地盤佬日誌-危險地帶
地盤係一個危機四伏嘅地方，基本上每一個工序都會有佢一定危險性，不過都會因為地方唔同危險度有唔同（頭盔：就算下面所講最安全嘅地方都有一般地方嘅危險性高好多嘅危險性，所以都要做足防護措施着齊防護裝備）
Lv1 室內裝修
做室內裝修喺地盤嚟講係相對地比較安全嘅，主要會又死人風險嘅嘢就係觸電同某啲轉動或切割機械。如果小心謹慎着齊防護裝備安全性相對地高。不過啲中小型工傷都一樣在所難免。
Lv2結構施工階段
結構階段嘅危險，除咗包含晒所有室內裝修階段嘅危險之外，仲有吊運嗰陣時嘅風險同埋地面嘅洞人體下墜同埋樓邊嘅跌落街嘅風險。
當年我個地盤試過有個紮鐵佬，一路紮鐵一路向後，佢開始紮嗰陣時都有睇後面冇特別問題，點知佢紮到一半嗰陣時後面有個測量仔打開咗個臨時窿嘅封窿用嚟揼線。之後個紮鐵佬一路褪就跌咗落去啦。不過好彩都只係跌咗一層唔算係好重傷。
Lv3地底工程
地底工程，最主要嘅風險有幾種第一係地底有毒氣體，有毒氣體有分有味同冇味有味嘅其實冇危險，最怕係無色無味嘅，同埋好多事件見到有人暈咗，其他人就有機會下意識咁衝過去救佢，呢個係令到好多時一出事就好多人一齊出事嘅理由。所以每次做地底工程都要長期喺做足氣體監察，一次都不能少。
地下工程另一個風險就係地下水同埋冧泥石，又係一賴嘢就就有機會活埋。要做好所有臨時支撐臨時排水逃生通道咁樣盡可能減少傷亡嘅機率。
Lv4海上工程
欺山莫欺水，雖然好多人未必覺得海上工程好危險，不過我可以用數字話俾你知海上工程係超級危險，例如港珠澳大橋，一共死咗20位工友。應該香港近年都冇任何工程死亡數字大過呢個項目。海上工程有咩咁危險主要分幾種，有船上作業或半船上作上面嘅危險，有陣時一個大浪企唔穩就跌落海，或者喺躉船度吊運一個大浪就吊住工字鋼一下車埋嚟。另一種就係怪風，喺海上面嘅怪風，有陣時直頭可以吹到企唔穩都係一種好危險。
總之其實地盤就係一份危險嘅工作，大家工作時都要小心謹慎所有安全裝備全部要着足，跟足有用嘅安全指引去做嘢。
▪ 【建築系出路】畢業一定要做建築師？入門級筍工月薪直迫4萬 3大出路兼得前途與「錢」途
此文章由原作者及Jobsdb HK撰寫／編輯。如欲刊登於其他網站或刊物，請電郵至[email protected]與我們聯絡。如有發現侵犯版權，原作者及Jobsdb保留採取法律行動的權利。
