加入公司Chit Chat群組,有咩要留意?

短訊群組

自從興起Whatsapp,人人都全情投入發起大大小小Chit Chat群組,一得閒就拎起部機狂襟狂自言自語錄音,一個訊息,十幾人立即收到,溝通交流從未如此輕鬆。但係,當你加入咗同事嘅群組,就要小心處理。稍一不慎,得罪人之餘,仲有可能會影響你仕途聲譽。留意以下事項,切勿踩界﹗

咪宣洩心事煩事瘀事

好多人返工俾老細鬧兩句,積埋滿肚冤鬱總想搵地方發洩,隨手拎起部手機就同好兄弟、好姊妹猛吐苦水,以為大家係好同事,會明白同體諒自己嘅心情。但同事終歸係同事,唔排除當中有人會將你啲私事隨便轉發(或唔覺意轉告)俾其他人,甚至傳番俾上司聽,咁你就真係唔呻好過呻。

咪疲勞轟炸式發言

若然有詳盡嘅訊息想分享,最多分成三次發出。千祈唔好一行一行咁斷斷續續發訊息,一來你會搞到群組成員手機響過不停,要成日check message,就算設定了靜音,用手機睇冗長而密麻麻嘅訊息始終令人厭煩甚至反感。

咪濫用表情符號

有時群組當中有人想詢問成員意見,有啲人會懶得打字,一味輸入大堆表情符號,以為咁樣就回應咗。群組存在嘅目的係互相交流,尤其係同事群組更絕不應敷衍了事,你同佢哋朝見口晚見面,吓吓剩係發表情符號hea住回覆,會俾人感覺你冷淡兼冇誠意交流,俾人踢出群組繼而疏遠係指日可待嘅事。

咪複製訊息到其他群組

除非係可公開嘅活動資訊,如果係群組成員發放嘅私人訊息,千祈咪複製到其他群組,特別係私人行程、對工作嘅意見或想法,訊息偶然像回力棒,一旦被複製到其他群組,唔排除有一日又番轉頭到原本群組,或傳番俾當事人,群組成員對你嘅信任就會全盤瓦解。

咪在人多地方口錄訊息

唔想成日打字,錄音留個口訊固然好方便,但千祈咪喺人多嘈雜嘅地方錄口訊,試想想,收訊息嘅人聽到一大堆雜音,要將音量教到好大聲先聽到留言,要人哋聽得咁辛苦,特別喺辦公時間,大部分人都唔方便插耳筒或將音量調教到大聲一點收聽訊息,所以發文字訊息會比較恰當。