上司10大乞人憎行為:偏心、假民主、臨收工先嚟料 小薯怨聲停不了

上司10大黑人憎行為:偏心、假民主、臨收工先嚟料 小薯怨聲停不了早前引起熱話的日劇《我要準時收工》,令人覺得:「返工沒有OT真係幸福﹗」偏偏很多上司都喜愛臨收工先派job,態度「老奉」,十分討厭。以下將為你盤點10大最乞人憎的上司行事作風。如果老細你睇緊呢篇文,請改吓啦;如果打工仔你遇到呢種上司,就自求多福啦!

▪難逃惡魔上司魔爪?自保搵出路!

▪「你OT代表工作效率低﹗」涼薄說話失人心 上司應用這5句征服下屬

一、假民主  扮問「你有咩意見」  

今時今日,職場跟應世界潮流,流行講民主,但有分真和假。最怕上司在開大會時問:「大家有咩意見?咩都可以拎出嚟講。」(信你一成,雙目失明)因為無論你講咩,提出咩絕世好橋,都只有一個結果——砰!砰!砰!Ban﹗點解?因為上司心裡面已經有個答案,都諗好晒點做,佢只係扮吓嘢、扮民主。大家一起商討,幻覺嚟㗎!

510x120-v2

二、自以為是  「一定係乜乜乜」

扮民主的上司,通常還附帶一種行為:自以為是,即係懶醒。事無大小,總認為自己係真理,咩都識,了解晒整個世界上所有範疇嘅知識。無論平時閒聊,或是討論公務,佢總愛搶住應機,以一副「我就是真理」、「我講咩都啱」、「你識啲咩」的口吻講嘢,全盤否定別人。而事實,往往佢係錯嘅!做佢下屬,唯有心底反白眼,表面點頭讚美。

▪[不要再說了]5個打工仔「摟打」詞語

三、A字膊  「一早講咗要咁樣做」  

有錯就一定係下屬孭鑊,呢種A字膊上司絕對屢見不鮮。討人厭名單之最!情況輕微的呢,是一隊人一起做錯事,上司搵你出去受死,唯有講句運氣差。起碼自己都有份做錯,算數!情況嚴重呢,係明明上司自己做錯決定,而你甚至事前勸過佢,但問題出現,竟然要卸隻「死貓」逼你食。當有咩出錯,佢絕對唔會撐下屬,分分鐘再踩多幾腳。

▪置地記者:《職場易潔鑊》

四、心喺左邊  梗係偏埋一邊啦!

嗱!偏心都明嘅,人之常情,但偏到出晒面就太乞人憎。公司之中,總有啲同事同上司比較啱嘴形,食飯吹水老友鬼鬼,簡稱為心腹。當你唔喺心腹榜上面,平時做嘢,豬頭骨一定有你份,升職永無份。你做錯嘢就被鬧到全公司都聽到,同一情況發生喺心腹身上,就大事化小、小事化無。毫不修飾的偏心,行為又咁明目張膽,實在好難頂!

五、友情牌  「拍爛檔幫吓手啊!」

有事鐘無艷,無事夏迎春。上司平時就咩都公事公辦,做野一板一眼,吓吓跟足程序。對住下屬咋!食飯一定準時返到去,遲一分鐘都唔得。喺唔影響進度情況下,屋企突然有急事想請假,佢就會答你:「要一早同HR申請,啲工作又排好晒,好難做。」相反,當佢有工作要趕,就會打友情牌,要求你幫手,誇張起上來,更會臨時叫你返星期六日及公眾假期。

六、臨收工 才安排工作?

如果上司有假OT文化,工作總係積到下午才開波,咁就麻煩啦!佢自己係咁,唔緊要,但唔好要求下屬一齊OT。偏偏事實相反!佢每日都臨收工前一至兩個鐘先叫你做新嘢,完全無視你個收工時間,假定你會OT完成。應該係因為佢啱啱先開工!唉⋯⋯睇住上司一臉老奉的樣子,真係無名火起三丈。可以公平點嗎?盡早安排工作吖唔該﹗

▪菜鳥同事:分清真假「OT」文化

七、心眼細愛記仇  做錯嘢唱一年

你試過嗎?曾經喺工作上做錯一件事,因為粗心大意同一時判斷失誤,最終影響未必大,都能夠成功補救。但自此之後,上司就喺心底裏為你貼上標籤,事無大小,總係醃尖挑剔,雞蛋裏挑骨頭。然後,再重覆又重覆又重覆,你嗰一件錯事,唱夠成年,唱到樓下看更都知。

八、公私不分  做埋私人管家 

有種上司公私不分,恃住自己掌控下屬嘅升遷命,或者懶熟咁款,成日「側側膊,唔多覺」,扮曬嘢叫下屬幫手做佢私人事。例如幫佢搜集資料及計劃日本旅行行程、幫佢買演唱會票、戲飛,幫佢買花送俾老婆做周年禮物,淘寶時一定要幫埋佢買嘢⋯⋯總之呢,當正你係佢出錢請嘅私人秘書,使到盡。最過分係:「唔該」都無句。

▪日日上演塞車、湊老細、開OT,打工仔:「每隔兩秒我都想轉工﹗」

九、24小時On Call  一定要你覆電話

上司自己係工作狂,以己度人,以為下屬熱愛工作到放假都做嘢。細至平日收工後夜晚,大至星期六日或紅日,甚至連你旅行都唔放過,只要諗起同你相關之公事,就會打電話以及WhatsApp你。如果你冇即時覆,佢甚至會留言:「你好忙嗎?點解唔覆我!」大家都係打工仔,收手啦好冇?

十、偷偷望 悄悄看 監視你個MON

上司有意無意喺下屬嗰位隔離同人傾計,其實就係偷睇你係咪做緊嘢,或者做嘢進度如何。平時進度唔趕都算數,由佢睇啦,橫掂問心無愧。但有時好趕,佢仲係隔離偷睇,間中明示暗示催你做快啲,就真係好煩人啦!心裏面好想大嗌:「大方啲啦,有咩就直接問﹗」

 

延伸閱讀:

辦公室小薯:三大惡頂上司

《置地記者》:馬雲解密—996與669的因果關係

【職場媽寶】為何我們的社會愈進步,年輕人卻愈想靠父幹母蔭?