同事「Hea」做,唔想蝕底有妙計

Free rider

同一個團隊偶爾都會有一、兩個Free rider(搭便車),成日妄想不勞而獲,分工時毫無付出或建樹可言,到上司讚許成隊人表現出色,佢會厚顏無恥咁企出嚟同其他賣力嘅組員一齊邀功,嗰一刻你真係嬲到火到嚟埋,到底有咩妙招對付呢類職場小人?

設定具體工作項目及目標

當確定做什麼項目時,分工係非常重要嘅階段。組員在商量分配工作嘅時候,必須設定具體性質嘅項目;舉個例,如要了解競爭對手對行內減價戰有咩行動,先設定具體目標,例如搜集至少三十篇相關報道,並進行民意調查,訪問至少二十名顧客……將任何項目具體化,就唔會有人乘機偷懶靠吹水交行貨,萬一真係有人hea住做,開會時不妨叫埋主管前來參與,讓佢嘅「功績」全方位曝光。

分階段做個人Presentation

講明係Team work,隸屬同一組嘅組員,一方面要履行獨立處理嘅任務,同一時間亦要同組員互相交流意見。當所有組員各自進行的任務到了初、中、末階段,可召集成Team人做Presentation,讓各組員詳盡講解自己嘅工作進度,並互相給予具建議性的意見,務求下個階段有所改進。當中如有Free rider,喺呢啲場合佢哋通常會扮病或扮忙做唔切,推搪下次再Present,要避免佢哋蒙混過關,事先要預留足夠時間俾各組員做準備,免得懶鬼有藉口自辯。

設定互相監察機制

另一個對付Free rider嘅對策,係實行內部監察機制:一組人入面再細分二人一小組,二人必須負責唔同工作,例如要搜集競爭對手的減價動向,一個做A公司,一個做B公司,彼此定時報告工作進度。要實行呢種做法,最理想係搵一個較資深嘅人搭一個經驗較淺的人;如果大家心知肚明邊位係成日hea住做,就搵一位較有責任感嘅同事同佢一組,彼此記錄工作進度。表面係互相扶持,實質係互相監察,確保冇人臨到Deadline先話做唔切,妄想救星降臨。

若然你同事當中,真係有搭便車嘅壞份子存在,就算幾唔妥佢哋,都唔好正面衝突,因為「無賴」最擅長搵藉口,你忍唔住同佢死拗盞嘥心機。嘗試採取以上訓練Team Spirit嘅策略,可以讓hea族即時見光死,自取其辱﹗