偵探手記 : 私家偵探會承接甚麼工作?

偵探手記 : 私家偵探會承接甚麼工作?

喺做私家偵探之前,我嘅工作係傳媒狗仔隊。眾所周知,狗仔隊主要嘅調查對象係政治人物、明星、名人或者體育明星。呢啲人除咗本身警覺性高之外,仲有保鏢助手隨行保護,所以跟蹤難度亦比較高。

咁私家偵探同狗仔隊嘅工作有咩分別呢?最明顯嘅分別係,私家偵探調查對象多數係普羅大眾。同知名人士相比,佢哋嘅外表比較大眾化,例如商業區每個人嘅打扮都係差唔多,所以跟蹤佢哋嘅難處,就變咗係要認清目標人物嘅外貌特徵。

私家偵探嘅工作範疇比狗仔隊更廣泛,接觸嘅階層更濶,所需要運用嘅知識更多。雖然話主要工作都係目標行蹤(包括伴侶、子女、職員、家傭等)、尋人、商業調查同工傷調查,但係每一單case嘅內容都唔同,所以令我哋有機會從不同嘅角度認識呢個社會。 

現時香港有超過七百萬人口,每個人背後都擁有一個獨特嘅故事,社會上亦有好多形形式式嘅問題,而我哋嘅責任就係幫佢哋進行調查,搵出真相。今次就同大家分享一下一啲比較特別嘅客人要求啦!


尋人 

  • 曾經有位業主買咗間凶宅,十年前有個租客喺嗰個單位自殺。因為業主希望住得心安理得,所以急住要搵出該死者嘅真實中文全名嚟做宗教儀式。我哋查到死者全名,仲得到埋死者家人嘅同意之後,就將真名話畀新業主聽。 
  • 尋人仲可以用嚟幫助打工仔。有位客人無奈地話佢受到辦公室政治迫害,被同事整蠱,仲用佢嘅署名嚟寫左一封粗口信鬧老細,搞到被炒魷魚。經我哋調查之後,搵到個肇事嘅同事出嚟。  


目標行蹤

  • 由於科技太先進,曾經有客人用手機程式發現老婆不在家,但係客人嗰時身在歐洲公幹,情急之下越洋打過嚟,要我哋立即安排去跟蹤佢老婆。  
  • 而家越嚟越多網上情緣詐騙,好多客人都擔心受騙,所以就委託我哋跟蹤同調查伴侶,以了解佢係真情定假意。 


另類商業調查 

  • 除咗了解目標公司嘅背景、人事等常見嘅商業調查之外,有時我哋都會接到啲比較另類嘅委託。曾經有一位婆婆去睇中醫,但佢唔放心食咗啲咩中藥落肚,於是搵我哋幫手調查嗰間藥房究竟執啲咩藥畀佢食。 


以上係一啲比較特別嘅客人要求。無論咩個案,除咗調查工作嘅部分,我哋仲會照顧埋客人嘅心理狀況。種種個案,不能盡錄,只要幫到客人釋懷,我就會覺得幾辛苦都值得!

 


偵探Nic Li

偵探Nic Li

 

由記者仔做起,累積經驗及人脈網絡,漸漸變得神通廣大,成為偵探社總監。查案時心思細密,明察秋毫,機警過人。閒時熱愛足球,活力十足。

 

檢視此作者的所有文章

 

延讀閱讀:

偵探手記:私家偵探是怎樣煉成的

偵探手記:私家偵探全套出job工具揭秘

禮賓司——酒店裡的萬能匙

 

此文章由原作者及jobsDB HK撰寫/編輯。如欲刊登於其他網站或刊物,請電郵至[email protected]與我們聯絡。如有發現侵犯版權,原作者及jobsDB保留採取法律行動的權利。

 

無時間搵工但又想工搵你? 立即建立你的jobsDB檔案

無時間搵工但又想工搵你? 立即更新你的jobsDB檔案