地盤佬日誌－十年如一日

我老咗就會自自然然多咗時間會想當年。十年前你返工做緊乜，如果無升職升到好高或轉行，十年後嘅今日你都可能重係做緊差唔多嘅嘢。

專業係咩？

有人話要係大學讀某啲學科畢業之後先係專業。我就覺得唔一定，我覺得如果一個人一生奉獻咗幾十年比同一個行業中間都重不停精益求精盡善盡美不停進步我覺得都係一樣專業。

學好手勢

入每一行都好一開始學好手勢係重中之重，我自己就做咗十幾年但係好多依家用緊嘅技術都係入行頭一兩年喺畢業入個間公司學返來，好多理論都係喺嗰陣時根深蒂固喺我嘅心裏面。見到有啲𡃁仔一開始入行就跟咗個專做偷呃拐騙嘅大佬，之後N年後再見個𡃁仔就會變咗個專門偷呃拐騙嘅古惑仔。

精益求精盡善盡美不停進步

明眼人有時一睇成品就知係新手定係老師傅做嘅。可能一眼睇落好似差唔多，不過好多細節位都係老師傅處理得好好多。每個老師傅都係由一個𡃁仔做起，慢慢逐年提升自己嘅技術，最後經過長年累月先會成為一個老師傅。不過都有見過一啲做到同啲新手差唔多嘅老屎窟，做足幾廿年都係同啲新手一樣錯個啲嘢。

今日嘅你係之前幾十年，幾萬個每日的我累積而成。你可以懶一兩日，但係如果懶太長時間就之後會精神好難追架。大家都要一路加油努力啦。

▪ 張晨：「向那些狠狠鬧爆過自己的人，說句Thank You。」

▪ 地盤佬日誌-唔好惹地盤佬

此文章由原作者及Jobsdb HK撰寫／編輯。如欲刊登於其他網站或刊物，請電郵至[email protected]與我們聯絡。如有發現侵犯版權，原作者及Jobsdb保留採取法律行動的權利。