點搞定專門作對的麻煩下屬？

成日有打工仔呻上司有幾惡頂，其實上司﹝中層、夾心階層﹞同樣會遇著麻煩下屬，特別係一啲有老闆「照住」嘅下屬，佢哋拎住免死金牌肆無忌憚，偏偏你又係呢啲特權友嘅上司，佢哋經常唔聽你支笛辦事，甚至俾面色你睇。點樣應付佢哋做先不失大體，又可同佢哋和諧共處呢？

約法三章，先發制人

有啲難搞下屬事無大小都越級報告，偏偏你上司又好buy，在左右夾擊的情況下，真係做人難﹗你不妨先小人後君子，同下屬約法三章，白紙黑字講明有咩大小事都先同你報告，小至告病假或有突發事故未能準時返工都要直接通知你，並講明如果打電話聯絡唔到你，可留言或發電郵，等佢冇藉口話搵唔到你。你亦需向上司證明你非常重視跟下屬作良好溝通，不時主動報告成Team人嘅工作進度。

唔俾機會佢哋玩神秘

特權下屬最擅長玩神秘，你唔開口，佢哋係永遠唔會主動向你報告工作進度。所以，不妨每周設定一至兩個固定時間開會，呢個會唔需要成Team人參與，形式可以隨意一點「1 on 1」，例如可在辦公室一個較安靜的角落進行，但務必定期開會，以便對下屬，特別係麻煩族類了解佢哋嘅工作進度，確保佢哋冇搞出事。

列出分工清單，邊個偷懶一目了然

特權下屬天不怕、地不怕，亦絕對唔怕拒絕上司指令。若然你係小組主管，當你吩咐有破壞冇建設嘅無良下屬處理突發或額外事務時，佢哋總會擺出一副好委屈或被欺壓嘅樣子，或稍為覺多啲嘢做就黑晒面，工作時採取拖延政策，甚至扮忙推搪。遇著呢類情況，你不妨列出各成員的工作清單，邊個做多做少都一目了然，逢親班麻煩友推三推四，你就將呢張清單公告天下，表明個個都有唔同嘅工作在手，等佢哋冇藉口話自己有幾忙。

以身作則，不忘親身履行雜務

其實有時下屬搞對抗，好可能因為佢哋對上司有所誤解。上司可透過親身參與零碎雜務，了解下屬嘅心態。例如公司要清理貨倉，上司亦可抽時間參與其中，與下屬多作較非公式化的交流。下屬一般會較喜愛親民嘅上司，有心搞事嘅員工存心想玩離間，都冇咁容易。

此文章由原作者及Jobsdb HK撰寫／編輯。如欲刊登於其他網站或刊物，請電郵至[email protected]與我們聯絡。如有發現侵犯版權，原作者及Jobsdb保留採取法律行動的權利。