乞客:餐飲職業病

乞客-餐飲職業病

餐飲業都算係勞動性高嘅職業,除咗日日閒閒哋企8、9個鐘,仲要做好多搬搬抬抬嘅工作。但其實除咗一般身體上嘅病痛,例如腳痛、腰痛、關節勞損等等,作為一個行走江湖多年嘅資深餐飲人,我相信你都會有以下呢啲非生理嘅餐飲職業病。

510x120-v6

1.《隨時聲優》

做得服務業嘅都明白高8度嘅重要性。高8度雖然係把難聽嘅假聲,但畀人嘅感覺真誠有禮開心,低沉嘅聲線就會令人覺得你個人好頹廢。所以當你面對客人嘅時候,會有第二把聲線出現。有時收工放假聽電話唔為意,仲會同朋友喺自己電話做埋餐廳greeting添﹗

▪ 跟地獄廚神Gordon Ramsay工作是否地獄?入室徒弟現身說法

2.《時刻有禮》

每當有客人喺身邊行過,我哋都會好自然神經反射地爆句「多謝晒下次見」。而當我哋做嘢嗰陣同客人完結一段對話或者講再見嘅時候,都會係講「多謝晒/多謝晒下次見」。久而久之,當我哋係客人嘅時候,走嗰陣都會不知不覺地同服務人員講咗「多謝晒下次見」而唔係「唔該晒byebye。」

3.《突然重拾記憶》

做得飲食業都知道當大家一on floor嘅時候,時時都要multi-task,隔離冧檔又要幫下手,出餐出唔切又要幫下手,搞到個腦每分每秒都要不停做tasktask。但最鋒利嘅刀都有生鏽嘅一日,總有啲嘢你會唔記得。而好神奇地,當你個人靜落嚟準備瞓教嗰下,你先醒返起未畀19號枱支tabasco同埋有個booking寫咗紙仔未入system

▪ 食店老闆的煩惱—大廚超難搵 食店長缺靈魂人物點營運?炒散廚成大勢所趨?

4.《隨時準備落單》

作為一個專業嘅侍應,紙同筆絕對係你嘅人生法器之一。你個褲袋永遠都有幾張皺到不堪嘅紙,而衫袋永遠都會插住一支筆,呢支筆雖然未必係最貴嗰支但一定係最順滑好寫嗰支。而你嘅locker永遠都有幾本寫咗幾頁嘅notepad,同幾支okay好寫、無冚個蓋、偷返嚟嘅原子筆。

5.《執著擺位》

無論去到人哋屋企食飯、同Friends去其他餐廳食飯、自己屋企開飯,如果突然枱面上放有三大基本餐具,刀、叉、羹,你都會好自自然然擺返岩你公司個standard擺位,仲會驗屍咁驗有無指摸⋯⋯有嘅仲會幫佢打返靚仔佢。如果有餐巾喺身,又會褶到靚一靚仔先離坐。其實唔係你想扮型扮識嘢,只係好多嘢慣咗手勢。

▪ 乞客:餐飲用語圖

6.《畀信用卡人》

話說喺呢個高速炒場年代,作為一個飲食人經常都要快速埋單,一手十幾fold畀客簽單乃係等閒之事。而當你出街買嘢簽單,你會好順手地做咗同一Set嘅動作,自動拎咗張面底(Bank/Merchant Copy),將底單(Customer Copy)同自己張卡畀個服務人員。我試過⋯⋯我真係試過。

如果你患上咗以上嘅職業病,其實都好正常嘅,除咗有時尷尬少少,一般嚟講都唔會有咩大問題。中晒六樣嘅又長期發作就可能需要take一個break畀自己休息一下。重重覆覆嘅對客模式真係好易上腦㗎,有陣時我會連發夢都砌緊啲枱點入⋯⋯而要絕對根治呢啲餐飲職業病嘅方法,就只有離開飲食業先得啦⋯⋯

▪ 點解餐飲業咁難請人?茶餐廳老闆娘狂呻:「而家啲人鍾意炒散多過全職﹗」

店小二Mary
90後大學設計系畢業,任職餐飲接近10年,初初做飲食純粹玩吓做吓炒散,到試過做office工,反而鍾意做返侍應。10年嚟serve過唔少經典麻煩客人,故開設FB專頁「乞客The Beggar in the Restaurant」,分享餐廳搞笑事及職場嘅各種心酸屎。

 

閱讀:

乞客:香港待客四大模式

乞客:餐飲用語圖

乞客:我唔知你知唔知嘅餐飲業小知識

 

此文章由原作者及jobsDB HK撰寫/編輯。如欲刊登於其他網站或刊物,請電郵至[email protected]與我們聯絡。如有發現侵犯版權,原作者及jobsDB保留採取法律行動的權利。

無時間搵工但又想工搵你? 立即建立你的jobsDB檔案

無時間搵工但又想工搵你? 立即更新你的jobsDB檔案