乞客:做餐飲搵幾銀?

乞客:做餐飲搵幾銀?

炒散的黃金時代

可能你成日聽人講,近呢幾年餐飲業非常之人手短缺。其實,餐廳請掃把級(Supervisor)或者經理級(Manager)嘅話,大把人爭崩頭嚟見工;但低層崗位嘅職位就長期缺人,要請一個普通侍應同洗碗姐姐簡直難過登天。

所以當你去餐廳食飯嘅時候,可能你會見到來來去去都係啲黑衫西裝友(經理級)。而如果你隨便拉一個小伙記過嚟問問題,佢好少可能夠完全解答到你問題,因為其實佢好大機會係一位炒散,即非固定兼職員工。

點解而家會有咁多人做炒散?原因係呢個行業出名工時長、少假、入行薪金低,所以越來越少新血會入嚟做固定員工。相反,而家炒散可以拎到60幾蚊一個鐘,仲可以自己揀返咩鐘,自由自在,又點會有人想拎萬一、二蚊人工同你日日捱生捱死?有時仲要無假放添⋯⋯


餐飲人價目表──全職篇

如果你或者你嘅親友考慮緊加入餐飲業,當然要知道搵幾多錢先啦。以一間中價西餐廳嚟講,樓面不外乎基本4個職位:

  • 最低職位係侍應Server,薪金介乎$12,000-$15,000
  • 上一級係Supervisor,又稱掃把,薪金介乎$15,000-$18,000
  • 再上一級副經理Assistant Manager ,薪金介乎$18,000-$20,000
  • 餐廳最高級嘅經理Manager,薪金介乎$20,000-$30,000

如果再細分、再專門啲會有Senior Server、Captain、Bar Manager、Receptionist等等,公司規模再大啲仲會有Regional Manager區域經理。不過,餐廳嘅位置亦都會影響薪金,例如中環區需要英文能力高嘅人,薪金固然會較高;有某啲小型餐廳嘅普通Server,薪金可以高達$18,000,同其他地區嘅Supervisor不相伯仲。除咗呢份基本薪金外,一般餐廳都會有每月額外小費,$1,000-$3,000不等。


餐飲人價目表──炒散篇

兼職人工方面,以西餐廳嚟講:

  • 基本上你有手有腳都會有最低$50/hr人工
  • 有經驗嘅一般都會有$60-$65/hr
  • 如果你表現出色,公司亦有機會調整你嘅人工,最高可達$75-$80/hr

不過,同全職職位一樣,地區都會影響人工,旺角區普遍$50-$60/hr,尖沙咀$60-65/hr,而中環就最高,起跳都起碼有$65/hr,做夜更、通宵更有時仲可以高達$100/hr。

另外,有啲餐廳又會容許兼職侍應收客人嘅掩手小費 ,收入又變相增加。我有一位非常勤力嘅朋友,佢幾年來只做炒散,同全職一樣一星期放一日假,有時每日做十幾個鐘,每月薪金可以去到$20,000,非常厲害!

之不過,炒散就無確保每個星期一定有更畀你返,同埋一般長工有嘅每月額外小費、強積金、醫療保險乜都無,所以自己做之前就要平衡返抵唔抵啦。


Any肥,以上都係作為參考啫,可能你嗰區人工會再高啲或者低啲,總之你自己覺得做得開心,人工合理就夠啦!

不過如果你做緊個職位低於普遍市價,又自覺十分辛苦同壓力大,其實都可以考慮吓唔做前線樓面,轉做幕後洗碗!事關我聽聞喺中環做一位洗碗姐姐都有$15,000, 一星期放兩日假,完勝一眾入職$12,000仲要免費無限OT嘅Office工,仲要以後唔使對住班乞客,你說爽不爽?

  

店小二Mary

 

90後大學設計系畢業,任職餐飲接近10年,初初做飲食純粹玩吓做吓炒散,到試過做office工,反而鍾意做返侍應。10年嚟serve過唔少經典麻煩客人,故開設FB專頁「乞客 The Beggar in the Restaurant」分享餐廳搞笑事及職場嘅各種心酸屎。

 

檢視此作者的所有文章

 

延讀閱讀:

乞客:餐飲人的六個絕技

乞客:餐飲職場上8大不該同事

乞客:餐飲工 vs Office工大不同?

 

此文章由原作者及jobsDB HK撰寫/編輯。如欲刊登於其他網站或刊物,請電郵至[email protected]與我們聯絡。如有發現侵犯版權,原作者及jobsDB保留採取法律行動的權利。

 

無時間搵工但又想工搵你? 立即建立你的jobsDB檔案

無時間搵工但又想工搵你? 立即更新你的jobsDB檔案