中環人要熟悉的社交技巧:(扮)感興趣?

中環人要熟悉的社交技巧:(扮)感興趣?

(愛回家/TVB)

人類文明有樣好弔詭的現象,就係唔同的民族同文化在巨大差異之中,往往又有唔少異曲同工之妙。其中一樣,就係東方的「關係」,及西方的「Connections」。

畢竟人心肉做,撇除貪污等情況以外,在冰冷的規矩下,無論東西方都好,往往依然有著巨大的「酌情」(Discretion)空間,容許決策者就他認為適當的方式處理問題。無論係搵工、搵Internship,定係做Sales要搵生意,除了自身實力與資歷以外,「識人」(Well-connected)往往令你如虎添翼,令事情更容易水到渠成。


求學時期開始已從不間斷的Networking

在這方面,西方世界的Connections相對透明化,他們的習俗與文化也提供不少機會讓你得到這樣的Connections。常見獲得Connections的方式,就包括各式各樣的Networking events,以及春夏秋冬各式各樣的Formals及Cocktail receptions等聚會。香港在這方面跟得頗貼,除了大學的High table dinners以外,也有由各學會及機構主辦的Networking events,讓學生有機會去接觸及認識學校其他同學及行內前輩。

到出來社會工作後,假如在中環擔任金融或專業類工種,呢類Networking events更加係可以用「氾濫」來形容,基本上三五七時都有各種社交場合,從公司內部的聚會與Annual Dinner,到行業的酒會,甚至係商會的晚宴與活動。對增長「Connections」甚至認識新朋友而言,究竟參加呢啲活動又有幾有用?

其實,大部份這樣的Networking events對「識人」的作用功效極為有限。正所謂「你不強大,再多人脈也沒用」,在社交場合新認識的朋友,多數以非常Awkward的Small talks開始,然後以交換卡片作結。一晚過來,收集了一大疊卡片,然後What’s next?

雖然如此,Networking events始終對大部分人以及行業而言不可或缺,今次SJ同大家分享一下,如何在這些數之不盡的大大小小社交場合「撐過去」,甚至係反守為攻,取得實際成效,或起碼係令到件事相對Enjoyable。


1. 無論點都好,(扮)感興趣

所謂「Fake it until you make it」。出來識人,最好就係對新朋友的話題與背景感興趣,但假如你已經聽過類似的Small talks以及自我介紹不下一百次,難以再真正感興趣,咁起碼都要扮感興趣,給予對方基本尊重。出來社會做野,你畀面人,人畀面你啫。而且,有時候傾傾吓,又真係會講到啲有趣的話題,一方面收吓風,一方面當學吓野,其實都可以有得著。


2. 放低部電話 嘗試搵個人講嘢

去Networking,最忌就係成晚戇居居撳電話,Check那些不存在的新郵件或WhatsApp messages,或不停碌Facebook。假如你有同其他朋友一齊去,咁就最容易,起碼有個伴可以傾吓計;即使無,都應該盡量爭取機會同個Host打招呼,或者向附近的人伸出友誼之手,自我介紹又請教吓對方的背景,搵啲嘢講吓。

其實,呢類Networking events,有一大部分人都係同你一樣,想同人講吓嘢但又覺得尷尬怕醜,假如你肯做主動,已經可以話係贏在起跑線。而且,你同眼前的陌生人攀談,佢隨時會係未來僱主或裡面的話事人,假如你大大方方而且講嘢有文有路,分分鐘可以幫你爭取到個Internship offer或者面試機會。

中環人要熟悉的社交技巧:(扮)感興趣?

katesheets/flickr)


3. 留意場地及出席賓客

同陌生人傾談,難免以Small talks做開場白,甚至係一直都會Small talk。要成功「搵啲嘢講」,其中一個祕訣,就係留意你身處的場地,以及出席的賓客,從中發掘話題。例如,假如留意到一位出席者戴著母校的領帶,即使你並非校友,都可以以此展開話題;留意到對方身形高大,適當時候亦可以問對方有否打籃球或踢足球,隨時可以打開一個新話題。最普遍來講,都可以講吓大會安排的食物,當然,最好有讚冇彈啦,如果唔係原來對方就係搞手的話就好尷尬。


4. 嘗試同Host影張相  

其實,大部分人都唔會記得在Networking events講過咩嘢或者見過咩人,所以如果情況適合,搵個機會同個Host影張合照,順便把握機會同個Host傾幾句、自我介紹一番,一方面可以作為你出席過的印證,另一方面又會令到Host覺得備受尊重,簡直係Win-win。畢竟,即使係搞手,一樣會擔心自己個Event搞得唔好而大家來到都唔Enjoy,而且通常都好希望大家畀吓面,而非被大家漠視。所以,提出同個Host影張相,對方通常唔會拒絕,而且非常樂意添!


5. Send個Follow-up電郵或短訊

正如以上所講,個活動完結後,其實大部份人都唔會點記得當晚發生的人和事,除非有特別深刻的事情。呢個時候,假如你Send個Follow-up電郵或短訊,簡單講吓自己很高興出席了活動,附上合照,並期待下次活動,一個咁簡單的動作,就好可能令對方對你留下深刻印象。當然,寫呢類電郵或短訊時亦最好避免「Try too hard」咁寫篇千字文,以免對方覺得你太Keen而怕咗你。


6. 去多啲呢類活動 將來嘗試自己Host

後生仔女出來社會,要有好似「熱能探測導彈彈頭」咁,追蹤一切「煩/悶但係有益」的活動,其中包括呢類Networking events。去多啲,一來識多啲人,二來習慣出席呢啲場合,長遠而言對事業有莫大益處。而且,將來有機會的話,自己可以爭取成為搞手,當你做到Host/Panel Speaker,你就會發現Networking events真正價值係可以點樣釋放出來。但當然,呢個係無得強求,亦難以預測,最緊要係不求回報,努力學習啦!

中環人要熟悉的社交技巧:(扮)感興趣?

gGraphy/flickr)


SJ結語

Networking events同去練跑步有幾分相似:一般來講你唔會想去,寧願躲在家煲劇或同幾個豬朋狗友食個雞煲吹吓水。但假如你真的去咗,而且堅持下來,你會發現它的好處之餘,又會開始享受過程。而且,無論你上一次跑得幾快,上一次的活動有幾Smooth,今次又係新的一次練跑,要重新熱身同進入狀態,而去Networking都係一樣,變幻無窮,每次都可能認識新朋友或找到新機會,亦可能乜都無,視乎自己造化以及運氣,或者呢個就係佢最大吸引之處。

 

StealJobs.com主編──SJ

 

全面透露各行各業入行攻略,上位貼士,以及行業秘聞。

 

檢視此作者的所有文章

 

延讀閱讀:

StealJobs:中環人收入的高山低谷

StealJobs:其實 識做Sales先係王道

StealJobs:如何在求職面試突圍而出?

 

此文章由原作者及jobsDB HK撰寫/編輯。如欲刊登於其他網站或刊物,請電郵至[email protected]與我們聯絡。如有發現侵犯版權,原作者及jobsDB保留採取法律行動的權利。

 

無時間搵工但又想工搵你? 立即建立你的jobsDB檔案

無時間搵工但又想工搵你? 立即更新你的jobsDB檔案