九種乞人憎同事性格，有冇你份？

 一日至少有八個鐘返工，打工仔對住同事仲多過對住屋企人，遇著犯眾憎嘅異類，唔想同錢作對就唯有硬啃，以下九種典型乞人憎同事，有冇一個喺你咗近？

1. 大隻講

呢類型最拿手信口開河，講乜都咁浮誇，大隻講唔止講多過做，仲擅長將歪理變成真理，講得出做不到，成世人得把口就可以橫行天下﹗因此，切勿輕信大隻講嘅承諾，信一成都死﹗

2. 永遠BAN橋無建設

「我認為唔係咁好囉﹗」呢類同事鍾意猛Ban橋但係永遠唔會有橋，完全係為反駁而反駁。如果你老細咁啱係呢類型，只好當成係訓練EQ同IQ嘅黃金機會﹗如果有呢類同事，你不妨問：「想請教你有咩更好見解呢？等我學吓嘢吖﹗」睇佢有咩反應。

3. 搞小圈子

人類係群體動物，但有類同事係選擇性搞群組，專係揀啲啱嘴型嘅同事埋堆，講是講非已經唔係最強項，將非我族類嘅同僚先排擠然後發放邊疆先至係終生事業。面對呢類八卦群組，最好保持一定距離，道不同不相為謀。

4. 擦鞋仔

擦鞋仔可能喺你阿爺阿嫲嘅年代已經出現，經過世世代代，擦鞋仔已演化成超自然變種版——有老細在場佢哋必然蒲頭，冇老細在場佢就冇影冇蹤，神不知鬼不覺咁又上咗位。對佢哋嘅「成就」，千祈咪眼紅亦唔好有樣學樣，做好自己本份，明智老闆有眼睇的。

5. 懶醒豬頭炳

平日認叻最耍家，佢哋實際上做咗啲乜你永遠無從理解。老細讚親邊個方案好，佢梗會馬後炮：「係呀係呀，我都係咁諗。」成條Team衰咗佢又會話：「我話咗唔係咁架啦﹗」當佢哋發表「偉論」時，唔好俾位佢繼續講，佢冇機會認叻，覺得冇癮就會自然收聲。

6. 八卦是非精

佢哋最拿手將是非當人情，成日講：「放心，我唔會話俾人聽。」扮晒大方友善向你吐料，當你真係同佢推心置腹時，佢就已經充當狗仔隊四出散播謠言。如果有呢類同事，表面吹吓水無傷大雅，切忌同佢哋分享私人事。

7. 中場A字膊

明明係Team work，做做吓就側側膊玩失蹤；又或者做錯事要搵人揹鑊時，A字膊都會第一個彈開，事不關己、己不勞心，毫無責任感意識可言。同佢哋溝通最好用email、對話最好錄音，有證有據等佢唔可以卸得就卸。

8. 篤背脊

呢類堪稱笑面虎，表面扮晒配合同事百分百零意見，背後卻即刻同老細逐樣數你不是，搞到你衰咗都唔知係咩一回事。要搞定陰險小人，同佢傾公事時盡量有第三者在場，咪俾機會佢無中生有。

9. 見高拜見低踩

佢哋係超現實階級觀念主義，市儈又冇人情味。老細出沒時，佢哋會扮到好親切好友善，務求建立一個忠誠友善的員工形像。但對佢冇利益關係嘅人，絕對可以變臉快過打針。 呢類假仁假義嘅人，佢假時你亦假，佢變臉時你當佢隱形免得勞氣。

此文章由原作者及Jobsdb HK撰寫／編輯。如欲刊登於其他網站或刊物，請電郵至[email protected]與我們聯絡。如有發現侵犯版權，原作者及Jobsdb保留採取法律行動的權利。