乞客:餐飲界猛人轉工之三大Steps!

又踏入新嘅一年啦!睇完上次篇「5個餐飲界朋友應該離職的原因」,朋友仔有無啲心思思喺新嘅一年轉工呢?好啦!雖然市面上有好多餐飲工請人,不過都係要睇定啲好!千祈唔好傻吓傻吓轉咗份仲差過以前份垃圾工呀。瑪莉建議各位打算轉工嘅猛人做好呢三個steps,去審視一下嗰份潛在新工,是好是壞。

乞客:餐飲界猛人轉工之三大Steps

Step 1: 做Research睇下新公司所有網絡平台

睇公司網絡平台除咗可以了解到嗰間公司嘅價位、地理位置同人氣之外,仲睇得出潛在客人質素同公司對麻煩客人嘅處理手法。如果該公司經常出現喺各大優惠平台,提供20-50%off嘅優惠。呢間餐廳發現乞客嘅機會,會高達百分之九十九。唔係話用得優惠就係乞客,但乞客好大機會有優惠先會去餐廳消費。唔須要我再多講半價優惠會引申咩問題,總之呢類型餐廳只會萬劫不復地減價,客路會越做越賤,受氣機會有增無減。除非你鍾意做呢類客源,有得揀都唔好揀呢類餐廳。而且,肯做咁多呢啲半價優惠嘅餐廳老闆個腦袋都係……

面對投訴點樣處理可以睇得出一間餐廳嘅待客之道。當然喺呢個顧客是皇帝嘅國度,有投訴好多時PR都會送乜送物去補鑊。但遇着一啲搞笑投訴,例如個客話支裝水要收錢呃人、星期六walk-in要我等位,如果PR/老闆肯好言相勸呢類顧客,教懂佢哋做人應有嘅知識。你喺呢度做嘢起碼會有尊嚴,唔需要郁啲就跪低同客道歉,因為呢間餐廳嘅老闆有一般人分辦是非黑白嘅能力。

 ▪50句飲食業者最憎嘅麻煩客說話,你聽過幾多句?

Step 2: 搵個平日到場食個晚飯

平日到場食個飯,因為唔會太忙,所以有更大機會了解到間公司員工質素、工作流程同餐廳情況。

員工質素係好直接影響你日後嘅工作快樂指數,如果你去到過半場都係啲企喺度唔郁,舉手又唔應嘅黑面神同事,呢份唔轉都罷啦。最重要係你亦都可以了解一下該公司嘅員工比例。如果成間餐廳全部經理級,長工又少,你走去見個Serve仔。除非你本身個人鍾意虐待自己,如果唔係都真係唔好入去做。一來你會成日Part埋啲質素參差嘅炒散做嘢,二來個個經理都可以點你做嘢,到時你夾喺中間。當冧起檔上嚟,唔通叫個經理幫你抺銀器執枱咩。真係鑊又你食,屎又你抺。

由落單出餐埋單等等嘅工作流程都可以令自己知道呢個style啱唔啱做。有啲餐廳可能非常輕鬆,碟都唔需要換一個,setting簡單無餐巾得紙巾,快嚟快去。有啲餐廳行高檔路線,需要不停check back、換碟換餐具、要識推promotion、與客人交流,或者要了解好多餐飲禮儀如要注意客人餐具擺放示意食完收得等等。

除咗坐喺自己個位外,如果有機會望到都留意下Sideboard、Bar、Open Kitchen嘅情況,會唔會混亂萬分。會唔會用晒機紙一碌碌喺sideboard無人執,無人掉單插單?定係井井有條,乾乾淨淨呢?如果間公司亂過狗竇,證明員工對自己公司歸屬感唔強,上司亦懶去管理。雜亂無章嘅公司,入去中伏嘅機會頗高。

▪乞客:餐飲人的六個絕技 

Step 3 : 去見工了解福利


一般來講,就算無乜經驗嘅人,一個Serve仔嘅崗位都已經有$13000-$15000。如果地點喺中環區,識英文嘅$18000都有。詳細嘅薪金情況,又可以參詳返瑪莉之前寫嘅「乞客:做餐飲搵幾銀?」而最近同幾間公司同事傾過計,原來一個月六日假已經係好基本。仲要有公司已經開始行五天工作制。雖然返嘅鐘數係一樣,但就有多個選擇畀同事。你可以自己揀一日返多幾個鍾去拎2日day off定係一日返少啲,拎1日day off。咁當然大前提係你去做嗰間公司夠full time啦。同埋好多餐飲都開始無落場更。咁當然唔係間間公司都咁前衛(對香港來講),但係等你得個知字,真係有公司做緊呢啲措施。

Any肥,唔係間公司福利唔好或者老闆傻仔就要轉工,做開有感情你又開心嘅咪繼續留底囉!做餐飲就最好嘅,唔憂無工做,最怕你唔做啫!如果真係唔開心又想搵多啲銀嘅,趁住新嘅一年咪畀個新挑戰自己!同垃圾舊公司喺2019講句sayonara,happy new year 啦!

想轉過間餐廳搵多啲?餐飲筍工撳呢度﹗

 

店小二Mary
90後大學設計系畢業,任職餐飲接近10年,初初做飲食純粹玩吓做吓炒散,到試過做office工,反而鍾意做返侍應。10年嚟serve過唔少經典麻煩客人,故開設FB專頁「乞客The Beggar in the Restaurant」,分享餐廳搞笑事及職場嘅各種心酸屎。

 

延讀閱讀:

乞客:做餐飲搵幾銀?

乞客:5個餐飲界朋友應該離職的原因

入行28載,半島酒吧侍應如何一步步攀至餐飲部總監?

此文章由原作者及jobsDB HK撰寫/編輯。如欲刊登於其他網站或刊物,請電郵至[email protected]與我們聯絡。如有發現侵犯版權,原作者及jobsDB保留採取法律行動的權利。

 

無時間搵工但又想工搵你? 立即建立你的jobsDB檔案

無時間搵工但又想工搵你? 立即更新你的jobsDB檔案