聲有色之外,仲需要有傳媒助攻,如果無Coverage,客戶一定唔滿意,但係傳媒點樣報導,有時真係唔喺PR嘅控制範圍之內。「我哋一定會先同記者講得好清楚啲資料、內容,甚至寫埋份好整齊嘅稿交畀記者。點知有次出到街,文字無錯,但係唔知點解張圖就出咗上次Event嘅圖。個客嬲到震,同老闆投訴,嗰吓又唯有食死貓。」
不過幾辛苦都好,琳琳都有一班好同事一齊捱。「大家好似屋企人咁,每次完Event都會一齊食餐勁嘅慶功,好有Team spirit。呢份工的確好辛苦,但係好有成功感,又經常接觸到新事物,唔洗日日坐係Office咁悶,而且令我對人處事都成熟同圓滑咗,所以我都好Enjoy做呢一行!」所以話如果想擴闊眼界又唔怕辛苦,PR都係一個值得考慮嘅行業嚟㗎。
此文章由原作者及Jobsdb HK撰寫/編輯。如欲刊登於其他網站或刊物,請電郵至[email protected]與我們聯絡。如有發現侵犯版權,原作者及Jobsdb保留採取法律行動的權利。