[冷門奇工系列]炎夏嘆冰涼啤酒 全靠生啤機師傅出馬

夏日炎炎,不少人下班後都想喝杯冰凍飲品,涼透心的生啤誠然是不少人的解暑至愛。酒吧或餐廳經常供應源源不絕的冰極生啤,全憑維修師傅幕後發揮專業技能,確保啤酒製冷機在安裝和運作過程暢順,令客人隨時享受到冰凍啤酒。


每10至14日定期保養

Joker Keung是捷成飲料有限公司旗下的生啤機技術員(Draught Beer Technician),他入行已接近五年,之前並無相關工作經驗,「最初師傅會俾一個月時間喺工場訓練,之後兩、三個月佢會帶新員工去現場,親身示範安裝過程,然後就可獨立作業。」Joker表示,大部分客戶場地都是酒吧、餐廳或大型宴會,例如演唱會、啤酒節等,他每次為客戶安裝完啤酒製冷機後,每10至14日便會再訪,進行定期檢查,有時客人會因應個別問題要求緊急維修。

冷門奇工系列 炎夏嘆冰涼啤酒 全靠生啤機師傅出馬

Joker於餐廳檢查生啤機運作


熟悉機件結構和啤酒特性

現時香港常用的啤酒製冷機大約有五至六個機種,「作為安裝師傅,最緊要熟悉唔同種類嘅啤酒特性,同埋各類型生啤製冷機嘅設計、結構同運作模式。當然間中會有新型號啤酒機推出,作為安裝師傅,需要即時熟習最新機種嘅結構同操作。」


前置視察不容有失

「我日常職責分為兩大類:第一,確保啤酒機切合客戶場地環境;第二,確保啤酒機泵出冰凍啤酒。」Joker表示,每種啤酒製冷機都有特定尺寸,但有些客戶場地並不能容納某類型機身,所以每次在安裝前師傅會視察場地,量度位置及觀察周邊環境,確保能揀選最切合該場地、而公司亦有提供的啤酒製冷機及相關零件,這方面都是靠經驗判斷。

冷門奇工系列 炎夏嘆冰涼啤酒 全靠生啤機師傅出馬


散熱不足影響啤酒溫度

即使安裝過程順利,運作後亦會出現突發狀況。「維修問題好多時離唔開啤酒唔夠凍,原因係機件散熱不足。其實啤酒機同冷氣機、雪櫃嘅運作原理一樣,只不過多咗一個水缸用嚟製冰。如果機件附近散熱空間唔夠,或者前置位俾雜物遮擋,降溫成效就唔能夠達到最佳狀態,啤酒自然唔夠凍。要解決呢類問題,除咗要加闊散熱空間外,亦要裝置散熱風扇,提升散熱功能。」繁複的機件檢驗過程不但沒有令Joker卻步,反而令他對這份工作愈感興趣。「能夠搵到問題根源,順利維修妥當,我覺得好開心好滿足。」


啤酒機師傅一定嗜酒?

「好多人以為我哋鍾意飲啤酒先入行,呢方面純粹係誤解!以我觀察,同業當中只有兩、三成人鍾意飲啤酒,其餘都係冇飲酒習慣,但佢哋對各啤酒類型同特性都好熟悉。其實如果你鍾意揸螺絲批,想有一門手藝、對電器產品有興趣,已經適合喺呢行發展。」


酒吧裝機一定輪夜班?

Joker要經常出入酒吧裝機,但並不需要夜間工作。「雖然我哋大部分客戶都係酒吧或娛樂場所,但我哋嘅工時係跟文職工作冇分別,都係朝九晚六,當然間唔中會加班。我哋會自定工作日程,例如上晝到較早營業嘅餐廳,下晝會到酒吧。至於周六,我哋會輪班standby,以防客戶有緊急維修狀況。除咗應付宴會場合,一般夜晚有得休息,仲有銀行假放,所以唔需要捱更抵夜。但當然亦有高峰期,例如復活節或聖誕節前後嘅日子會非常忙碌。」

冷門奇工系列 炎夏嘆冰涼啤酒 全靠生啤機師傅出馬


入行不限年齡和經驗

如想跟Joker一樣,成為啤酒機安裝及維修師傅,最理想持有私家車、電單車或輕型貨車駕駛執照,方便隨時到客戶場所。至於年齡、工作經驗和學歷一概不設限。「呢行彈性好大,可以邊學邊做,我都係入行後修讀冷氣維修或氣體焊接課程,如果考埋電工A牌就更好。現時呢行仍然人手不足,只要有熱誠同興趣,我非常鼓勵年青人入行。」

Joker表示,這行晉升前景明朗,以他為例,入行兩年後便晉升為師傅,可以帶領新員工。「所謂『師傅』,其實唔係指傳統嘅師徒制,我嘅職責係帶領新員工熟悉工作環境,當佢哋有任何疑問,我哋會一齊討論,互相交流,有時我仲可以喺佢哋身上汲收到新思維,提升工作效率,感覺真係唔錯!」

冷門奇工系列 炎夏嘆冰涼啤酒 全靠生啤機師傅出馬

入行不限年齡、經驗,有意者可於jobsDB搜尋空缺或將履歷電郵至[email protected]

 

延伸閱讀:

汽車維修非單憑苦力?由規劃到電腦技能範範精通

[諗得出都有]7個超好玩工程師Title

[職場故事]我為何選擇「紮鐵」這條路

想搵工程業好工?想知唔同職位可以搵幾多?即刻上「Engineering 工程業專頁」睇睇!

 

 

此文章由jobsDB HK撰寫/編輯。如欲刊登於其他網站或刊物,請電郵至[email protected]與我們聯絡。如有發現侵犯版權,jobsDB保留採取法律行動的權利。

 

無時間搵工但又想工搵你? 立即建立你的jobsDB檔案

無時間搵工但又想工搵你? 立即更新你的jobsDB檔案