出trip二三事,忽略細節大件事﹗

Business Trip

唔少打工仔經常到海外公幹,一諗起公司包機票包食宿,工作之餘又可乘機觀光簡直係人生一大樂事﹗但講到明係公幹,當然係工作行先,玩樂行後。想兩者都盡善盡美?唔好忽略以下細節﹗

上社交網站打卡晒命?低調啲好﹗

平日冇乜外遊機會,一旦到海外公幹,有人會得意忘形狂晒吃喝玩樂嘅相片,當時感覺真係好爽,貪一時之快分享,全世界都知你寓公幹於娛樂。其實做完嘢周圍去玩吓、輕鬆吓當然冇壞,但唔好喺社交網站大晒特晒,萬一俾老闆見到,只會覺得你剩係掛住玩,唔夠認真工作。

打私人電話,咪貪小便宜﹗

公幹途中,打電話俾屋企人報平安當然係冇問題,但如果諗住用公司手機或sim card打電話同朋友吹水,以為神不知鬼不覺,咁只會俾老闆認為你公私不分。其實公司一般有專人檢查每月通話帳單,尤其係長途電話記錄,更加嚴謹檢查。為免被老闆懷疑你經常公器私用,但凡係私人長途電話,都係用自己手機打就最穩陣喇﹗

出發前預先規劃乘車路線

除非公司指定要搭計程車,或已委派當地專人接送。否則,當你自行乘搭交通工具時,最好選擇價錢相宜的公車。為免到埗後四圍搵公車,出發前規劃好乘車路線,預算要用多少錢,以便到埗後在機場兌換店換定零錢乘搭公車。切勿毫無準備,諗住靠把口四圍問,預先計劃好,盡快到達公幹地點,早啲做完嘢,心情都輕鬆啲啦﹗

了解當地文化禁忌

每個國家都有唔同文化和禁忌,若然你被派去從來未去過嘅陌生國家,對當地文化一無所知,當接觸當地人傾公事時會容易出現尷尬情況。因此必須預先了解外地文化、習俗同禁忌。例如在馬來西亞觸摸小孩頭部係冇禮貌嘅行為,在歐洲唔好亂舉V手勢,手心向自己的反V,在英國被視為講粗口的侮辱行為……作為公司代表,與外地人交流,保持適當禮儀、入鄉隨俗係非常重要。

到外地公幹可接觸外國人,了解各國文化,又可增廣見聞,著實係令人大開眼界嘅體驗。但大前提必先勤力做足準備,有付出先有圓滿收穫。