乞客:餐飲用語圖

乞客-餐飲用語圖-1話說做咗好多年餐飲都聽過唔少嘅餐飲用語,有啲term做飲食嘅冇可能未聽過㗎啦,好似冧檔呀、爆荀呀、打貓等等。如果有部份你未聽過,有機會喺我以前餐廳啲前前前輩研發出嚟嘅。而我最新學到嘅一個term就係指示牌。唔知大家又有冇啲餐飲用語想分享下呢?510x120-v3

 乞客:我唔知你知唔知嘅餐飲業小知識

 【酒店兼職當旺】「418條款」約束工時 炒散人士願打多幾份工

  1. 遇溺—形容客人舉手動作
    客人舉手就好似喺大海中遇溺等人救嘅人咁樣。有時候,經理見到啲樓面睇唔到個客舉手,就會話:「個客遇溺啦,你快啲過去救佢啦!」
  2. 空手道—形容樓面工作表現
    某啲高級餐廳出餐係要規定使用托盤,即使只係得一碟食物或者一杯飲品。當有侍應淨係用手出餐,上司就可以話佢練緊「空手道」啦。
  3. 畫地圖—樓面落單方式
    除咗數位之外,畫地圖係另一個方式去記低每位客人嘅order。例如一張長枱8人,就畫8格。方便出餐同事及自己作分單紀錄。
  4. 爆荀—形容工作現象
    荀係section嘅簡稱,爆荀就即係指成個section full晒爆滿。
  5. 冧檔—形容超級忙工作現象
    機紙無晒、水酌個個都吉晒、唔夠碟用、無晒tray、啲客啲信用卡疊晒喺度等埋單、啲客又係咁叫人,成個檔口(工作sideboard)經歷災難咁,就為之冧檔啦。
  6. 打飛機—樓面後場工作
    銀器用洗碗機清潔未必完全乾淨,太耐唔處理更會有水漬令銀器睇落去好似污污糟糟咁。後場同事會用檸檬角加熱水先浸銀器,然後再用乾布打亮,呢個動作與打飛機相似,因而命名。
  7. 打河—廚房工作位置
    負責企喺出單機接Order紙,指令其他廚師煮乜,同指令出餐樓面出菜。
  8. 打水—樓面準備工作
    打水指將空水酌斟滿。
  9. 打冰—樓面準備工作
    打冰指由製冰機取冰Fill滿酒吧冰槽或其他需要冰嘅地方。
  10. 打貓—偷食行為
  11. 呼吸—去食煙代名詞
  12. 指示牌/企鵝 —形容同事表現
    淨企唔太郁、唔係好想做嘢、好廢嘅同事。
  13. 掃把—supervisor
  14. 炒散—一般指工作地方唔定嘅兼職人士
    有炒散會日日去唔同地方做新人,享受唔困身無乜責任嘅自在感。有炒散就會喺一個地方度長做,變長期Part-time又稱長炒。炒散出糧會比長工快,以一日結算或一週結算,有畀現金亦有出支票。
     即刻入嚟睇吓各區至荀兼職!
  15. 蛇頭—炒散經理人
    以前無而家咁多App去搵散工,要做炒散通常都係要跟一位炒散經理人搵食,而呢位經理人俗稱叫蛇頭。蛇頭會同餐廳合作去了解邊日邊段時間需要炒散,然後安排炒散去邊度返工。不過跟蛇頭有一個壞處,就係唔可以私下去心儀嘅餐廳工作。即做你收一樣人工,但其實餐廳會畀多啲啲錢蛇頭作為蛇頭費,你私下工作變相蛇頭就無咗筆錢啦。
店小二Mary
90後大學設計系畢業,任職餐飲接近10年,初初做飲食純粹玩吓做吓炒散,到試過做office工,反而鍾意做返侍應。10年嚟serve過唔少經典麻煩客人,故開設FB專頁「乞客The Beggar in the Restaurant」,分享餐廳搞笑事及職場嘅各種心酸屎。

 

閱讀:

食店老闆的煩惱—大廚超難搵 食店長缺靈魂人物點營運?炒散廚成大勢所趨?

乞客:五個唔make sense嘅優質客官金句

乞客:餐飲界猛人轉工之三大Steps!

此文章由原作者及jobsDB HK撰寫/編輯。如欲刊登於其他網站或刊物,請電郵至[email protected]與我們聯絡。如有發現侵犯版權,原作者及jobsDB保留採取法律行動的權利。

無時間搵工但又想工搵你? 立即建立你的jobsDB檔案

無時間搵工但又想工搵你? 立即更新你的jobsDB檔案