創作人畢明專訪(三):八、九十後對主流要有免疫能力,標準自己定

8

現今,八、九十後是社會勞動市場的活躍份子,卻一直備受負面批評,如缺乏定性、沒有事業規劃、自我感覺良好等,對於這群新新代年青人,畢明有什麼看法?

俾機會同空間,讓八、九十後發揮所長

「有好多對佢哋嘅指責係唔公平,例如話佢哋唔珍惜機會或太自我,其實『自我』有兩面睇法,我合作過嘅八、九十後當中,有啲可以同佢哋打成一片。當中有人好努力、好有責任感,只要俾佢哋少少機會、空間同guidance,佢哋可以變得好出色。喺我哋70後年代,有好多空間可以發揮,世界相比宜家較寬闊。但八、九十後嘅世界係好擠迫,通街都係大學生、碩士生,所以對於宜家呢一代,不妨提供多啲協助,俾佢哋多啲鼓勵。」

幾時都要尊重Deadline

「當然八、九十後亦有不足之處,就係人情世故方面比較弱。我成日提醒佢哋要respect deadline,唔可以話我病,做唔切,如果真係做唔起就早響,冇可能喺交卷果刻先至話做唔起,呢種態度就係不負責任。有部分八、九十後經常過晒deadline都唔交貨,有時連工都返唔到,呢方面絕對需要改善。」

數碼年代,年青人容易自我增值

畢明認為現今世代的年青人亦有優勢。「佢哋透過上網可以隨時為自己增值。另一方面,各行業嘅入行門檻都比以前低咗,年青人入行唔難,難就難在喺冇正規引導嘅情況下要培養一套skill set。我當初入4As,都係想學習大公司嘅系統,當我做大型campaign可以親身體會到個規模有幾大,工作要仔細分配先可以做得好。雖然八、九十後會認為大機構有好多官僚制度,但我認為大機構有唔少累積咗好多寶貴經驗嘅前輩,可以向佢哋好好學習。」

橋一定會俾人ban,呢個係必經階段

作為創作人,必定試過被ban橋,畢明有什麼建議給年青人呢?「其實好多名人都係衰過無數次,仲要衰到好甘,先有機會做得好好。當你抱住謙虛嘅心態,並深信:橋一定會俾人ban,呢個係必經階段,創作唔係平坦嘅路,就算個客冇ban你,你都要識得自ban,咁先會搵到進步空間。後生仔出嚟做嘢有兩件事要得:第一要讚得,第二要鬧得。俾人讚唔好沾沾自喜,俾人彈亦唔好垂頭喪氣。」

隊唔一定要跟,要建立自己嘅遊戲規則

最後,對於年青人想成功,畢明有什麼看法?「世界建立咗好多標準價值,好多年青人以為成功就係依據呢啲法則走主流路線。但我認為最重要係有自己嘅一套標準,例如人人話要買樓,你係咪一定要跟?如果你唔跟,你會唔會驚先?當你對主流冇咗免疫能力,你咪會恐懼,認為只有跟大隊先安全同獲得大眾認可,其實主流呢樣嘢,只不過係人哋賣俾你嘅一種安定。對於人哋賦予嘅標籤,你要識得判斷有冇意義,同埋要清楚自己重視乜嘢,建立屬於自己嘅遊戲規則,為自己揀嘅人生路負責到底。」

(全文完)

 

創作人畢明專訪(一):跳出comfort zone,發現另一個自己

創作人畢明專訪(二):想進步,必先夠「八」不斷作新嘗試

 

想尋找你下一個機遇? 立即瀏覽jobsDB最新Media & Advertising職位