偵探手記:私家偵探不是整蠱專家

私家偵探不是整蠱專家

有留意呢個專欄嘅讀者,應該都知道我做咗十幾年記者同狗仔隊,曾經以為自己已經見盡世上最曲折離奇嘅事,點估得到……轉做私家偵探後遇到嘅case,可以更加千奇百趣。一直以嚟,都有啲唔同年齡、階層嘅人上嚟公司,要求我哋用私家偵探嘅專業知識,幫佢哋尋人同玩人!

不過,真係sorry,我哋並唔係《整蠱專家》入面嘅星爺,並唔會收錢去整蠱人,呢啲case係一定唔會接。其實,每一次有客人上門,我哋都會問得好清楚,究竟佢哋同查探對象係乜嘢關係?點解需要搵我哋幫手?坦白講,無人會嫌錢腥(唉,有邊個香港人唔係日做夜做,買極六合彩又未中吖),但我哋公司從開業以來,係堅守「四不接」原則嘅:

  • 違背良心嘅case一律唔接。(我唔想畀雷劈呀)
  • 涉及黑社會嘅case永遠唔接。
  • 損人不利己嘅case從來唔接。(唔好玩啦,做人就要做啲有意義嘅事)
  • 犯法嘅case絕對唔接。(家族長輩服務警隊多年,幼承庭訓,銘記於心)

喺投身私家偵探行業以嚟,我就拒絕過唔少case,以下精選四個記憶猶新嘅例子,有時真係估大家唔到,原來諗法可以咁「新奇」!

Case 1:大叔有火之踢波啫……

K先生係一個差唔多個個星期都去踢返場波嘅足球狂熱份子,只係估唔到佢年紀唔細(有個肚腩仔、髮缐後移中),仲咁有火!事緣呢位K先生有次同一班波友喺球場練緊波,有一位得戚大叔咁啱行過,話想同佢哋一齊踢吓波。K先生同班波友本來諗住喺外人面前騷吓「自我感覺良好」嘅球技,於是一口應承!

點知,得戚大叔一落場,真係遇神殺神、遇佛殺佛,一人扭過幾個之餘,仲連入兩球,搞到K先生同班波友好無癮。K先生愈睇得戚大叔愈唔順眼,自然就開始有啲身體碰撞。得戚大叔見勢色唔對,就講咗句:「X!咁易入波都唔好玩!」之後就走咗去。K先生當時梗係嬲到爆粗,事後仲愈諗愈唔順氣,所以走咗上嚟我哋公司,要求我哋幫佢搵得戚大叔出嚟,話要教訓吓佢。

其實呢,我哋唔係「貞姑」,一來唔識問米,二來無養鬼仔,唔可能單憑K先生口頭講兩句,就搵到一個人返嚟。所以,我一囗拒絕咗K先生。更重要嘅係,搵到又如何?為啖氣,搞出事?何必呢⋯⋯

Case 2:搵食之犯法㗎喎……

因為我哋公司位處旺角,所以周不時都會喺街邊食串魚蛋先上去見客,只係估唔到,有個case都同魚蛋有關。話說有一日,有個斯斯文文、戴眼鏡嘅男人上嚟公司,叫我哋幫佢跟蹤一間小食店嘅老闆,想辦法查出佢去邊度買魚蛋,甚至想我哋混入小食店,搵出整咖哩汁嘅秘方!因為呢位魚蛋先生諗住自己開舖賣小食,所以諗住「做定功課」。

不過呢,魚蛋先生想我哋做嘅嘢,其實係竊取商業機密,犯法㗎!我哋當然唔會接,仲勸佢不如自己上網搵料,再努力試驗鑽研啦。做生意,力不到不為財!

Case 3:一萬蚊大生意之放下吧……

一萬蚊對一般香港人嚟講,應該唔算大數目,不過都應該唔係一個好細嘅數字。S先生就為咗有人欠佢一萬蚊,而選擇喺大熱天時,特登走上我哋公司,好勞氣咁叫我哋幫佢追返嗰一萬蚊返嚟!

你以為S先生好緊張嗰筆錢咩?其實,佢同我哋講明,就算追數唔成功,佢都會照畀錢;即使追到,佢都唔會收嗰一萬蚊,會畀埋我哋做奬金。點解要咁做?S先生話,佢純粹係氣難下,想欠佢錢嘅人畀人騷擾吓,無覺好瞓咁話⋯⋯

都係嗰句,私家偵探唔係整蠱專家,呢種case,我哋係唔會接嘅。最後,我哋建議S先生,如果真係想追收嗰一萬蚊,可以搵合法嘅欠款代收公司,代佢收返啲錢,好好解決事件。

Case 4:黑社會之有仇報仇……

之前提過我哋係唔會接涉及黑社會嘅case,而的確曾經有社團人士走上我哋公司,希望幫襯(其實佢哋講嘢幾客氣,同普通人無乜分別)。不過,我哋每次都會問上門嘅客人兩個問題:

  • 佢同目標人物嘅關係?
  • 委託我哋做呢件事嘅原因?

經過瞭解,知道呢位社團人士有啲江湖恩怨,想我哋幫佢搵出仇家嘅地址,方便尋仇。當然,我哋無接到呢個case,只係叫呢位社團人士用自己嘅方法解決,江湖事還是江湖了比較好。

其實私家偵探係幫人搵出真相,從而解決問題,而唔係製造問題。奉勸各位施主,珍惜當下,放下吧。

偵探Nic Li
由記者仔做起,累積經驗及人脈網絡,漸漸變得神通廣大,成為偵探社總監。查案時心思細密,明察秋毫,機警過人。閒時熱愛足球,活力十足。

檢視此作者的所有文章

延讀閱讀:

[扮工心經]醒目打工仔,忙碌中偷點時間回氣

置地記者:打工仔有一種命,叫辛苦命

偵探手記:私家偵探會承接甚麼工作?

此文章由原作者及jobsDB HK撰寫/編輯。如欲刊登於其他網站或刊物,請電郵至[email protected]與我們聯絡。如有發現侵犯版權,原作者及jobsDB保留採取法律行動的權利。

 

無時間搵工但又想工搵你? 立即建立你的jobsDB檔案

無時間搵工但又想工搵你? 立即更新你的jobsDB檔案