七月十四鬼門開 六大夜班工作小心撞鬼

嗱!就快到七月盂蘭節,傳說閻王喺農曆七月一日打開地獄之門,鬼魂來到人間享受短暫假期。整個七月都好猛唷,老人家教路要忌玩水、掛鈴噹、拍肩膀、靠牆行……最重要係七月十四嗰晚唔好出夜街,鬼門當晚開到最大,好容易瀨嘢!

可惜,有啲工作崗位存在「夜班」這回事,想唔出門都無可能。搵食艱難啊,唔通唔做咩?小編精選六大夜班工,多角度分析下點解佢哋易撞鬼,信不信由你!


1. 夜更的士佬  離奇白光扭錯軚

七月十四鬼門開 六大夜班工小心撞鬼

(圖片來源:Camvideo HK

那夜凌晨,的士佬從黃昏六點開工直到朝早六點,漫漫長夜,真係搵命博。深夜十二點,正常人都好難唔放飛蚊,精神力量不足,氣場唔強,一時眼花花,乘客係人定鬼都分唔清。

再加上佢哋本住「使命必達」嘅精神,為咗車個客去目的地,港九新界周圍去,好容易進入無人小路,或者神秘結界,像是新娘潭、松仔園、元朗達德學校、華富邨、南固臺、金茂坪戲院……卡到陰嘅可能性再上升。好似上年鬼節就有的士被拍到在鹿頸行駛時,突然有離奇白光閃向的士車廂,司機急急扭軚,最終撞向一棵樹上;雖然亦有網民講笑咁話,可能只係司機大佬要用「愛X堅」啫。


2. 看更巡樓梯  牆角回魂夜

七月十四鬼門開 六大夜班工小心撞鬼

夜更保安有個重大責任:巡樓。按規定,多數一個人去巡,逐層樓梯慢慢行,空間氣氛異常沉靜,每一步都好像聽到回音,都咪話唔驚。而你知喇,香港有幾多個屋苑無死過人,就算層樓無,塊地都可能有,鬼魂想返家探吓親人或者子孫有幾出奇。

樓梯九曲十三彎,一個轉身,牆身貼近人,就好似電影《回魂夜》,消防栓、走廊、天台、大空地等,無形迫力如影隨行,就算無鬼都自己嚇死自己。


3. 駐守便利店  鬼同你買嘢

七月十四鬼門開 六大夜班工小心撞鬼

(圖片來源:Commons

二十四小時便利店,方便了夜貓出動,但店員就要被困在店裡面,秒秒On call。作為店員最最最大鑊嘅係:無得揀客。無論個客係成身臭味嘅大叔,定係飲左十打啤酒嘅夜蒲少女,或者係成身紅衫嘅長髮女子,只要佢入咗間鋪,就注定咗你要面對面回應佢。

鬼王潘紹聰早幾年喺《恐怖在線》就有集講到:深水埗便利店女鬼。店員同在店中徘徊嘅女仔傾計,清晨時,佢瞬間突然消失,無人睇到佢出入。


4. 聚集力強  警察遊走暗黑角落

七月十四鬼門開 六大夜班工小心撞鬼

(圖片來源:Commons

好多都市傳說都話警察易招惹鬼魂,點解呢?一來佢哋嘅責任係維護公義、保護市民,咁冤鬼自然想搵佢哋幫手;二來警察同罪犯息息相關,黃賭毒邊瓣死得少人。所以有人話差館本身就容易聚集各種好壞鬼怪,守夜更加係危機四伏,傳聞2012年上水差館就聽到夜半歌聲。

而且,警察仲有巡街嘅任務,幾夜都好,夠鐘就要出動,大街又好,細街也罷,總要親身行一轉。點知巡巡吓會見到咩呢?


5. 白衣護士  生老病死平常事

七月十四鬼門開 六大夜班工小心撞鬼

醫院最多就係病人,生老病死對於護士嚟講完全係平常事。佢哋係成間醫院裡面,喺最前線接觸病人,亦都對住病人時間最長。醫生都只係間中出現咋,點及護士同病人日對夜對,餵藥、換片、探熱……隨時萌生感情,咪趁住七月放假,返醫院探望吓照顧過自己嘅護士姐姐。


6. 奔馳的救護  血案巧驚驚

七月十四鬼門開 六大夜班工小心撞鬼

(圖片來源:Commons

一般救護員需上兩天日更、一天夜更,跟住放假兩天,作為一個循環。夜更由夜八點半到第二朝八點半,當值時間要留喺Depot on call冇得走。工作需要,仲隨時要出動前往交通意外現場、跳樓現場、情殺追斬現場,血肉模糊之軀見慣見熟……夜晚出車,更加係巧驚驚,唔少同行都話見過怪嘢,不過點都係要開工,因為救活人要緊!


世上夜更工作還有千千萬萬種,無論係平時,定係農曆七月,夜晚返工都係咁辛苦。所以我哋更加要向呢班無時無刻,喺社會、為家人默默耕耘嘅打工仔致敬。

話時話,鬼節嘅原理其實同之前套迪士尼動畫《Coco》好似。鬼魂其實只不過係地球上某些人已過世嘅親人,難得有日人間開放日,就趁住呢一晚時間,返到人世玩餐飽,同在世親人隔空食餐好。俗語話「平生不作虧心事,半夜敲門也不驚」,平時做人頂天立地,又使乜到鬼節先嚟驚呢。

 

延讀閱讀:

返shift人的悲哀 斷六親、燃燒健康

[行業秘聞]精神科護士大剖白:先要過三關

如何回答「點解我要請你?」

 

此文章由jobsDB HK撰寫/編輯。如欲刊登於其他網站或刊物,請電郵至[email protected]與我們聯絡。如有發現侵犯版權,原作者及jobsDB保留採取法律行動的權利。

 

無時間搵工但又想工搵你? 立即建立你的jobsDB檔案

無時間搵工但又想工搵你? 立即更新你的jobsDB檔案