地盤佬日誌-地盤文職好好做？
地盤啲師傅成日話我哋呢啲地盤文職嘅人吹住冷氣做嘢好舒服。不過做過普通辦公室同埋地盤辦公室就會發覺其實都有唔少分別嘅。
環境問題
首先多數地盤都其實比一般辦公室山旮旯，除非咁啱撞正你屋企好近嗰個地盤，如果唔係通常交通時間都比較耐。就算午餐要搵嘢食都冇商業區咁多選擇。
空氣質素問題
我相信如果攞嗰啲空氣監察機過嚟測地盤應該係唔合格嘅。唔計甲醛等等嗰啲化學物質，淨係見到摸到嗰啲水泥灰木糠嗰啲其實都吸唔少。就算係冷氣房坐一日之後返屋企撩鼻屎都會多咗好多。
廁所問題
雖然而家多數嘅地盤辦公室都會有正常啲嘅廁所，不過我呢啲開荒牛成日一開地盤嗰陣時就有段時間要同啲師傅一齊用啲藍色化學廁所。
電力網絡不穩問題
唔穩定嘅理由有好多例如俾人掘斷電線光纖、電工駁線唔好、比老鼠咬電線等等嘅理由。咁就搞到成日地盤都突然斷電。對於我呢啲公司比較傳統得枱機電腦又多嘢要入Server做嘅就比較麻煩啦。（有啲公司會配埋後備電源UPS或手提電腦就會好啲）
蛇蟲鼠蟻
地盤裏面老鼠曱甴一定比一般嘅辦公室多好多。有啲荒山野嶺地盤蛇啊大蜘蛛啊都見過。
人工問題
顧問公司：通常顧問公司如果派人落地盤個人工就會有分別嘅，如果係派落政府地盤做ARE/RE 人工會跟返政府同級，咁就非常之好嘅。
承建公司：有啲公司會有注地盤津貼，不過好多都係冇嘅。而我公司就直頭係同級嘅人返公司返工就五天工作加政府假期。返地盤人工不變，但係就返六日加勞工假。
簡單講就係如果一般寫字樓係一般情況，地盤寫字樓喺地獄級，地盤現場班師傅嘅環境就係十八層地獄。
通常地盤啲師傅會羨慕我哋地盤寫字樓嘅人有得涼冷氣，而我哋就會羨慕啲師傅放工就係放工。
▪ 【建築系出路】畢業一定要做建築師？入門級筍工月薪直迫4萬 3大出路兼得前途與「錢」途
此文章由原作者及Jobsdb HK撰寫／編輯。如欲刊登於其他網站或刊物，請電郵至[email protected]與我們聯絡。如有發現侵犯版權，原作者及Jobsdb保留採取法律行動的權利。
