乞客:餐飲職場上8大不該同事

雖然店小二Mary好鐘意餐飲呢個行業,不過有人嘅地方自然就會有是非、閒話同埋不該嘅人,所以今日Mary就會同大家講吓餐飲職場上嘅8大不該同事。

乞客:餐飲職場上8大不該同事

1. 遊魂Hea蟲

呢種同事日日返公司只有一個目的──偷懶。做做吓嘢可以突然死去屙半個鐘尿,或者Take十幾分鐘煙Break。就算係企喺自己嘅工作崗位上面,都好似靈魂出竅咁,永遠見唔到客舉手,有Food唔識出,淨係企喺度……真係放塊紙板喺樓面都好過請佢。


2. 卸膊俠

逢親有咩大鑊事發生,例如收到某VIP向老闆投訴服務,上頭鏟落嚟要照肺嗰陣,佢一定第一個企出嚟⋯⋯講:「唔關我事。」「我唔喺度。」甚至直頭屈其他人:「我記得好似係邊個邊個埋枱㗎。」

如果經理係卸膊俠,仲會置身事外,鬧晒全世界:「你哋畀個Reason我!點解可以發生啲咁離譜嘅事。」好似佢完全無份咁,但明明其實佢自己當時都在場。


3. 邀功擦鞋狗

如果你條Team入面有呢種同事,你會發現當大家做到條數過到Target,或者某個Seasonal item大賣,結果都「好似」係一定關嗰個人事,仲一定係因為佢喺度,大家先做得到。

通常呢啲同事都會係經理級嘅人材,但其實個個都知佢嘅實幹能力係零,唔好話要佢炒場,有時連個Seasonal menu食物賣乜都唔係好知。但因為佢係老闆御用嘅忠心狗,又或者係資歷嘅問題,所以次次佢衝出去領功,老闆都會傻豬豬地信晒,仲讚佢Well done。


4. 雙臉是非精

呢種人最愛嘅劇集一定係《攻心計》。佢成日想成為眾人嘅Buddy,表面睇落又極Friendly;但事實上佢不知幾識放暗箭,仲要玩弄人感情。明明呢頭同你講邊個邊個好廢好賤,轉過頭可能反而同阿邊個邊個講你嘅不是。其實,佢根本從來唔當同事係朋友,只係想人人都鐘意佢,咁佢就可以利用你,以備不時之需。

乞客:餐飲職場上8大不該同事

5. 自私的足球小將

呢種同事明知第二日要開早,都會走去唱通宵K,然後就話自己病、唔舒服、發燒,專揀啲最忙嘅日子嚟射波,理得你唔夠人炒場!

呢種人從來唔會Care其他同事會做死、無得放假、無得落場。總之自己個更寫咗12點到9點,一到9點就一定要Sharp走,理得你冧晒檔吖,我就係唔OT呀吹呀。


6. 似老賣老老Seafood

老Seafood同事總會堅持佢做開嘅一套古老方法,即使嗰啲Standard同做法其實係幾咁廢同無效率都好,都唔容許任何人去修改!

以前有位老Seafood要我哋將客人帶嚟嘅Coupon mark名同電話,跟手再影印,再將張Coupon同影印本釘好,放入一個Folder度。咁其實張Coupon都已經Mark咗名,又留低張Coupon正本,點解仲要多舊魚去影印呢?最好笑嘅係,個Folder一年清一次,亦無人將資料入過電腦,咁請問係咪純粹浪費人力物力?


7. 放負達人

呢啲達人成日都覺得自己係全公司最辛苦最勤力嗰位,次次炒親場都不停24小時聽佢Loop一啲勁負面嘅嘢,搞到人人都唔想Part佢做嘢。佢嘅口頭禪係:「乜都我做晒啦!」「無人幫我㗎?」「搞錯呀又翻我枱!」「我唔撈啦!」

有時佢哋除咗講負面嘢之外,仲會專登大大力咁閂啲櫃桶,行過撞到你又唔會Say sorry,仲長期都係黑面神咁嘅好樣。


8. 老奉王

老奉王視團體精神如無物,一向我行我素,老奉要人幫同十級無手尾。例如佢斟晒成Jar水畀客之後,會將個吉Jar放返原位,逼其他同事Fill,十分無手尾;有時明明自己好得閒,佢都會叫其他同事幫佢枱客埋單換碟清枱。如果女性嘅老馮王,仲會拒絕做一切佢覺得只有男士先有力做嘅搬搬抬抬工作,即使餐廳好多員工都係女性,佢都會覺得:我就係唔搬呀,吹咩!


正所謂更廢嘅柴都可以燒咗佢拎嚟取暖!與其日日畀呢班不該同事激餐死,不如嘗試發掘吓佢哋嘅優點,再加以利用,例如:送阿Hea蟲去畀老闆照肺,佢都唔知人哋鬧緊佢,咪無人有Hard feeling囉。

不過⋯⋯無論餐飲或者Office工都好,如果你間公司啲柴除咗廢之外,仲要係濕嘅話呢……我勸你都係早走早著,唔係遲走就訓唔著㗎啦!

  

店小二Mary

 

90後大學設計系畢業,任職餐飲接近10年,初初做飲食純粹玩吓做吓炒散,到試過做office工,反而鍾意做返侍應。10年嚟serve過唔少經典麻煩客人,故開設FB專頁「乞客 The Beggar in the Restaurant」分享餐廳搞笑事及職場嘅各種心酸屎。

 

檢視此作者的所有文章

 

延讀閱讀:

乞客:餐飲工 vs Office工大不同?

乞客:小費去哪兒?

情人節晚餐:侍應8個OMG Moments(2) 

「點解我咁唔鍾意啲90後員工」

 

此文章由原作者及jobsDB HK撰寫/編輯。如欲刊登於其他網站或刊物,請電郵至[email protected]與我們聯絡。如有發現侵犯版權,原作者及jobsDB保留採取法律行動的權利。

 

無時間搵工但又想工搵你? 立即建立你的jobsDB檔案

無時間搵工但又想工搵你? 立即更新你的jobsDB檔案