HR 揭祕！搵工遇著同一招聘廣告登完又登、冇公司名係咩原因？

搵工，相信係唔少香港人都面對過嘅課題，而當中亦涉及唔少技巧。小編搵左一大班HR同Recruiter 朋友，一步一步解答搵工過程中嘅常見疑難！第一個主題就係搵工第一步︰「招聘廣告」！

1. 見到同一個廣告登咗好多次，其實係唔係真係請人？

Can 姐 （金融機構HR）: 有機會！亦可能係一直未見啱，或者係professional services 嘅公司同一個position 有好多空缺。

K 姐 （本地企業HR）: 搵唔到啱嘅candidate都會post多次，或者唔好彩俾人decline offer，無辦法下都要再登多次。HR好少情況會無空缺都特登去登同一個廣告幾次，咁樣cost effectiveness太低了。

R.D. （國際獵頭公司Recruiter）: 原因有二，一是Job Description唔能夠真正反映職位要求，所以請唔啱人。或是業務需求大，一直請唔夠人。

R 姐姐 （公營機構HR）:  好多時真係因為未請到合適嘅人！一來求職平台多數有刊登廣告期限，未請到人唯有重新再登；二來唔同行業都有一定流失率，可能有員工辭左職又未請番，就有機會重複見到同一個廣告。

2. 有啲廣告無落公司名，令我覺得好唔放心，係唔係呃人㗎？

Can 姐 （金融機構HR）: 未必嘅，有公司未必想俾競爭對手知一啲比較敏感嘅職位空缺，或者唔想自己員工知道想換人 。

A sir （資深IT Recruiter）: 某啲高級職位可能因爲保密原因唔開公司名，未必一定呃人㗎。

K 先生 （曾任Recruiter、現任金融機構HR）: 無落公司名可能因為confidential 問題。例子︰上市公司經歷緊M&A（合併與收購）、有牌照問題、正值過渡期等。如好唔放心可以喺interview時了解公司發展、財政狀況等。

Miss M （金融機構HR）: 可能係因為Agent 代登所以唔落公司名。

▪ 【Fresh Grad搵工】6大新工簽約事項 注意隱藏細節防中伏

▪ 搵工只交履歷表較輸蝕？求職信、履歷表各有特點 常犯錯誤致出局

3. 宜家好多廣告Title 都寫 Management Trainee，會唔會係呃人？

A sir （資深IT Recruiter）: MT只係一個title，apply之前同其他工一樣都應該先了解多D資料先。只要上網做多少少research，通常都會有人分享MT計劃内容，亦都可以了解左公司先。

K 先生 （曾任Recruiter、現任金融機構HR）: MT係好多大公司用嚟培訓人材嘅職位，在金融行業亦有以MT作招聘。求職者可以多了解公司Background。如果畢業生可以向學校的Career Centre 查詢。

R 姐姐 （公營機構HR）: 而家的確多左好多Management Trainees 嘅posts，種類亦包羅萬有。唔想返工後先覺得同自己預期有出入，喺send CV 之前一定要小心閱讀廣告入面嘅職責範圍，同埋好好比較唔同公司提供嘅MT空缺呀！

4. 好多廣告都寫到水蛇春咁長，究竟點樣搵出工作重點？

K 姐 （本地企業HR）: 而家有啲求職網站（例如Jobsdb） 都有位置去俾僱主highlight 返個職位嘅工作重點。大家亦可以搵下有無啲行內專業用詞，去了解職位內容嘅大意。

C 小姐 （香港大型企業HR）: 通常頭3個points都講左份工嘅重點。

R.D. （國際獵頭公司Recruiter）: 廣告太長的話， 建議搵出重點字眼，例如「must have」、「at least」或者specific skill，如果獲邀Interview後可再進一步詢問清楚。

K 先生 （曾任Recruiter、現任金融機構HR）: 多數Senior Level Job Description會特別長，例如是Management Level。咁點搵重點？睇負責範圍、Job Duties就可以幫到你。

▪ Fresh grad對首份工滿意度跌！認清5大搵工條件 助盡快搵心水好工

▪ 伏工勝地？勞工處網頁招聘廣告門檻低多人睇，待遇卻十分參差

5. 如果我嘅profile 同廣告所寫嘅要求有少少差距，係唔係完全不獲考慮架啦？

Can 姐 （金融機構HR）: 唔係架！公司有機會有flexibility 接受唔同嘅candidate ，有時性格比 hard skill / 經驗更重要。如果有興趣都可以報左先，公司覺得有機會都可能會同你傾下。

C 小姐 （香港大型企業HR）: 都唔係架！有時一啲 junior嘅position都唔太expect求職者有太多經驗，反而係cv到show到你對份工有興趣更加吸引到僱主呢！

A sir （資深IT Recruiter）: 視乎差距係邊同有幾大，部分skill 嘅經驗比較少就無所謂，但完全無法達到某樣寫到明嘅必須要求就機會較微。

Miss M （金融機構HR）: 如有差距就唔會優先被考慮，但都好視乎咩工作職位，如太難搵到人材都會考慮。

R 姐姐 （公營機構HR）: 當然唔係啦！公司一般都會刊登心目中理想candidates 所具備嘅條件，但唔代表同佢刊登要求有差距嘅candidates就一定唔請。如果差距唔係太大，其實都可以試下先！

今日同大家傾住咁多先，希望以上意見都幫到大家啦！下次Jobsdb繼續同大家探討搵工策略！

此文章由原作者及Jobsdb HK撰寫／編輯。如欲刊登於其他網站或刊物，請電郵至[email protected]與我們聯絡。如有發現侵犯版權，原作者及Jobsdb保留採取法律行動的權利。