經驗分享

各行各業分享
在傳統行業以外,是否還有更多選擇?有更大的抱負,卻害怕跟別人走不一樣的路?jobsDB邀請了10個新興行業的業內精英,分享當中的苦與樂。他們在其專業拚搏多年,除了擁有豐富的工作經驗外,也領略了不少做人處事的心得,讓大家認識不同行業的特色、前景和晉升之路,從而作出最適合自己的選擇。


讀者留言

求助者康復 最窩心的鼓舞林思為的營養師經歷對我最有啟發。因為她說:「營養師必須擁有良好的輔導及溝通技巧,不要強迫別人接受我們認為對的一套,並要細心聆聽對方的想法。嘗試多了解他人的立場,站在對方的角度給予建議。」她這話真是好有道理,因為自己的工作是需要對住不同的客戶,每個客戶的性格都各有不同,所以良好的溝通技巧是必需的。如果能夠懂得站在對方的立場去想,自然可以在彼此的溝通上做得更好及做出適合對方的建議,令到整件工作做得更好,自己同客戶都開心,做出雙贏的完美結果。

– Cheung Lu


何敏儀的經歷最啟發我,她的態度亦很值得學習。她的經歷反映了很多香港人的處境,在香港,專業人士(如醫療界,教育界等)或公務員回報相對高,其他行業難免跟何小姐有相同感覺,對職業的穩定性存疑,工時長,金錢回報少,少不免會感氣餒。

事業上的成功也跟劇團選角一樣,沒有特別的準則,最大因素是際遇,所以有些人無論是有多努力,也會失敗,即使再努力也改變不了。但何小姐說得很好的一點是,要面對及接受自己的失敗,並從中了解自己的專長再向該方面發展。在面對失敗甚至在倦怠期的時候,該做的不是自怨自艾和憤世嫉俗,然後失去熱誠,馬馬虎虎去完成工作,而是要繼續做好自己本分,在艱苦中磨練自己,因機會是留給有準備的人。

最後,何小姐亦就進修的建議,是為了讓人得到精神上的啟蒙,也是很重要的一點,一些與自己事業無關的課程的確能夠填滿都市人空洞的心靈。

總括而言,在何小姐身上,我看到即使困難,只要有正確態度,必看見曙光,否則,只會親手將糟糕的情況弄得愈來愈糟糕,在現今充滿負能量的世代,感謝何小姐的分享,給倦怠期的打工仔(包括我自己),都注滿了正能量。


– Hiu Ching Poon


SHIRLEY NG:「切勿計較多做或多學的事對前途會起多大作用,因為你只會在回想時,才知道以前所行的路是如何串連在一起,而令你獲得今日的成果。」

我覺得SHIRLEY NG講嘅說話最能啟發我,因為上年畢業時考到入間大公司做MT,當時由低做起,最記得第一日返工已經OT到夜晚11點,屋企人問你翻嗰份咩工想做死人,第一日翻工就OT咁多粒鐘。以前公司上司好多嘢唔識做,有時變咗我學埋佢啲嘢嚟做,放假總會收到同事或者上司嘅追魂CALL,公司人事又複雜。依家我考入咗公營機構,發現雖然以前好忙連假都好難拎,但係真係學咗好多唔同嘢,見識咗好多,對依家份工大有幫助!所以唔好計較多做或多學的事,其實對你未來發展係非常有用,會令你個人急速成長。對於初出茅廬嘅畢業生,更加喺試用期階段唔好計較太多,爭取表現得最好!


– Ka Man Chan


Simon嘅一句「喜愛玩電子遊戲並不一定適合投身電子遊戲職業」其實好有啟發性……以前嘅人,包括我,諗嘢好單一,鍾意計數咩,讀理科,大學讀數,出黎做嘢計數!鍾意讀書咩,讀文科,大學讀文學院,出嚟寫書寫散文教書~但其實鍾意嗰科,唔代表佢做得到嗰一科嘅工作,亦唔代表佢鍾意做!

