創作人畢明專訪(一):跳出comfort zone,發現另一個自己

 

 1502874_733402430004412_639678878_o

不少人身兼多重身分,不會局限於某個範疇。今期jobsDB專訪的著名創作人畢明就是其中一位表表者。2007年她獲邀加盟壹傳媒擔任集團創作總監,由廣告人轉為傳媒人,直到去年加盟導演行列,為何會有這樣的轉變? 當中要面對什麼困難?

 想做鍾意嘅嘢,就要走出舒適圈

「喺壹傳媒做咗七年嗰陣,有位廣告導演朋友問我有冇興趣入行,我當時諗,想唔想走出舒適圈?我唔敢話壹傳媒係個好舒適嘅地方,但我亦想嘗試其他新嘢,加上我寫過好多影評,又參與唔少廣告片製作,對導演呢行有興趣,當你對某樣嘢真係有興趣嘅話,就應該諗清楚自己想唔想離開目前嘅舒適位置,願唔願意去冒險,發現另一個自己。」

 創作似炒餸,唔係臨場即叫即叮

執導拍廣告之後,畢明覺得廣告界的生態環境變了,特別是與客戶溝通方面。「以往大家講個信字,傾好晒就會落實去做;但宜家變得共識欠奉,客戶會臨場改變主意,明明批好晒嘅方案又要由頭度過。其實改唔係問題,問題係要俾時間我哋去諗,情況就等同炒咗碟餸你唔要,再炒都需要時間,舊時度廣告快到叫『即叫即蒸』,宜家仲要『即叫即叮』。面對這種合作模式,廣告人係需要時間去深入理解,調適心態面對呢項挑戰。」

 入行門檻降低,更要捍衛廣告質素

「另一項廣告人要面對嘅挑戰係,當人人拎住手機拍片都可以做導演,做廣告唔需要點洗錢嘅時候,客戶唔識分質素好壞,只知道平就掂,用業餘水準創作嘅廣告,專業質素一定有影響,當入行門檻降低咗,廣告人更要識得選用人才或設定標準,務求捍衛廣告應有嘅專業質素。」

 抽水二次創作,也須與原創互相平衡

時下興抽水二次創作,畢明又點睇呢?「Borrowed interest係基於一啲製成品進行二次創作,有一定嘅感染力,度橋可以慳番力度;客戶當然buy,因為創作時間短,又容易預測作品嘅反應。雖然客戶對抽水廣告咁受落,但亦應該有番啲原創作品,因為原創廣告會令受眾有更深刻嘅印象。廣告人必須要喺抽水同原創兩者之間互相平衡,想做原創作品,可坦誠請客戶俾多啲時間,等創作團隊度到更多新橋,唔駛吓吓喺狹縫中搞二次創作。」

(待續)

 

 同場加映: Project Lucida – 畢明香港浸會大學講座: Thinking out of the box