乞客:小費去哪兒?

乞客:小費去哪兒?

喺呢個唔少餐廳強制性要畀10%服務費嘅香港地,好多朋友仔都覺得唔需要再額外打賞小費。事實上,香港餐飲嗰10%服務費並唔屬於打賞員工嘅小費,而且亦並非由員工所瓜分。


10%公司袋,小費員工袋

一般嚟講,香港地嗰10%服務費都係公司袋返,而所謂嘅Tips主要係指10%以外嘅小費,亦係餐飲員工月薪以外額外嘅收入。呢份額外薪金可以低至$300或者高至$3,000不等,視乎餐廳大小及級數而定。而呢份小費都會全部瓜分畀全職員工。

多數餐廳會按比例瓜分,例如:樓面同事佔六成、廚房同事佔四成。而有一啲餐廳會係畀負責嗰張枱嘅員工拎返,而呢個方法就各有利弊。利處當然係令每位不論係全職定係兼職樓面員工更積極去滿足客人要求,從而提升服務水平;但弊處就係對其他有份一同工作嘅幕後同事唔公平。所以,好多餐廳都選擇前者方式處理小費。

其實,小費嘅原意係客人對今次嘅服務表示滿意,用嚟打賞同鼓勵員工嘅錢。不過,有啲公司除咗10%服務費之外,竟然連額外小費都要袋埋,真係令人百思不得其解!因為喺一啲西餐廳,小費收入可以高達$3,000,對於月薪比較低嘅員工嚟講,其實係好重要嘅補貼。


幾毫子畀你留返嚟買樓

雖然收到小費係開心,但有啲人畀小費嘅方式真係令人不敢恭維。首先,你要明白畀小費同「留低幾蚊」係兩個概念嚟。試過有位乞客BB拎走晒個Fold入面所有錢,最後留低個5毫子畀我話係小費;或者有啲乞客BB拎剩一蚊就大大聲叫:『你拎去啦,畀你袋㗎。』其實呢啲根本就係明玩嘢同極羞辱人嘅乞客行為,我唯有抑制住怒火話:『唔需要啦先生,留返搭車啦你^^』。

其實如果係真心想打賞人,應該至少畀張10蚊或20蚊紙,幾毫子、幾蚊雞真係畀你留返嚟買樓啦。又或者其實你係唔想袋咁多散紙喺身,咁你留喺個Fold入面係絕對無問題,但就唔好喝人、叫人「袋啦你」、「畀你洗」呢啲咁引人犯罪嘅傻話。


需無求Tips之心,但仍感激每份打賞

香港作為投訴之都,店小二但求客人正正常常唔投訴已經柯呢吉帝,已經唔期望會收到Tips,但係好多乞客BB就覺得畀10%已經好似食咗佢首期咁。試過有次幫客人加水唔夠手長,有位小姐打算幫我拎起佢媽媽個水杯,佢阿媽竟然一嘢打落佢個囡隻手話:『我哋有畀10%,使乜幫佢!』

所以,本人求Tips之心早已死。之不過,如果有客人畀Tips我,我都會非常感動。因為咁係代表佢覺得我值得打賞,值得表揚,滿意我嘅服務,即使我係做兼職冇得袋返。


點樣確保係佢袋呢?

話說餐廳小費好多時候都只有全職員工可以瓜分得到,所以如果你喜歡嗰個員工係兼職,佢未必收得到你嘅打賞。呢個時候你就可以用一招『握手傳錢法』,就係將你想畀佢嘅嗰張20蚊紙摺到細一細,喺同佢握手講Bye Bye嘅時候交畀佢。

當然,有機會啲薯仔經理會執正嚟做話唔畀袋啦,不過其實好多公司都會容許嘅。另外,新年時節你更加可以光明正大畀利是佢,因為利是嘅錢都可以由員工自己袋返嘅。不過,我都聽聞大公司或者酒店業係連利是都唔畀收嘅;咁你就可以選擇寫封表揚信啦。


一張意見書勝過一張20蚊紙

雖然收到小費我哋會好感動,不過更感動係客人親手寫嘅一封意見信/表揚信。記得有次有一班客人為朋友搞生日驚喜Party,而我就幫佢哋安排枱、佈置同介紹餐牌。第二日,佢寫咗一篇超長嘅英文表揚信,仲連同我哋嘅合照Email咗去公司Head office,而公司非常開心之餘仲要經理們印出嚟貼喺各間分店Notice board。雖然張相影到我非常之核突,但嗰篇長長嘅表揚信真係好窩心,而且令我整個月心情都超好,做嘢更積極。

所以大家如果想真正表揚同打賞一位你覺得服務得你好好嘅侍應,其實未必一定用錢,意見書同Review分分鐘更加嚟得窩心同體貼。


題外話:

喺好多國家,客人都需要畀一定嘅合理小費,事關餐飲從業員可能係無底薪保障。試過有位朋友到美國芝加哥某餐廳食飯,人哋問佢覺得點啦,佢答「Everything is excellent」但竟然冇畀Tips。最後,激到成間餐廳侍應追出去問點解。結果搞咗一輪畀番Tips先平伏到一眾激動侍應嘅心情。

Any肥,喺呢個好多人都覺得服務人員態度差劣嘅香港地,如果你發現一位積極工作,服務一流嘅員工,不妨考慮畀一份小費或者寫一封表揚信,好讓呢一位清泉員工有繼續努力嘅動力。

  

店小二Mary

 

90後大學設計系畢業,任職餐飲接近10年,初初做飲食純粹玩吓做吓炒散,到試過做office工,反而鍾意做返侍應。10年嚟serve過唔少經典麻煩客人,故開設FB專頁「乞客 The Beggar in the Restaurant」分享餐廳搞笑事及職場嘅各種心酸屎。

 

檢視此作者的所有文章

 

延讀閱讀:

情人節晚餐:侍應8個OMG Moments(2) 

情人節晚餐:侍應8個OMG Moments(1)

地盤佬日誌:澳漂工程佬

 

此文章由原作者及jobsDB HK撰寫/編輯。如欲刊登於其他網站或刊物,請電郵至[email protected]與我們聯絡。如有發現侵犯版權,原作者及jobsDB保留採取法律行動的權利。

 

無時間搵工但又想工搵你? 立即建立你的jobsDB檔案

無時間搵工但又想工搵你? 立即更新你的jobsDB檔案