要錢定要命？香港八個傷身職業
不少年輕打工仔覺得花開堪折，趁青春就要搏到盡；做咗廿幾年嘅前輩，反而會覺得後生時捱得太盡，搵到錢都用哂嚟醫病。健康同金錢，從來係一場微妙嘅角力，而某啲職業嘅性質，更係對人體極限嘅挑戰，必須時刻注意安全同休息，否則隨時做到一身傷。
如果閣下阿爸阿媽係從事以下職業養大你，記得要返去大聲啲同佢哋講句「多謝你」！
1. 建造業工人
近年「紮鐵」行業因為人手不足，薪酬水漲船高。但做呢行要長時間喺曝曬、空氣混濁、高噪音嘅戶外工作，工業意外更時有發生，輕則搬嘢扭親條腰，重則可以高空墮下致命。保障工友安全，僱主有責！
2. 廚師
唔講唔知，原來飲食業工傷數字喺過去十年一直高企，冠絕本港所有行業。廚房空間細，廚師揸刀會切親，揸鑊鏟會辣親，地下濕又會跣親。再加上工時長，唔夠精神就更容易出意外。
3. Big 4會計師
不要去羨慕會計師份人工，入得Big 4，頭幾年預咗每日工作十五、六個鐘，peak season要做到喺公司睇日出。長期唔夠瞓，有啲人甚至壓力大到甩頭髮，打字打到勞損要睇跌打。不過Big 4嘅發展路徑清晰，辛苦得嚟都有回報。
立即搜索熱門新工﹗
4. 牙醫及牙醫助護
眾所周知，牙醫係厭惡性行業，成日要睇住病人嘅爛牙、血同口水，仲要長期處於充滿病菌同污染物嘅環境，對心理同生理都係極大嘅挑戰。
5. 醫生及護士
公立醫院醫生、護士經常要值夜班，本身已經好辛苦，再加上近年人手流失嚴重，急症室及病房又不時爆滿，個個都做到叫苦連天。早前有大肚護士返夜更腦中風，令人痛心，希望人手問題可以早日解決！
6. Marketing / PR / Advertising Agency
同會計師一樣，做得呢行嘅agency都係要預咗晚晚做到深宵，但同會計師唔同，人工低好幾級﹗最慘嘅係你越做得嘢，腦細越俾多啲job你跟。不過做agency可以幫你練就一身好武功，做兩年已經等於人哋in-house做幾年嘅經驗。
(Image by Lena Vasiljeva via flickr)
▪ Digital Marketing係近年熱門行業，即刻入嚟睇睇內咩空缺﹗
7. 空姐
空姐俾人嘅印象係可以自由自在周圍飛，又可以化個靚妝識飛機師。但喺光鮮表面嘅背後，其實佢哋要捱返shift、日夜顛倒嘅生活，又要著住高踭鞋做粗重工作，派餐嘅重覆動作會導致網球肘；搭飛機多輻射、紫外線，搞到眼乾面乾但係要逼住化妝、戴隱型眼鏡，真係咪話唔辛苦。
(Image by EthanChiang via flickr)
8. 司機
司機每日由朝揸車揸到晚，久坐會導致腰痛、痔瘡問題。巴士司機為咗趕班次，唔敢飲水去廁所；的士司機最怕遇上麻煩客、劏死牛；旅巴司機冇位泊車要喺條街不斷兜圈，得返幾分鐘食飯、去廁所；貨車司機又要做埋上落貨，隨時搬嘢搬到閃親腰，有時貨櫃場連廁所都冇……媽啊，搵食真係好艱難！
(Image by c-head via flickr)
延伸閱讀：
澳洲482工作簽證：中長期類別可申永久居留 過4關享不同待遇
此文章由原作者及Jobsdb HK撰寫／編輯。如欲刊登於其他網站或刊物，請電郵至[email protected]與我們聯絡。如有發現侵犯版權，原作者及Jobsdb保留採取法律行動的權利。
