乞客:5個餐飲界朋友應該離職的原因

香港係勞工權益得零分國際城市,尤其日益缺人嘅餐飲界,除咗要受客人氣,仲要防周邊人,真係要打醒十二分精神好好保護自己呀。有啲時候我哋要主動保護自己,被老闆同垃圾同事夾擊下,要叫唔好,仲要大聲叫「唔撈」添呀!如果你有以下5個情況,將件事話畀你信任嘅人聽,研究下仲撈唔撈啦。

乞客:5個餐飲界朋友應該離職的原因

1.工作氣氛惡劣,擁有大半垃圾同事

喺工作氣氛惡劣嘅環境底下工作,做好自己係無用㗎!因為你日日要同啲老海鮮、A字膊、是非精、廢Hea同事做嘢,無效率之餘仲要防人畀蕉皮你踩,真係百上加斤!日日返工就如上刑場一樣,對客已經辛苦,連同事都要防都要忍或者要遷就,其實對心血管真係唔太好。當然度度都有呢類型垃圾同事,但如果成個工作環境過半都係呢啲垃圾同事,鼻毛可鼻之下,我都係勸閣下另覓高就啦。

▪大量炒散兼職位,外快向你招手嘞﹗

2.加薪福度低微或零加薪

莫講話有無花紅分,每年有加薪就係最基本啦,唔係份人工都追唔到通漲呀。試過有位喺某大型酒吧集團做掃把”supervisor”嘅哥哥,某日同佢炒場,個Regional Manager畀咗封大信封佢,然後語重心長同佢講『應得㗎你!』  原來總公司決定加掃把哥哥人工,三年第一次加薪,加咗3%!即係420蚊,真係多__謝晒。如果你喺公司做咗幾年都係每年加一、二百蚊,或者什至無加薪,你都可以另謀高就,因為你公司一係當你神仙唔洗開飯,一係就當你唔會走嘅忠心狗。信自己,你值得更好。

 3.有一位短視頭腦的老闆

如果想喺某公司長遠發展,人工並唔係最重要,最重要係你老闆嘅頭腦。有啲老闆淨係識得Cut Cost,唔識諗得長遠啲。最鐘意減少人手嘅老闆唔會諗到,加重咗餘下同事負擔,影響服務質素,令公司聲譽受損。叫佢請多啲人,抽時間做Training,做吓Food Tasting,又只係著眼係目前損失咗嘅金額就放棄呢類型可令公司持續發展同提升質素嘅小投資。呢類型老闆係唔會做得長遠,好快就會被淘汰。你見尖沙咀半年換幾多餐廳就知。當你唔會做得耐,花紅無得份,做唔夠一年又無得加薪,咁你又何必白白浪費時間青春喺度呢?

如果唔炒散,轉長工就撳呢度啦﹗

4.零福利或刻薄待遇

作為餐飲業,就算係炒散直落更都應該會有基本半小時吃飯時間,如果你午飯時間少過半小時,或者無。其實真係要叫你老闆請識練仙嘅朋友嚟開工。做得餐飲通常都會包福食呀普通飲品呢啲基本嘢,如果無辦法提供,老闆通常都會畀飯錢津貼$30-$60(長工)。如果你午飯時間少過半小時,老闆又唔提供福食,日日打葡萄糖水吊命真係唔係辦法㗎朋友,搵過第二份啦。

5.有一位極偏頗無標準的上司

見識到最不公平情況就會係每個星期份更表。邊個星期五六都放到假呀,邊個慘到一至日都收尾更通宵更呀,邊個日日都要落場無直落呀。你就會知道經理錫邊個,憎邊個,邊個係心水散炒。最sad係,經理鐘意嘅唔一定係勤力的,有機會是大家也廢在一起。仲有就係阿邊個可以棄場Take個半個鐘煙Break,但你去過廁所5分鐘就畀人話太耐呀等等。呀上司都唔Care你,你更努力都係徒然,都係嗰句,你值得更好。

我明白要搵份絕世好工好難,但而家餐飲業要搵份工都唔難。如果而家呢份唔理想,點解唔去試下再搵搵?要做到敬業樂業,首先要搵到份適合自己的工!你,真係值得更好啊朋友仔。 

店小二Mary
90後大學設計系畢業,任職餐飲接近10年,初初做飲食純粹玩吓做吓炒散,到試過做office工,反而鍾意做返侍應。10年嚟serve過唔少經典麻煩客人,故開設FB專頁「乞客The Beggar in the Restaurant」,分享餐廳搞笑事及職場嘅各種心酸屎。

 

延讀閱讀:

乞客:客人寶寶搞笑英文語錄

【香港消防處KOL】任何仁的幕後推手﹗政府媒體主任呃like觸民意

搵工之前,執執個CV先,按此內進:大量CV/Resume samples﹗

此文章由原作者及jobsDB HK撰寫/編輯。如欲刊登於其他網站或刊物,請電郵至[email protected]與我們聯絡。如有發現侵犯版權,原作者及jobsDB保留採取法律行動的權利。

 

無時間搵工但又想工搵你? 立即建立你的jobsDB檔案

無時間搵工但又想工搵你? 立即更新你的jobsDB檔案