上司無理要求,點樣瀟灑Say no?

上司無理要求,點樣瀟灑say no_768x512

打工仔出嚟社會搵食,預咗乜都要做。上司點你訂檯、訂戲飛、訂演唱會門券、買外賣都算係碎料,至慘叫你接佢啲仔女放學,做埋勞作縫紉,仲要去診所輪街症……唔想做佢貼身阿四,點先可以間接婉拒,又唔怕得罪佢?

將指令變成集體行動

若然上司奉旨點你買外賣,可以留意公司嘅「打電話叫外賣」群組,每日趁佢哋行動前,問老細要唔要外賣,實行順路搭單,反客為主。若然上司食無定時,就搵定附近食肆外賣紙,睇定邊間連一人份量套餐都可送上門嘅食肆就最好不過。

坦誠說明工作日程

如果上司嘅私人指令影響到工作進度,例如接貴公子放學、去診所輪街症,你可坦誠向上司說有緊急要務需要限時完成,如果推遲下去,會影響其他部門嘅工作進度,或客戶對公司嘅信任度。只要一切以公司為大,再無理嘅上司,都唔會勉強你為佢效勞。

扮晒忙處理急事,實行太極政策

雖然公事唔可以拖延,但濕碎私事採取太極政策嘅話,上司都唔可以當面責備。例如幫佢訂演唱會門券,好多時越早撲飛攞到個位越靚。當接到指令後,喺佢面前扮忙處理急事,話佢知你手上有好多工作要處理,請佢幫你列出工作的重要程度或搵其他人幫忙。

其實仲有一招:黑面。公私不分嘅「腦細」,值得俾個黑面佢,為兩餐你可能照做冇得揀,但無聲抗議都得啩?如果呢招都唔收效,就只好諗定後路另謀高就啦。

無時間搵工但又想工搵你? 立即建立你的jobsDB檔案

無時間搵工但又想工搵你? 立即更新你的jobsDB檔案