乞客:5個和廚房大佬相處的感動回憶

乞客:5個和廚房大佬相處的感動回憶

話說初初做餐飲時期,我係好驚同廚房大佬講嘢。我覺得佢哋好似啲黑社會大佬一樣,背後有無數手下,入親廚房個個都目露兇光,莫講話正面問佢哋一個簡單嘅問題,連同佢哋打個招呼都淆晒底。但做餐飲日子耐咗,自己亦炒過無數間餐廳之後,我就發覺其實好多大佬們都係外表兇狠,內裡係一個溫柔體貼到爆炸嘅好爸爸/大哥哥。


1. 百分百信任你

好多樓面都試過明明自己無打錯單,但係就畀啲乞客無理改單,總之就彈返轉頭要你做過另一樣畀佢。當你戰戰兢兢咁行入廚房,以為師傳會立即黑你面,仲要解釋十幾次都可能唔整畀你;事實上我班大佬總係話:「唔緊要,馬上做畀你!」半個問題都不問,完全信任你,體諒你。


2. 樓面廚房不分你我

好多人都以為樓面同廚房一定要對立,你有你冧檔,我有我休閒。但我班大佬們,覺得大家係一個團體,應該互相幫忙。有次星期五,大佬知道我哋樓面有3個同事射咗波,得返4個人睇全場80人。佢竟然立即穿起樓面圍裙,企出廳面準備幫手迎接人海,認真係有難同當!


3. 關心每位同事

除咗平時食飯會加吓菜式,我班大佬閒時仲會煲吓涼茶,等位位同事都有得下下火。試過有排同事失戀唔開心,大佬仲整咗啲餐牌以外嘅甜品,等大家一齊開心吓。仲有次我作感冒,大佬專登整咗可樂煲薑我飲,真係諗返起都好鬼窩心!


4. 唔關佢事都幫你解困

有一次,樓面有一隻超級大嘅小強喺街外爬咗入嚟,好在因為地板黑色,所以難以被客人發覺。之不過我係非常怕昆蟲嘅人,實在搞佢唔掂,經理同事又唔得閒理我。咁啱呢個時候,廚房大佬出外呼吸,見到我呆晒就問我咩事。我只係偷偷指一指地下無講嘢,大佬馬上假裝悠閒地一腳踏扁咗隻小強,小強貼咗喺佢鞋底,佢就順勢將小強屍帶出餐廳外處理。是咪好英偉呢?


5. 毫無架子衰咗會認

正所謂聖人都有錯,做錯事人人都會;但相信大家都遇過啲死不認錯嘅垃圾高層,有時仲會推卸責任,賴落你身上。不過,我班大佬們有錯會認,出錯單、整錯Food,都從來唔會將責任卸落我哋班小小樓面度,二話不說同你整過,仲會同你Say個Sorry添。


雖然好多位大佬都無再同小二共事,有啲大佬喺其他餐廳繼續做大佬、有啲自己開咗餐廳、有啲都已經退咗休弄孫為樂啦。不過偶然喺街度撞到,都會好似見到老朋友一樣,講吓以前工作嘅「哈碌」嘢,懷緬一番;再熟啲嗰幾位,得閒仲會探吓佢哋做嘢嘅地方,試下佢哋而家唔同風味嘅手勢添。

咁當然啦,唔係個個人都可以同自己磨合到,總有人天生對你不順眼,小二都遇過唔好嘅樓面或者廚房同事。所以,當你能夠喺工作場所,搵到個能夠體諒甚至照顧到你嘅同事,真係好大嘅福氣。無論係廚房同事,定係樓面同事,甚至係洗碗姐姐,小二都想喺度多謝你哋曾經對我嘅照顧同餵食。係你哋令我覺得呢份唔單只係一份工,仲係我另一個家:餐廳經理可以變成你第二個媽媽,大佬可以係你老爸,每個同事都有個家庭位置。雖然肉麻到有啲骨痺,但如果你遇過的,就一定會明白。

  

店小二Mary

 

90後大學設計系畢業,任職餐飲接近10年,初初做飲食純粹玩吓做吓炒散,到試過做office工,反而鍾意做返侍應。10年嚟serve過唔少經典麻煩客人,故開設FB專頁「乞客 The Beggar in the Restaurant」分享餐廳搞笑事及職場嘅各種心酸屎。

 

檢視此作者的所有文章

 

延讀閱讀:

乞客:餐飲同事射波遲到之神奇理由

乞客:做餐飲搵幾銀?

乞客:餐飲人的六個絕技

 

此文章由原作者及jobsDB HK撰寫/編輯。如欲刊登於其他網站或刊物,請電郵至[email protected]與我們聯絡。如有發現侵犯版權,原作者及jobsDB保留採取法律行動的權利。

 

無時間搵工但又想工搵你? 立即建立你的jobsDB檔案

無時間搵工但又想工搵你? 立即更新你的jobsDB檔案