六個小貼士,讓你樂觀過渡搵工期﹗

搵工期

當你發出幾十、甚至幾百封應徵信後,獲邀面試嘅次數卻連五隻手指都數得晒,好難唔灰爆﹗不妨參考以下六個小貼士,讓你搵工時擺脫頹喪心情。

1. 聆聽內心聲音

好多人平日忙東忙西,無非都係唔想俾自己hea,但間唔中都要停一停、抖一抖,嘗試一個人靜心思考,聆聽內心聲音,到底想追求乜嘢目標?邊種工作會令你瞓身投入?要點樣達成目標?當諗清楚後,就要勇敢走出舒適圈,好好規劃事業藍圖。

2. 保持行動力

如果你職場上長期飽受折磨,一旦離職後俾自己放鬆一下,當然冇咩唔妥,但如果太舒服嘅日子持續落去,只會感到越來越不安。唔想心情越來越灰,可嘗試做啲具建設性嘅活動,例如執拾家居、做運動、上興趣班或做義工,從中可汲取一些生活體驗,亦可抖擻精神,提升自信心。

3. 凡事向好方面諗

就算心情有幾灰,都要向好方面諗,盡量消除負面想法,特別係因失業而感覺如何挫敗,都要相信前方仍有好多機會等著自己。一旦遇到唔順心嘅事,切勿氣餒,反而要勉勵自己明天會更好。

4. 尋找心靈支柱

搵工嘅過程通常會令人感覺孤立無援,呢個時候最好與值得信賴嘅親友保持緊密聯繫,佢哋會喺你失意時為你落力打氣。覺得難以啟齒?除咗親友外,亦可向職業顧問或專業人士尋求協助,切忌獨力面對。

5. 凡事抱著感恩心態

就算搵咗好耐工都冇好消息,都總有些事情令你感到欣慰,諗吓自己有強健體魄可四圍走動、有好友可互勵互勉、有家人時刻噓寒問暖……呢啲看似微不足道嘅小事都足以令你感恩,有助消除消極心態,每日發掘一些小確幸,想法自然會豁達啲、心情自然靚啲﹗

6. 每次只專注做一件事

當你為生活作好詳細規劃,並決心實踐時,你會開始發現機會陸續有來——獲邀面試、結識到事業貴人……即便好事接踵而來,亦唔好倉卒行事,每次專注投入做好一件事,才可獲得滿足感。

無論你係揀緊心水工作,定係靜待佳音降臨,都應保持冷靜,讓一切順其自然。相信好事多磨,良機始終會在適當時候來臨。