現實同理想係可以出入好大,你以為你鍾意嗰科嘅嘢,就一定會鍾意日日返工對住佢咩?唔一定,就算你鍾意對住佢,亦唔代表你真係應付到呢個行業嘅需要……

雖然話做嘢最緊要有興趣,但係其實我覺得唔單止講對個行業有冇興趣,再行進一步嚟講,其實係要對你個post要做嘅嘢要處理嘅嘢都有興趣!好似Simon嘅例子,你鍾意打機,但唔代表你去一間電子遊戲發行商做marketing會開心,又唔代表你去機鋪做收銀員會啱做!

返工,佔人一日嘅至少3分1,如果唔好好揀清楚最啱自己嘅,點對得住自己丫!


– Kam Chik Lau


何敏儀說:「我入行已十多年,由一位表演者到兼任教育者,慶幸一直以來有不少工作機會,然而每個機會並非不請自來,而是有賴平日勤力鍛鍊演技,並盡心投入每次演出,緊守專業崗位,才可提升信譽和建立良好人脈,增加合作機會。」她的這個經歷是對我最有啟發的。因為她說明機會有時不是等運到的,而是經過平日生活上做人處事的態度而建立出來的。 如果時時都緊守自己的崗位,將自己的工作做好,自然會得到其他人的賞識,建立出自己的良好人脈關係,這就可以對自己的未來產生更好的幫助。所以無論工作上被調配到什麼位置,都應該好好去做,從中吸取更多不同的人生閱歷。亦可以令到上級對自己另眼相看,得到賞識及重用。

– Lai Lau


趙思雅:「除了在學業上爭取優異成績外,亦可於課餘多參與精神健康相關的義務和研究工作,爭取與不同層面人士的相處經驗。不要怕理虧,樂於助人,廣交朋友,放眼世界。」

讀書時曾經以為成績好就必定成功,後來才發現書呆子未必係社會生活最需要嘅人,當然知識都好重要,但其他軟實力例如EQ,待人接物亦不可或缺。以我做學生義工嘅經驗為例,與本身major科目無咩關連,但響計劃同統籌活動中學到好多投身工作時需要嘅能力,對我第一份工作好有幫助。相比同期入職嘅新畢業同事,連影印機都唔識用,亦有溝通上問題,明顯有差異。而廣交朋友可以開拓視野。每個人都有擅長嘅嘢,有唔同經驗同智慧,識多啲人,就可以響佢地身上學習,呢啲都係書本上無嘅嘢,有利於自我成長。


– Liz Cheng


最啟發到我嘅,係王秀聰先生嘅「必須放下身段,不恥下問,由零開始學習,會有意想不到的收穫。」因為任何人都無可能什麼都識,什麼都叻,就算識位低過你,學歷低過你,經驗差過你,但一定會有一些能力係叻過你的,記得有一年在公司趕緊一份文件,做做下電腦無故壞了,攪了很久都攪唔掂,那時身邊只有一個理貨員,心大心細不知好不好問他,最後當然是問了,原來他是電腦神童,唔夠十分鐘就修理好部電腦,他往後還教識我很多電腦知識,收穫真的很大!其實人與人之間,只要放低有色眼鏡,互相尊重袒誠相對,進步就會快一些,收穫都會多一些。

– Raymond Ko


趙思雅 ZANONIA CHIU:「除了在學業上爭取優異成績外,亦可於課餘多參與精神健康相關的義務和研究工作,爭取與不同層面人士的相處經驗。不要怕理虧,樂於助人,廣交朋友,放眼世界。」

雖然大家不同行業,但我覺得ZANONIA嘅分享放諸四海皆準。在社會做事除了要靠實力,很多時仲要靠人際關係先可以令自己嘅career發揮得更好。小時候以為只要考試成績好,將來事業就可以平步青雲,但事實唔係。畢業多年後,眼見有啲以前上慣Dean’s List(但人際關係薄弱)嘅同學到今時今日都只係一個普通打工仔,反而有啲以前唔算得上係讀書精英、但soft skills方面好到不得了嘅同學仔,現在就做到好高職位。好彩,我自己都係一個鐘意同人互動嘅人,亦喜歡參與行內的活動,先可以得到唔少寶貴的工作機會同經驗。由此可見,年青人以優異的成績考入心儀的公司是不足夠的,平時仲要爭取多啲機會出席同自己行業相關的活動/講座,識多啲行內人,知多一點點對自己也有好處。唔好怕麻煩同花時間,因為你永遠唔會預料到,你今日所識嘅朋友話唔定就係你將來嘅伯樂,讓你在事業上大展所長,有機會攀上更高位置。

