加辛定加薪,你有冇say?

加薪不加辛

加薪不加辛,無疑係打工仔夢寐以求嘅美事,可惜現實往往係剛剛相反,勤快幹練唔代表可以準時收工,而係接受更多額外任務,但人工職位依然不變。無止境加辛不加薪,除咗辭工,仲有咩方法可爭取相應回報,或脫離苦海?

踏出舒適圈,主動執行新計劃

唔少上班族日做夜做,只係履行更多瑣碎雜務,就算工作量不斷增加,都唔代表做得多收穫越多。所以,當接受額外任務之同時,亦要從中發掘一些新構思,嘗試向上司提出更多嶄新方案,或敢於主動承擔管理整個項目。若然你能成功獨力執行對公司有利嘅項目,成績超卓,升職或加薪嘅機會便有可能大大提升。

評核時,爭取飛躍進步殊榮

當上司展示評核報告時,你大可將去年嘅評核報告同今年作一比較。選擇行呢一步,要事先確定你今年嘅表現比去年明顯亮眼,例如:今年成功執行更多大型項目,或某項你管理嘅項目有顯著業績或獲得大眾認可。當你手上拎住有利「證據」,談判加薪嘅籌碼自然大幅提升,就算辛苦啲都值回票價。

將自身苦況轉化成大局形勢

若然你但求安穩,不求上位,更唔想無了期硬啃豬頭骨,不妨每周制定工作清單,列出每項所需嘅完成時間,然後向上司客觀表達目前工作量負荷過重,恐怕不能如期完成多項工作,就算按步就班進行,時間仍然緊迫,重點係:長此下去,會耽誤其他部門嘅進度。只要表現出為大局著想,而唔係無理推job,上司為咗整體表現,或會考慮重新分工。

建議小組分工,培養團體合作精神

若然上司派遣嘅工作比較繁複,需要一段較長時間完成,可主動建議與三數位同事通力合作,透過同事嘅各項專長,會更有效率合力完成任務。當然,大前提係你必先有良好嘅人際關係,平日亦有主動向同事伸出援手。其實小組合作既可提升效率、減輕每個人嘅工作負擔,亦可培養團體合作精神,站在公司立場,絕對冇壞﹗

無時間搵工但又想工搵你? 立即建立你的jobsDB檔案

無時間搵工但又想工搵你? 立即更新你的jobsDB檔案