地盤佬日誌-你會轉行嗎？

之前巴菲特講過就算比一萬蚊美金要人哋以後唔用蘋果產品，都好多用開蘋果嘅人未必肯收一萬蚊。我做咗地盤咁耐，跟住我就諗要俾幾多錢我先會轉行咩？我諗過就算10萬美金都完全唔會心郁，一百萬美金先開始可以考慮吓。

沉沒成本，知識寶庫

每一行入行做得耐就會有好多沉沒成本，包括你嘅學歷同埋經驗。學歷方面除咗大學或者香港建造學院等等嘅正式學歷之外，真係做嘢之後都仲會有持續進修，例如我自己每年都會Keep住上25個小時嘅工程相關持續進修課程（CPD）。

除咗學歷之外，工作經驗喺你個工作上面甚至乎比學歷更重要。讀萬卷書不如行萬里路，做嘢好多時有好多種方法，每種方法都有佢嘅好處有壞處，有啲成本高啲有啲質素好啲有啲快啲。如果喺實際工作裏面冇見過幾種唔同嘅做法，好難可以揀到對你現在呢一刻最好嘅選擇。例如做一個大判嘅管理人員，基本上幾年先至會起完一次樓，如果冇起返幾次樓，同一樣嘢對過幾個唔同一分判。都好難知邊種方法係最好用。所以好多時大判嘅PM都係講緊最少十幾年嘅經驗，如果唔係幾醒目都好難做得好。

人工至上

會決定一個人轉唔轉行嘅理由，除咗嗰個行業難唔難入行之外，最主要嘅理由都係錢嘅問題，包括入行嘅人工啦，同埋做返10年八載後嘅人工都好影響。問過有啲三十幾歲先轉入去做地盤嘅師傅點解佢哋會轉入嚟？通常嘅理由就係佢哋本身做咗某個職業10年八載之後發覺已經去到個行業人工頂點，但係其實個人工只係同地盤入行嘅人工差唔多，如果依家轉入嚟地盤再做返10年八載人工一定比佢本身嗰度好，咁佢哋有養家壓力先至會轉行。

做人好怕入錯行，如果揀啱一個適合自己能力同性格，又有前途同埋錢途嘅行業同工作，人生將會事半功倍。

▪ 中高層親述轉工歷程！花兩年揀工獲加薪4成 跳出10年舒適圈卻遇新公司裁員？

▪ 轉工前停一停諗一諗？局面好壞參半未必要辭職 4條核心問題決定去留

此文章由原作者及Jobsdb HK撰寫／編輯。如欲刊登於其他網站或刊物，請電郵至[email protected]與我們聯絡。如有發現侵犯版權，原作者及Jobsdb保留採取法律行動的權利。