所以,睇完ZANONIA嘅分享,更加啟發到我 「Opportunities made Friends, Friends made Opportunities」的道理。


– SC Chan


最啟發到我嘅,係王秀聰先生嘅「必須放下身段,不恥下問,由零開始學習,會有意想不到的收穫。」初初大學畢業去求職,覺得自己係大學生,仲要有honor畢業就好威威,上求職網站呢份嫌人工低,嗰份嫌返工時間長,另一份又嫌返工地點差,而其實我根本一啲熱誠都冇,只係睇人地比到啲咩我,完全唔肯放下身段。所以的確係好挫敗,因為遞10份cv出街都未必有一份覆返我,去到真係有面試機會嘅,又眼角高,嫌三嫌四,唔去諗自己幫到人地公司啲乜,結果係好一段時間都冇offer。

後來唔知好彩定唔好彩,有間公司請咗我,而我亦因為諗住做住先,騎牛搵馬,所以就take咗個offer結果做咗唔夠1個星期,我被老闆炒咗……入到公司,新入職,當然係做啲簡單嘢,但係我就成日complain話點解要我呢個大學生做啲admin嘢,最衰係因為好多呢啲admin嘢我未接觸過,又唔肯開口問,結果又唔願做又唔願問仲要做錯晒,所以老闆頂我唔順,機會都唔比我就趕我走……

跟住落嚟嘅好一段時間,我都好down,屈係屋企冇去搵嘢做,因為我好驚再搵到工都係同一結果比人趕走……但的確係一句「放下身段,由零開始學習」幫咗我解困……我嘗試去諗公司點解要請,而我又幫到公司啲乜,雖然唔係話公司要我做乜就做乜,但係合理嘅,我都應該要去做,而唔識做嘅,自然係要問,就算係要我問個清潔姐姐,管理員,派信伯伯,我都要盡我能力去完成公司比我嘅mission。否則,我對公司嚟講只係一個問題,而唔係幫佢解決問題!

諗通之後,我再去搵工,重出江湖,去咗間小企業做嘢,人少少,我就真係乜都要做,但係就正正因為乜都要做而我亦乜都唔識,問下問下我識多咗嘢,又同同事關係好好,老闆見到我做好又升我又加我人工,連我要離開再出去闖佢都支持我,仲叫我有機會返去再幫佢手,咁我就真正明白,唔肯放下身段嘅人其實根本冇身段可言,肯放下身段去一步一步向上爬嘅最終係可以登頂!


– Wai Tsz Lau


「凡事願意付出,對熱愛的事情要努力嘗試,並要有接受失敗的準備和勇氣,對自己的選擇要有承擔後果的能力。」-何敏儀JENUS HO

雖然「事業一定要選擇自己熱愛的。」已經是一個聽膩了的老生常談,但這確實是選擇的第一標準。無論做什麼,選擇哪一行,不說一輩子,至少也要做好幾年。如果你對它毫無激情可言,每天學習上班像是在熱鍋裡滾爬,能堅持多久?又能做出多大的成就?

一旦堅定了自己的目標,就要時刻懷揣自己的初心。路是自己選的,再苦再累都要捱下來。這世界上沒有一份工是不辛苦的,只是你如何去看待它罷了。如果你熱愛它,只會甘之若飴。每一次的失敗你都能拍拍塵土,再次站起來向前走。

如果要迎接失敗,如果要承擔後果,那必然要選擇一個自己熱愛的不是嗎?


– Wingyee Chan


司徒廣釗說:「猶記得自己當初畢業時,曾從事市場推廣工作,其後我轉行做廣告媒體買賣及策劃,及後興起社交網站後,我便專注於數碼及社交媒體方面的發展,過往所累積的市場推廣經驗,對於現今這份工作亦有很大幫助。」他的這個經歷令我得到好大的啟發。這令我明白人不應只安於現狀去做事,反而是從不同的工作上累積各方的經驗,從中增加自己的人生閱歷。所以無論轉去其他工種或在同一公司上調配到其他崗位,都應時刻保持積極的心去工作,從中累積更多的經驗,這對將來做其他事亦會有幫助,令到自己做得更好更出色。

– Wo Kwok