入行15年Graphic Designer勸誡:「入行前要諗清楚」

世界進入顏值新紀元,人人都鍾意靚嘢。喺呢個打卡年代,去餐廳食好西,最緊要嘅未必係味道,而係影相效果靚唔靚!而大家眼前嘅靚餐廳、靚佈置、靚餐牌、靚海報嘅背後,都有一班有創意、對美學有追求嘅Designer。小編今次就專訪兩位現職In-house Graphic Designer,剖析華麗創意工業背後,佢哋嘅工作並唔係想像中咁浪漫……

報料人:
In-house Graphic Designer 詩詩:4年經驗,現職某雜誌
In-house Graphic Designer Patrick:15年經驗,現職某大型商場


「做Design House係最難頂!」

美少女詩詩入行時,對呢一行充滿憧憬,準備大展拳腳,將學校學到嘅知識同自己嘅無限創意統統傾注喺啲product上面。「揀呢一科,完全係因為興趣!一心覺得呢一行一定好好玩,有好多新嘢可以試。不過做做吓就覺得唔太對路,無論我幾畀心機去做都好,做乜都畀客ban,ban十幾次。耐咗就發現,其實個客心入面根本一早有自己想要嘅野,你做得幾靚都好,都唔會理,做做吓都幾無癮。」佢仲話,當時份工間office一隻窗都無,想透透氣,就要去洗手間先有窗可以接觸到陽光,真係慘豬!

聽聞做Designer,有開工無收工,要狂OT,係咪真嘅呢?「我本身做In-house Designer,OT情況其實唔算好誇張,但係做Design House就最難頂,啲客有好多智障要求,唔使旨意佢哋會好清晰表達想要乜,啲宣傳刊物廣告海報來來回回改十萬次,啲工作做極都做唔完,新入行手腳慢隨時日日OT三個鐘。」

入行15年Graphic Designer勸誡:「入行前要諗清楚」


「有同學唔做design轉行做美容」

就咁聽落,呢一行好似真係辛苦得來又無乜回報咁,詩詩會唔會成日轉工呢?「我大約一年左右就會轉一次工㗎啦,因為多數轉工先會加人工,唔轉嘅話只會加好少好少,比同期畢業、讀其他學系嘅同學仔,人工真係少好多。」

「Designer一般嚟講分兩大類,第一類係好講big ideas、要創新同好堅持自己一套想法嘅Designer,佢哋基本上都唔係好介意狂OT,不過一頂唔順老細嘅無理要求就會轉工;同埋佢哋都會試多啲唔同類型嘅design,喺一份工度儲靚個portfolio就轉工㗎啦。至於我就係屬於另一類,追求stable嘅生活,無驚無險又放工,最緊要唔好OT!」

咁會唔會做做吓直頭轉行呢?「哈哈!我有同學轉行做美容,佢一入行人工就高過我幾K,平時又會接吓design嘅freelance,唔算完全浪費自己嘅專業。同埋佢又準備結婚,新工可以畀佢準時放工,唔使OT,無咩壓力,時間同收入都夠穩定可以建立新家庭,呢一行發展前景又明朗,佢都做得幾開心!」

不過詩詩話,其實整體嚟講都唔算多同學轉行嘅。「有一個朋友之前份工,個老細當佢係超人,咩都要識,又要拍片、又要畫畫、又要整Flash、3D animation、web……最後佢決定辭職創業,自己畫畫做brand,佢話好辛苦又賺唔到錢,不過呢個係佢嘅夢想,所以點都會堅持落去。」


老手Designer贈小貼士:唔好咁快起貨

另一位有15年經驗嘅靚仔Designer Patrick就話,佢做過13、14份工,多到數都數唔清!最長嗰一份,係喺某出版社做咗三年。「其實我都只係細個鍾意畫畫,大個就順理成章讀咗design。咁多份工入面,我最鍾意做書嘅design,因為可以keep得耐,文字工作感覺上又浪漫啲,無咁商業化!」

做咗design十幾年都唔轉行,咁Patrick係咪會推薦後生仔入行呢?竟然正好相反。「講真,我唔太建議大家入行,始終同其他行業比較,人工真係低,又無乜機會可以真正做到想做嘅design。我試過有本書嘅封面,畀老細改到啲顏色鬼咁核突,搞到我完全唔想落我個名喺copyright page,因為真係映衰晒!呢一行就算幾有理想,老細有最終決定權,想點改個design都得,某程度上Designer都幾唔受尊重,所以入行前真係要諗清楚。」

「不過如果已經入咗行,我會建議你做啲job唔好咁快就交,同埋要有氣場,惡過腦細就最好,因為有時就算個design好掂,佢都會想彈返畀你,來回改幾次,等佢感覺自己好似好有睇法、有見地咁!所以一定要惡過佢,等佢唔敢叫你改太多次,哈哈哈!」咦,Patrick呢個小貼士,好似放諸其他行業都適用咁喎。

其實做咩工作都好,總會有好同唔好嘅地方,當然亦會有啲工種係特別辛苦啦。但如果衡量咗利弊之後,仍然覺得自己好有熱誠、承擔到挫折嘅話,就不妨一試,唔好等自己老咗先後悔啦! 

入行15年Graphic Designer勸誡:「入行前要諗清楚」

做緊Designer嘅你有冇中伏嘅感覺呢?(image via imgflip)

 

延伸閱讀:

十個難識另一半的職業

爵爵&貓叔專訪(一):台港大不同之辛酸血淚工作篇

 方健儀:天生不是記者

 

此文章由jobsDB HK撰寫/編輯。如欲刊登於其他網站或刊物,請電郵至[email protected]與我們聯絡。如有發現侵犯版權,jobsDB保留採取法律行動的權利。

 

無時間搵工但又想工搵你? 立即建立你的jobsDB檔案

無時間搵工但又想工搵你? 立即更新你的jobsDB檔案