初踏職場,消極概念唔要得﹗

消極

又係畢業生嘅搵工旺季,有唔少初踏職場嘅打工仔,毫無工作經驗,作為新鮮人初嚟埗到,辦公室對佢哋嚟講係既陌生又緊張嘅新環境,想盡快融入職場,與同事打成一片,就唔好有以下嘅消極想法﹗

乜嘢都靠估扮無知

如果畢業生一心諗住自己好green又零工作經驗,即使工作上遇到問題,都唔主動開口問,一味靠估或詐唔知,擺出一副天真模樣,以為係新人,就算做錯事,同事一定會體諒,咁諗就顯得任性又依賴。踏入社會後要培養獨立處事能力,雖然係新人,但如果俾同事感覺你事事靠人執手尾又唔肯主動提問,長遠落去只會令人覺得你玩世不恭,毫無上進心可言。

抗拒「下欄」任務

冇人一返工就做到想做嘅工作,就如酒店經理入行時只係被安排執客房。即便你入到大機構,諗住坐定定對住部電腦做嘢,但亦有可能被安排影印、接電話或執貨倉,你以為同事蝦你係新人,迫你做「下欄」工作,所以做得心不甘情不願,如果咁諗就大錯特錯﹗唔同職級嘅人都可能會處理雜務,而且新人更可藉以加快適應職場環境。抱住樂觀心態欣然接受,心情都會愉快啲﹗

百分百被動推吓郁吓

上司派你處理一件任務,你完成後就停咗喺度,咁樣只會令人覺得你工作唔夠投入。作為職場新人,應主動了解上司有咩期望,或可從負責嘅項目當中,發掘另一啲新任務。例如上司派你協助搞宣傳活動,你可提議設計一份問卷,以便了解現場顧客對公司產品嘅意見。即便有可能俾上司ban橋,至少你行多一步,多作嘗試,自然會更快適應新工作。

心情不爽就想放棄

有唔少畢業生返第一份工就好似幼兒初入學般,一味懷念以前嘅美好時光,返工時稍一捱鬧或有咩唔順心就覺得處境悽慘,於是採取逃避態度,甚至劈炮唔撈。喺職場上,無論新人或舊人都會遇到挫折,郁啲唔順氣就頹爆或黑面,以為人哋會包容,反而顯得唔成熟,想法幼稚。

職場新鮮人想盡快融入社會,應積極跟上司或前輩交流,踢走消極想法,你會逐步適應辦公室環境,從而發掘出新方向、新目標﹗