地盤佬日誌-新春顯實力
農曆新年可以話係地盤最開心嘅一個節日，亦都係判頭同埋啲公司高層彰顯佢實力嘅一個日子。包括春茗利是果籃等等。
春茗
多數大家啲公司都會搞春茗，有啲就淨係請自己人，有啲會請埋自己啲客。例如啲二判有時會請埋相熟嘅大判工作人員去食，有時只係細細地擺幾圍自己個地盤食，呢啲多數冇乜特別都係食嘢同飲酒；有時係啲二判如果夠大間嘢擺一百幾十圍都見過，呢啲就通常都會有抽獎，多數由幾百蚊抽到大獎iPhone等等。
好多時抽完大獎呢都仲會有餘興節目，就係主人家嘅老細，祝佢其他朋友（其他判頭老細）上台，一輪吹噓哥前哥後，之後就會喺啲其他老細手上攞到幾萬蚊繼續抽獎。好多年前我都試過嗰年地盤多判頭，新年前食咗十幾餐呢啲飯，食到嗰排見到乳豬都驚。
不過近年可能經濟環境差，大家都賺少咗錢，搞春茗嘅都越嚟越少，就算有都規模越嚟越細。
▪ 蛇年12生肖工作運 邊個生肖犯太歲？辦公室開枱布局靠2招化劫催運
▪ 開工利是有公價？把握最佳時機向上級拜年 保持形象攻守兼備
利是及禮物
農曆新年當然要利利是是啊，多數自己公司高層都會派一派利是，不過通常都算唔大封純粹意頭。
啲判頭好多都會喺新年前後送過果籃俾啲地盤嘅最大嗰個，之前做過某個大地盤個PM間房啲果籃多到得返一條路仔兩邊全部都係果籃。
最需要睇嘅就係啲判頭利是，通常啲判頭就有分左袋右袋通常係唔同面額嘅，不過多數最大嗰封都係收喺外套內袋嗰封通常係佢最大嘅，如果你收嗰陣時睇佢喺邊度攞出嚟就大概知道佢覺得你嘅地位高唔高。
不過可能真係近年大判同埋判頭嘅利潤都越嚟越低，不論係春茗嘅規模同埋次數都一路減少，利是都係越嚟越意思意思。
希望大家今年都努力生存，平平安安又一年。
此文章由原作者及Jobsdb HK撰寫／編輯。如欲刊登於其他網站或刊物，請電郵至[email protected]與我們聯絡。如有發現侵犯版權，原作者及Jobsdb保留採取法律行動的權利。
